Fálase

O Goberno central prevé permitir reunións de ata 10 persoas en vivendas particulares na fase 1 do desconfinamento. Así o vén de avanzar o Ministerio de Sanidade que, como sinalou Pedro Sánchez esta mañá, se dispón a concretar diversos aspectos do levantamento das restricións. A fase 1 comezará a partir do día 11 de maio naqueles territorios que cumpran os requisitos sanitarios e de circulación do virus, que o propio Ministerio de Sanidade tamén está a ultimar, pero que xa se coñecen en termos xerais. (Na imaxe, Fernando Simón esta mañá en rolda de prensa © Borja Puig de la Bellacasa/ Goberno de España)

Pedro Sánchez anuncia a obrigatoriedade do uso das máscaras hixiénicas a partir do vindeiro día 4 en todo o transporte público, no inicio da nova fase do desconfinamento. O presidente do Goberno central avanza que, para facilitar o cumprimento desta obriga, o Estado distribuirá 6 millóns de máscaras directamente e achegará 7 millóns á Federación Española de Municipios e Provincias, ademais dun millón e medio a entidades sociais como Cáritas, Cruz Vermella ou CERMI. Ampliamos neste espazo o anunciado por Sánchez 

A chuvia acompaña na metade occidental de Galicia ás primeiras saídas permitidas na nova fase do confinamento. Non obstante, segundo Meteogalicia, as precipitacións cesan dende mediodía e mañá, domingo, será unha xornada solleira con temperaturas altas.

En Lugo comezou o pintado das zonas de xogo na rúa da iniciativa 'Tecendo Brincadeiras'. Nos vindeiros días habilitaranse 60 puntos de xogo repartidos en 6 zonas distintas da cidade

A crise do coronavirus elevará o déficit do Estado español ao 10,34% do PIB en 2020 e a débeda pública ao 115,5%, segundo as previsións das que deu conta este venres a ministra de Facenda, Maria Jesús Montero. A taxa de paro chegará ao 19% e a economía caerá un 9,2%. Pola contra, prevese un incremento do PIB do 6,8% en 2021.

O BOE publica a orde ministerial que desenvolve as condicións nas que se poderá saír á rúa a partir deste sábado. O documento confirma os horarios e detalles apuntados polo ministro de Sanidade para uns paseos (no radio dun quilómetro ao redor das vivendas) que non terán límite de tempo dentro das franxas horarias indicadas e que non se aplicarán nos concellos de menos de 5.000 habitantes. Está prohibido coller vehículos de motor ou empregar o transporte público para desprazarse a outros lugares a facer deporte

O Tribunal Constitucional tomba o recurso presentado pola CUT contra a sentenza do TSXG que reafirmaba a prohibición da manifestación convocada polo sindicato para este 1º de maio en Vigo, consistente nunha caravana de coches. O TC sinala que "a relación entre o dereito á vida e o de reunión esixe unha ponderación pola que, ante a falta das garantías de seguridade nunha situación de máximo contaxio, debe primar o primeiro dereito".

A Xunta prevé declarar loito oficial en Galicia durante todo o mes de maio para "honrar" as persoas falecidas polo coronavirus, segundo vén de anunciar Alberto Núñez Feijóo tras a reunión semanal do Consello.

O INE estima unha caída do 4,1% intertrimestral do produto interior bruto (PIB) do Estado a causa do coronavirus e un devalo do 5,2% en termos interanuais da economía española no primeiro trimestre afectado pola pandemia. A oficina estatística advirte de que a situación xerada pola COVID-19 condiciona fortemente todos estes cálculos.

• O coronavirus provocará unha perda de máis do 5,6% no PIB galego e a recuperación dependerá do control da enfermidade, segundo o Foro Económico de Galicia

O conselleiro de Facenda anuncia no Parlamento que a Xunta decidiu “non realizar probas nos procesos de selección de persoal ata o 1 de outubro”, medida que di que afecta a “45.000 aspirantes”. Ampliamos a información neste espazo