Fálase

O Colexio Profesional de Xornalistas de Galicia propón a Feijóo "tres medidas básicas para o xornalismo galego" na nova lexislatura: "a elaboración dunha Lei de Publicidade Institucional", recorrentemente prometida polo propio PP galego, "a creación do Consello de Comunicación de Galicia" e o cumprimento dos artigos aínda pendentes da lei dos medios públicos de comunicación. O decano da entidade, Francisco González Sarria, trasladou as demandas mediante unha carta ao líder do PP, que se dispón a ser reelixido na Presidencia da Xunta.

A Xunta volve publicitar o seu arranxo de estradas de Valdeorras deterioradas polas canteiras de lousa. O Goberno galego informa este martes do inicio das obras recoñecendo novamente o efecto sobre as vías autonómicas dos “vehículos de grande tonelaxe que acceden ás canteiras”.

• HEMEROTECA | A Xunta asume con fondos públicos o arranxo de estradas de Valdeorras cuxo deterioro atribúe ás canteiras de lousa.

Tras o prolongado período sen chuvias en boa parte de Galicia, AEMET e Meteogalicia activan alertas amarelas e laranxas por treboadas e intensas precipitacións en múltiples concellos do país para hoxe e mañá. Máis detalles, nos sitios web de AEMET e Meteogalicia. (Mapa: AEMET)

• O mes de xullo foi o máis seco en Galicia nos últimos 34 anos, sen precipitación ningunha na maior parte do país

A Asociación Provincial de Hostalaría da Coruña recorre ante o Tribunal Superior o peche de pubs e discotecas e a limitación horaria de bares e restaurantes  aplicados pola Xunta para frear os contaxios da COVID-19 na comarca. Argumentan que as medidas son un "acto de fe" que "conculca as liberdades individuais". Recólleo La Opinión de A Coruña

Adif conclúe a retirada dos vagóns do tren de mercadorías descarrilado que guindaran ao río Sil. O administrador ferroviario agrega que se dispón a "continuar coa limpeza e restauración da zona" e a "reparación da vía afectada". Mentres, seguen adiante os procesos sancionadores da Confederación Hidrográfica Miño-Sil e mais da Xunta por mor do impacto ambiental do acontecido.

• Adif disponse a retirar os vagóns guindados ao Sil, Transición Ecolóxica ultima unha multa e di que a Xunta o sabía

A Secretaría Xeral de Igualdade constata un incremento do 35% nas chamadas ao Teléfono de Información á Muller no primeiro semestre do ano. Producíronse 1.842 consultas nestes seis meses, 477 máis que no mesmo período de 2019. A maioría tivo relación coa atención psicolóxica seguida das preguntas sobre recursos e cuestións xurídicas. Os 82 centros de Información á Muller galegos recibiron 5.465 consultas neste semestre, 779 máis que no mesmo período do ano anterior (un 16,6% máis). Porén, os datos ata marzo indican que as denuncias descenderon un 19,5% e ata as 1.397, a maioría concentradas nas provincias da Coruña e Pontevedra. 

O Sergas confirma que está a facer probas PCR a xornaleiros que traballan en invernadoiros de Cospeito tras detectarse un positivo por coronavirus nun destes traballadores. Segundo salienta Radio Lugo, Sanidade resalta que polo momento non considera que se trate dun brote, ao existir un só caso confirmado de positivo pola doenza. Na imaxe, o hospital de Lugo, dende onde están a ser coordinadas as probas.

O Goberno de España ten xa dispoñible para a súa descarga a aplicación móbil Radar COVID para a detección e rastrexo de contactos de persoas que poidan contraer o coronavirus. A app aínda está en desenvolvemento en probas, pero xa se pode obter tanto para móbiles Android como para iPhone. O Ministerio subliña que o seu despregamento depende, en última instancia, das comunidades autónomas.

• Galicia inicia as probas dunha app móbil que dende setembro axudará a rastrexar contactos de casos de Covid19

A Fiscalía da Audiencia Nacional tramita unha denuncia dunha asociación monárquica contra a portavoz nacional do BNG, Ana Pontón. O colectivo Concordia Real Española, que tamén denunciou a Pere Aragonés (ERC) e Teresa Rodríguez (Adelante Andalucía) acusa a líder do Bloque de "inxurias" á Coroa ante o Ministerio Público por afirmar, por exemplo, que "queremos que xulguen os Borbóns por ladróns", publicou o ABC. A asociación denunciante foi creada o pasado xullo e ten como voceiro a Alfredo Urdaci, xefe de informativos de TVE na etapa de Aznar.

O incendio de Lobios no que morreu o piloto dun hidroavión contra incendios de Portugal queimou xa unhas 400 hectáreas. O incendio atinxe ao parque natural do Xurés igual que o que afecta ao municipio veciño de Muíños, onde arderon polo momento unhas 50 hectáreas, segundo Medio Rural. Máis información, hoxe en Praza.gal (Imaxe: Brif Laza)