Xan Castaño (BNG), alcalde de Catoira, presenta a súa dimisión antes do inicio do pleno da moción de censura contra el, presentada polo PP e un grupo de edís do PSdeG-PSOE. Castaño buscaba con este movemento facilitar as negociacións cos concelleiros socialistas para que a localidade siga tendo un goberno progresista. Finalmente, a moción de censura non sae adiante ao non presentarse varios dos edís que a presentaban.
O número de casos de coronavirus rexistrados en todo o planeta vén de superar os 5 millóns, con 328.368 mortes, segundo os datos da Johns Hopkins University. Segundo a OMS, este mércores foi o día cun maior incremento de casos dende o inicio da pandemia (+106.662), debido ao importante crecemento que se segue dando nos Estados Unidos, Rusia, Brasil e o resto de América Latina.
Carlos Da Aira e Raquel Lima, poetas gañadoras do certame aRi[t]mar galiza e portugal 2020, iniciativa da Escola Oficial de Idiomas de Santiago encadrada na Lei Valentín Paz-Andrade dos vínculos coa Lusofonía. Os seus poemas serán interpretados na Gala que se realizará a finais deste ano, xunto coas cancións premiadas de Sabela e António Zambujo e a participación de Georgina Benrós De Mello, premio especial do xurado á Embaixada da amizade galego-lusófona.
PSOE, Unidas Podemos e EH-Bildu acordan a derrogación dos aspectos máis lesivos da reforma laboral de 2012, como a supremacía dos convenios colectivos de empresa sobre os sectoriais ou a posibilidade de despedimento por absentismo causado por baixas por enfermidade. Nun comezo indicárase que o acordo implicaba a derrogación "íntegra" e que se levaría a cabo nas vindeiras semanas, pero horas despois o PSOE difundiu unha rectificación.
O pleno do Congreso aproba a quinta prórroga do estado de alarma polo coronavirus con 177 votos a prol, un por riba da maioría absoluta.
A Coruña reduce o límite de velocidade a 30km/hora en toda a cidade para todas as vías dun carril para cada sentido, agás algunha excepción. Nas rúas con plataforma única en calzada e beirarrúa, a velocidade será de 10 km/h. A urbe herculina convértese en Cidade 30, como tamén o é dende hai anos Pontevedra. Numerosas localidades están a aproveitar a actual situación para que os peóns e a mobilidade sostible gañen espazo nas súas rúas.
Pedro Sánchez responde a Néstor Rego (BNG) que a posibilidade de mobilidade interprovincial chegará "pronto" a Galicia grazas á "situación epidemiolóxica" do coronavirus no país. "É un debate que tamén tivemos co Goberno de Galicia", sinalou o presidente do Goberno central ao deputado do BNG, que pediu nas súas emendas ao estado de alarma introducir xa a posibilidade deses desprazamentos e, ao non seren aceptadas, manterase na abstención.
O Congreso debate este mércores a quinta prórroga do estado de alarma polo coronavirus. Pódese seguir a sesión ao vivo na canle da Cámara Baixa.
O BNG negocia co PSOE a quinta prórroga do estado de alarma polo coronavirus e ábrese a votar "si" se o Goberno central contempla aspectos como a mobilidade interprovincial ou "restaurar plenamente" as competencias autonómicas, indica Néstor Rego. Sinala o deputado que polo momento os socialistas se abren a aspectos como permitir a mobilidade entre concellos lindeiros aínda que estean en provincias diferentes, ao xeito de Euskadi, o cal ve insuficiente. Na cuarta prórroga, o Bloque optou pola abstención. Ampliamos a información neste espazo
O CIS volve preguntar "quen preferiría" a cidadanía que presidise o Goberno de España na crise do coronavirus e un 0,6% sinala a Feijóo. No anterior barómetro, fixérao o 1%. A preferencia nesta pregunta, de resposta espontánea, encabézaa Pedro Sánchez seguido de Pablo Casado. O barómetro do CIS volve situar o PSOE como primeira forza en intención de voto nunhas eventuais eleccións xerais, con baixadas de PP e Vox e unha suba de C's.