Abel Caballero anuncia que o alumeado de Nadal comezará a instalarse en Vigo este mércores 19 de agosto, varias semanas antes que o pasado ano “por mor dos protocolos contra o coronavirus”. En 2019 o Concello aumentou a partida prevista para aquelas festas e as deste 2020 a máis dun millón de euros cada ano argumentando, antes da aparición do coronavirus, a "desaceleración agravada pola situación sociopolítica".
O Porto de Vigo gasta 150.000 euros nunha escultura aos soldados retornados da Guerra de Cuba. Tras un concurso público será elaborada por José Molares, o autor da figura de Verne xa existente nos peiraos vigueses. A entidade que preside o popular Enrique López-Veiga tamén prepara unha exposición sobre a chegada a Vigo dos soldados que se desenvolverá de decembro a marzo.
Pablo Casado substitúe a Cayetana Álvarez de Toledo como portavoz do PP no Congreso nun movemento que fai á ex-ministra Ana Pastor vicesecretaria de Política Social. A nova portavoz no Congreso será Cuca Gamarra, á que Pastor substitúe como vicesecretaria, e o alcalde de Madrid, José Luis Martínez-Almeida, será portavoz xeral do partido.
O debate da investidura de Feijóo será os días 1 e 3 de setembro, coa previsión de que tome posesión do cargo por cuarta vez o sábado 5. Malia a súa promesa de gobernar “desde o día seguinte”, desde as eleccións do 12 de xullo a Xunta está en funcións, coas competencias restrinxidas e coa súa actividade reducida. A previsión inicial de que a investidura fose a última semana de agosto viuse condicionada pola posible celebración dunha nova reunión dos presidentes autonómicos e o do Goberno central.
A Casa Real informa de que o Rei emérito está en Emiratos Árabes desde o 3 de agosto, cando saíu de Vigo nun avión privado “para facilitar” o reinado do seu fillo.
As praias nas que as administracións piden non fumar soben este ano un 15% en Galicia, ata 162 en 66 concellos, segundo informa a Xunta. Tanto nelas como no resto de areais a recomendación é complementada este ano polas restricións e excepcións ao consumo de tabaco establecidas a pasada semana polo coronavirus.
As fins de semana de agosto, Praza.gal non se actualiza por descanso do persoal. Pero deixamos moito para ler e o luns estamos de volta :)
A Deputación de Lugo retira dos seus corredores os retratos dos seus presidentes durante a ditadura. “As institucións non poden acoller elementos de recoñecemento ao franquismo ou ás persoas que o representaron”, di a vicepresidencia da institución, que argumenta que “non se trata de esquecer a historia, nin de axustar contas individual ou colectivamente, se non de visibilizar que unha sociedade democrática non pode dar o mesmo tratamento a representantes políticos dun réxime fascista que a representantes políticos elixidos democraticamente”.
Un xulgado da Coruña avala a prórroga das restricións ditadas pola Xunta para a comarca porque os informes sanitarios sinalan “un empeoramento da situación”. Un día despois de que o Tribunal Superior rexeitase a suspensión cautelarísima dalgunhas das medidas ditadas por Sanidade como reclamaba a hostalería, agora o Contencioso-Administrativo número 4 valida a súa prolongación porque segundo os informes sanitarios “existe transmisión comunitaria, de intensidade ata o momento descoñecida”.
Ministerio de Sanidade e comunidades autónomas pactan pechar pubs e discotecas en todo o Estado polo incremento de contaxios do coronavirus. A decisión é "unánime", resalta o ministro de Sanidade, Salvador Illa, que tamén avanza a extensión da regulamentación, xa vixente en Galicia, de só poder quitar a máscara para fumar se hai distancia de seguridade. Ampliamos a información neste espazo de Praza.gal
