Liberty, empresa aspirante a mercar a planta de aluminio de Alcoa na Mariña, presentará a súa oferta na terceira semana de setembro, tras unha auditoría. A pasada semana Alcoa aceptou ampliar ata finais dese mes a negociación para salvar a planta ao pedilo conxuntamente Xunta, Estado e sindicatos.
Gonzalo Caballero informa de que debe permanecer en confinamento por risco de coronavirus e non asistirá este xoves á constitución das comisións do Parlamento. O líder do PSdeG di que deu negativo nunha PCR que se lle fixo tras ter febre este martes pero “seguindo o protocolo debo estar 48 horas sen contactos”.
Feijóo recomenda agora máscara permanente na escola a partir dos 6 anos pero deixa en mans estatais que sexa unha obriga. O presidente evita novas medidas polo brote da Coruña, do que asegura que non están saíndo casos a outras zonas e “parece” que diminúe. Ampliamos aquí a información.
A Xunta solicita adherirse á aplicación Radar Covid do Goberno central para a detección e rastrexo de contactos de persoas con coronavirus. O Goberno galego quere unila e facela interoperable coa aplicación galega Passcovid na que viña traballando.
Abel Caballero anuncia que o alumeado de Nadal comezará a instalarse en Vigo este mércores 19 de agosto, varias semanas antes que o pasado ano “por mor dos protocolos contra o coronavirus”. En 2019 o Concello aumentou a partida prevista para aquelas festas e as deste 2020 a máis dun millón de euros cada ano argumentando, antes da aparición do coronavirus, a "desaceleración agravada pola situación sociopolítica".
O Porto de Vigo gasta 150.000 euros nunha escultura aos soldados retornados da Guerra de Cuba. Tras un concurso público será elaborada por José Molares, o autor da figura de Verne xa existente nos peiraos vigueses. A entidade que preside o popular Enrique López-Veiga tamén prepara unha exposición sobre a chegada a Vigo dos soldados que se desenvolverá de decembro a marzo.
Pablo Casado substitúe a Cayetana Álvarez de Toledo como portavoz do PP no Congreso nun movemento que fai á ex-ministra Ana Pastor vicesecretaria de Política Social. A nova portavoz no Congreso será Cuca Gamarra, á que Pastor substitúe como vicesecretaria, e o alcalde de Madrid, José Luis Martínez-Almeida, será portavoz xeral do partido.
O debate da investidura de Feijóo será os días 1 e 3 de setembro, coa previsión de que tome posesión do cargo por cuarta vez o sábado 5. Malia a súa promesa de gobernar “desde o día seguinte”, desde as eleccións do 12 de xullo a Xunta está en funcións, coas competencias restrinxidas e coa súa actividade reducida. A previsión inicial de que a investidura fose a última semana de agosto viuse condicionada pola posible celebración dunha nova reunión dos presidentes autonómicos e o do Goberno central.
A Casa Real informa de que o Rei emérito está en Emiratos Árabes desde o 3 de agosto, cando saíu de Vigo nun avión privado “para facilitar” o reinado do seu fillo.
As praias nas que as administracións piden non fumar soben este ano un 15% en Galicia, ata 162 en 66 concellos, segundo informa a Xunta. Tanto nelas como no resto de areais a recomendación é complementada este ano polas restricións e excepcións ao consumo de tabaco establecidas a pasada semana polo coronavirus.
