A Xunta pide que o Estado compense ás concesionarias de buses interurbanos con 8 millóns de euros polas restricións de mobilidade impostas polo coronavirus. O Goberno galego tamén considera que terá que compensar ás concesionarias de autoestradas e autovías fronte á postura contraria do Goberno central porque nada impide a esas empresas seguir executando os seus contratos de xestión de vías de comunicación, que nese caso seguen abertas.
A compañía de telecomunicacións R que dá servizo a milleiros de galegos informa dunha incidencia no seu servizo de internet.
O BNG absterase na votación da nova prórroga do Estado de Alarma polo coronavirus. O Bloque anuncia que non pode "avalar unha liña de acción" do Goberno central que cre "profundamente equivocada", pero di "manter a actitude construtiva", polo que "non se oporá a unha nova prórroga".
O paro rexistrado aumentou en Galicia en 17.148 inscricións durante o mes de abril, o segundo afectado polo coronavirus, e chega ás 191.629 persoas, 25.403 máis que hai un ano. No mesmo mes, a afiliación media á Seguridade Social descendeu en Galicia en 27.853 persoas, caendo notablemente do nivel do millón de afiliacións ata as 974.770; 35.821 menos que doce meses antes. Ampliamos a información neste espazo
ERC votará "non" á nova prórroga do estado de alarma polo coronavirus. A formación soberanista catalá optara ata agora pola abstención
Pablo Casado asegura que "a día de hoxe" o PP "non pode apoiar" a nova prórroga do estado de alarma polo coronavirus, cuxo remate reclamou Feijóo este domingo. Pola banda do PNV, cuxos votos resultan clave, o seu presidente pide que o novo decreto da alarma inclúa un "mecanismo de pacto" coas autonomías para o desconfinamento e a recuperación da "normalidade" nas competencias, sinala Andoni Ortuzar. (Imaxe: PP)
O BOE publica a resolución que permite solicitar un subsidio extraordinario de desemprego para persoas con contratos temporais que quedasen sen traballo no estado de alarma polo coronavirus e mais o subsidio extraordinario para persoal que traballaba en labores do fogar
O BOE publica as ordes do Goberno central para a fase cero do desconfinamento, que comeza mañá, con aspectos concretos para o uso obrigatorio de máscaras no transporte público, as primeiras aperturas de negocios ou a toma de decisións compartida coas autonomías. Estamos a ampliar a información neste espazo
O Goberno central prevé permitir reunións de ata 10 persoas en vivendas particulares na fase 1 do desconfinamento. Así o vén de avanzar o Ministerio de Sanidade que, como sinalou Pedro Sánchez esta mañá, se dispón a concretar diversos aspectos do levantamento das restricións. A fase 1 comezará a partir do día 11 de maio naqueles territorios que cumpran os requisitos sanitarios e de circulación do virus, que o propio Ministerio de Sanidade tamén está a ultimar, pero que xa se coñecen en termos xerais. (Na imaxe, Fernando Simón esta mañá en rolda de prensa © Borja Puig de la Bellacasa/ Goberno de España)
Pedro Sánchez anuncia a obrigatoriedade do uso das máscaras hixiénicas a partir do vindeiro día 4 en todo o transporte público, no inicio da nova fase do desconfinamento. O presidente do Goberno central avanza que, para facilitar o cumprimento desta obriga, o Estado distribuirá 6 millóns de máscaras directamente e achegará 7 millóns á Federación Española de Municipios e Provincias, ademais dun millón e medio a entidades sociais como Cáritas, Cruz Vermella ou CERMI. Ampliamos neste espazo o anunciado por Sánchez
