Unha escultura de Ramón Conde titulada “Acordo xusto” presidirá a nova Cidade da Xustiza de Vigo no antigo Hospital Xeral. A Xunta pagará 132.000 euros por ela, da que di que “ten algo de visceral e multicultural ao representar co símbolo máis universal do apertón de mans entre dúas partes en conflito, que alcanzan un acordo que satisfai a ambas as partes e que emocionalmente fainos sentir como xusto”. Conde é autor doutras obras na cidade como os ‘redeiros’ que hai en Gran Vía.
A exposición Galicia, de Nós a nós pode verse desde xa no Museo de Pontevedra ata o 11 de xullo tras o seu paso previo por Santiago e Ourense. Recuperamos unha ducia de paradas obrigadas na mostra.
Pere Aragonès, investido como novo presidente da Generalitat de Catalunya cos votos a prol de ERC, Junts e CUP. O último membro de ERC que presidira o Govern catalán fora Josep Tarradellas, como presidente provisional tras a restauración da institución. O Parlamento catalán non investía un presidente de Esquerra dende Lluís Companys (1933).
Xunta e Goberno de España acordan negociar as discrepancias sobre o apartado da Lei de Saúde galega que atinxe a dereitos fundamentais. O artigo cuestionado polo executivo central, que tamén contemplaba a posibilidade dunha vacinación obrigatoria, quedou en suspenso hai dous meses ao recorrelo ante o Tribunal Constitucional. A negociación que agora se abre pretende resolver o conflito sen que interveña o tribunal.
Alto o fogo de Israel cara a Hamás dende a pasada madrugada. Calcúlase que en pouco máis dunha semana de ofensiva israelí morreron máis de 200 persoas en Gaza e miles resultaron feridas, por 12 vítimas mortais en territorio do Estado hebreo. O secretario xeral da ONU, António Guterres, clama por un "diálogo serio" que evite retomar os enfrontamentos e subliña que Gaza debe ser "parte integral dun futuro Estado palestino". Na imaxe (@PalestinaHoy), un edificio en Gaza destruído por un bombardeo.
Un tremor de terra de magnitude 3,9 mbLg con epicentro en Laza foi percibido ás 00:35 da pasada noite en gran parte de Galicia. É un movemento sísmico máis dentro do enxame que, nos últimos días, concentra máis de 70 tremores na provincia de Ourense, segundo datos do IGN. GCiencia está a analizar nas últimas xornadas o acontecido. (Imaxe: IGN)
A Xunta deixa Lobios como único concello en nivel máximo de restricións pola COVID-19 dende as 00:00 do sábado, día 22. Segundo vén de comunicar Sanidade, case unha trintena de concellos cambian de nivel. No alto pasan a estar Cambados, Vilanova de Arousa, Moraña, Ponte Caldelas, Mos, A Pobra do Caramiñal, Ribeira e Oleiros. No medio quedan Barbadás, O Barco de Valdeorras, Santiso, Boiro, Rianxo, Padrón, Ordes, Valga, Ames, Carral, Fisterra, Cee, Bueu, Cerdedo-Cotobade, Cuntis, Cangas, Moaña, Salceda de Caselas, Chantada, Viveiro e Cervo. Ademais, a Xunta equipara o horario de peche dos bares ao dos restaurantes, quedando ambos fixados na 1 da madrugada e ambos condicionados a teren medidores de CO2 para poder facelo.
Ramón Sarmiento renuncia á reelección como secretario xeral de CCOO-Galicia, cargo que ocupará Amelia Pérez. O aínda líder de Comisións anunciouno durante a súa intervención no 12º congreso da central.
O Xulgado suspende as actuacións sobre o Pazo de Meirás ata resolver se o mobiliario debe considerarse parte do predio. O Estado solicitou que se determinase que bens son integrantes das Torres e o Concello de Sada reclamou que se inclúa o mobiliario como parte do Pazo. A xustiza estimara o recurso dos Franco e permitíralles retirar o mobiliario.
A Xunta habilita os puntos de vacinación fronte á COVID para obter o contrasinal do sistema Chave365 co que relacionarse dixitalmente coa administración galega. Ata agora xa se podía obter o contrasinal nos centros de saúde e no resto de oficinas de atención ao público da Xunta.
