Fálase

O Tribunal Constitucional levanta por unanimidade a suspensión provisional das reformas da Xunta sobre repotenciación dos parques eólicos e trámites da Lei de Dependencia mentres resolve o fondo do asunto. Ambos preceptos, incluídos na lei de acompañamento dos orzamentos de 2025, foron recorridos polo Goberno de España ao considerar que invaden competencias estatais. O TC considera que manter a suspensión sería máis prexudicial para o medio ambiente que levantala, no caso da norma eólica, e que na tramitación conxunta das valoracións de discapacidade e dependencia non hai un prexuízo para o interese público mentres o caso segue adiante. [Imaxe: © TC]

O Consello da Cultura Galega entrega as súas Medallas de Honra a Kathleen March e a Francisco Díaz-Fierros. A filóloga estadounidense e o edafólogo arousán recibiron este martes os galardóns en recoñecemento á súa contribución ao desenvolvemento das actividades da institución.

CIG-Saúde convoca folga na atención primaria o vindeiro 12 de marzo ante a "situación límite do sistema". Persoal concentrouse en centros de saúde e PAC para exixir "medidas urxentes" que garantan a "calidade asistencial e condicións laborais dignas". 

• Enésima reforma do Sergas nos centros de saúde tras outro modelo frustrado e seis anos de traballo baldío

O conselleiro de Cultura recibe no Gaiás á "fallera maior de València", Carmen Prades, e "á súa corte" nun encontro para "coñecer máis sobre esta celebración", indica José López Campos [Imaxe: CC BY-SA Xoán Crespo / Xunta]

O Parlamento aproba cos votos a prol de PP, BNG e PSdeG e a abstención de DO a lei de urxencia para emendar o erro da Xunta que impedía desgravar na vindeira declaración da renda os libros de texto ás familias que os pagaron en efectivo. Nacionalistas e socialistas reprochan ao Goberno galego que tivese que optar por estas vía para poñer un "remendo" na súa propia "chapuza". Nas imaxes; o conselleiro de Facenda, Miguel Corgos, e Alberto Pazos (PP), Noa Presas (BNG) e Aitor Bouza (PSdeG), durante o debate [© Parlamento].

• Enxeñaría legal de urxencia tras década e media sen libros de texto públicos
• O erro da Xunta ao comunicar a desgravación de libros de texto obrígaa a tramitar unha lei de urxencia
• Os libros de texto mercados para este curso en efectivo quedan fóra da desgravación prometida pola Xunta

CCOO rexeita a última proposta da patronal de transporte de viaxeiros da Coruña e non asinará o convenio. A afiliación do sindicato di non ao acordo, rexeitamento que se une á negativa da CIG. A decisión pon fin á negociación levada a cabo no Consello Galego de Relacións Laborais sen a aprobación dun novo convenio colectivo, o que abre a posibilidade de que se reinicie a folga. 

• O conflito de buses na Coruña segue: unha marcha convocada pola CIG reivindica o 'non' do persoal ao acordo

Falece o mozo de 19 anos ferido no incendio no barrio de Recimil en Ferrol. Un bombeiro perdeu unha perna no mesmo sinistro, que agudizou o debate sobre a escaseza de persoal de emerxencias no concello. Ademais, unha muller permanece grave e un menor de tres anos está baixo vixilancia na UCI pediátrica. 

• O accidente laboral nun grave incendio en Ferrol agudiza o debate sobre a escaseza de bombeiros

Pedro Sánchez anuncia a "desclasificación dos documentos do 23F" para "saldar unha débeda histórica coa cidadanía". "As democracias deben coñecer o seu pasado para construír un futuro máis libre", sinala o presidente do Goberno de España nunha mensaxe na que argumenta, 45 anos despois da operación golpista, que "a democracia non pode estar baixo chave". A decisión, avanza, formalizarase este martes no Consello de Ministros. [Imaxe: Gravación de RTVE]

✍️45 anos despois do golpe recuperamos esta reportaxe que elaboramos en Praza.gal polo cuadraxésimo aniversario, na que conversamos con militantes da esquerda sobre as súas vivencias daquel tempo e reconstruímos os nomes galegos das 'listas negras' que os golpistas manexaban 

• HEMEROTECA (2021) | 40 anos do 23-F: a noite que a democracia cambaleou

Controversia en Portugal ao prohibir a Policía no estadio do Sporting Clube de Braga un tifo que reivindica a relación histórica con Galicia ou referentes do antigo Reino suevo no derbi do Minho fronte ao Vitória de Guimarães. A Policía de Segurança Pública (PSP) obrigou a retiralo entre duras críticas da afección e tamén do club, que nun comunicado oficial considera que "em 2026 exista em Portugal uma força de segurança que rasura mensagens pela análise da sua significância é algo que a todos, enquanto sociedade, nos deve preocupar, não podendo deixar de ser notado o forte odor a outros tempos, nada saudosos". O SC Braga anuncia que prevé recorrer a todas as instâncias no sentido de assegurar que este lamentável episódio" de censura "não mais se repetirá". [Imaxe: © SC Braga]

O Marineda Hockey da Coruña proclámase campión da Copa Princesa tras derrotar o Alcalá por 3-2 na final. O equipo galego, fundado o pasado ano, acada o primeiro título e mantense líder na loita por ascender á máxima categoría.