Fálase

Antón Gómez-Reino, candidato de Galicia en Común, confirma o seu positivo por coronavirus. "O xoves iniciei unha corentena" por estar "en contacto con xente diagnosticada", explica a través das redes sociais, nas que detalla que o pasado domingo, persoal do Sergas lle realizou a proba na casa. "Continúo traballando desde a casa e pronto para seguir, como ata agora, todas as prescripcións sanitarias para frear a expansión do virus", agrega. Gómez-Reino participa hoxe nunha nova videoconferencia co resto de líderes dos partidos galegos.

VÍDEO | Vinte no fútbol: o episodio final d'Os 20 do XX, a serie de Antón Varela en VINTE sobre a Galicia de hai cen anos, achéganos ao fútbol daquel tempo, o do nacemento da selección galega ou dos primeiros pasos de clubs emblemáticos do país. Podes velo integramente aquí

Unidades do Exército de Terra comezan a despregarse en cidades galegas dentro do dispositivo do estado de alarma contra o coronavirus. Nas imaxes, divulgadas polas Forzas Armadas, efectivos da Brilat en Vigo na noite deste luns. (Imaxes: Exército de Terra). Ampliamos a información neste espazo

Unidades do Exército de Terra patrullarán en Vigo para "reforzar a vixilancia" e facer "cumprir as normas" do estado de alarma para frear o contaxio do coronavirus. O alcalde vigués, Abel Caballero, especifica que, segundo indica o Ministerio de Defensa, serán efectivos da Brilat, "en coordinación coa Policía", os que se despregarán na cidade. O comité de seguimento confirmou tamén, di Caballero, a existencia de aloxamentos sufragados polo Concello "en pensións e hostais" para "todas persoas sen fogar que non estaban no albergue". Na imaxe, Caballero en videoconferencia con outros dirixentes da FEMP.

Grande-Marlaska anuncia a implantación de controis de fronteiras terrestres para frear o coronavirus. Na liña do acordado por Pedro Sánchez e António Costa, só estará permitida a circulación de mercadorías e por motivos laborais ou "forza maior". Ao tempo, a Comisión Europea propón un peche do conxunto da fronteira exterior da UE.

PSA anuncia o peche das súas fábricas en toda Europa pero en Vigo adíao ata o mércores. O grupo di que “os equipos de xestión de cada centro porán en marcha localmente os protocolos de peche das plantas que se levarán a cabo en coordinación cos axentes sociais. En Vigo os sindicatos xa se mobilizaran ante a negativa inicial da empresa a pechar. Ampliamos a información neste espazo

Urkullu suspende as eleccións vascas e os partidos galegos manteñen unha reunión por videoconferencia para facer o mesmo.

O operativo contra o coronavirus das forzas armadas, Operación Balmis, colle o nome do médico militar que difundiu polo mundo a vacina da varíola cun grupo de nenos galegos ao coidado de Isabel Zendal.

As persoas desempregadas non precisarán renovar a súa demanda de emprego, trámite necesario para cobrar as prestacións, ata o 30 de abril. Os trámites urxentes poderán facerse vía telefónica chamando á correspondente oficina de emprego. É unha das medidas establecidas pola Xunta no DOG extraordinario deste domingo.

Dende as súas casas, estudantes de Medicina da USC gravaron un vídeo de apoio ao persoal do Sergas, destacando que "a poboación galega estamos en moi boas mans" e que "temos un gran sistema sanitario, público e universal". "Sodes as nosas heroínas e heroes", conclúen