Mos, Oroso, Soutomaior, Viveiro e Xove entrarán o vindeiro sábado, 12 de xuño, no nivel medio de restricións pola COVID-19. Así o vén de acordar o comité clínico que asesora á Xunta, que se volverá reunir o vindeiro martes para analizar de novo a situación epidemiolóxica de cada concello. Neste momento non hai ningunha localidade en niveis altos de restrición pola pandemia. [Foto: Ana Varela/Xunta]
O Xulgado admite o recurso da familia Franco contra a suspensión das actuacións sobre Meirás ata resolver se o mobiliario é parte do predio. A familia do ditador rexeita as cuestións incidentais promovidas pola Administración Xeral do Estado e o Concello de Sada.
Feijóo considera "perfecto, axeitado e oportuno" que o PP se manifeste o vindeiro domingo en Madrid con Vox e C's contra os posibles indultos aos líderes independentistas cataláns por parte do Goberno de España. O presidente da Xunta, que non secundará a manifestación porque -segundo indica o Goberno galego-, á hora en que se celebra xa estará viaxando para participar nunha recepción do Papa ao día seguinte, afirmouno nun almorzo informativo en Madrid que recolle a TVG. Na imaxe (CC BY-SA Xunta), Feijóo no evento ao carón de Pablo Casado.
Numerosos servizos en internet, caídos a nivel global. Entre os afectados están portais e servizos como Amazon, Spotify ou Reddit e tamén numerosos medios de comunicación. Diversas fontes apuntan como orixe do problema un fallo en Fastly, un servizo na nube para acelerar contidos web, segundo informa Xataka.
Portugal asegura que o Goberno de España lle garante que vai corrixir decontado a obriga de presentar certificados de vacinación ou de probas negativas da COVID para atravesar a fronteira. "Será corrigido esse equívoco manifesto", afirma o ministro dos Negócios Estrangeiros, Augusto Santos Silva, en declaracións que recolle o Diário de Notícias. (Imaxe: AECT Rio Minho)
Casa Asia recoñeceu este luns en Barcelona a Xulio Ríos “polo seu labor de divulgación da realidade china e como director do Observatorio da Política China e do Igadi”, que fundou hai 30 anos.
Falece aos 80 anos o empresario Alfonso Paz-Andrade nun accidente de tráfico en Gondomar. Segundo informa Faro de Vigo, perdeu o control do vehículo que conducía e bateu contra unha casa.
O produtor Álvaro Pérez Becerra, novo presidente da Academia Galega do Audiovisual. Nado en 1989, convértese no presidente máis mozo das oito academias do audiovisual existentes na Península Ibérica. Traballa dende hai máis dunha década en proxectos audiovisuais e de artes escénicas a través de Ainé Producións e Undodez xunto ao actor Xosé A. Touriñán. As vicepresidencias da entidade corresponden a ao produtor Pepe Coira e á actriz e directora Sonia Méndez.
Dende a pasada medianoite están en vigor as últimas mudanzas nas restricións da Xunta pola COVID-19. Ningún concello está xa en nivel máximo, tras o paso ao alto da Pobra do Caramiñal e Mos, onde xa non está vixente o peche perimetral, volven estar permitidos os encontros de persoas non conviventes e a hostalería pode retomar parcialmente a actividade.
Falece o catedrático da USC Luís Caramés, logo do derrame cerebral que sufriu o pasado venres, segundo informa El Correo Gallego.
