🇵🇸
Este 12 de outubro rexistráronse temperaturas superiores aos 30 graos en zonas do interior de Galicia [como se observa no mapa]. Para este venres as estimacións de Meteogalicia avanzan unha notable baixada das temperaturas e chuvias pola entrada dunha fronte fría que afectará o país.
Marta Rouco, nova alcaldesa de Vilalba tras a dimisión de Elba Veleiro, toma posesión do cargo. No acto deste mércores no concello, a socialista estivo acompañada polo secretario xeral do PSdeG, Valentín González Formoso, e polo presidente da Deputación de Lugo, José Tomé.
A Xunta declara un novo foco de Enfermidade Hemorráxica Epizoótica (EHE) nunha explotación bovina do concello lugués de Xermade. Con este son sete os focos detectados en Galicia, segundo Medio Rural en todos os casos só un animal do total do censo presentaba sintomatoloxía compatible con esta doenza, un virus para o que non existe vacina nin tratamento curativo específico e que non se transmite ás persoas.
Gaza queda sen electricidade mentres seguen os bombardeos de Israel, que mataron xa máis dun milleiro de persoas, entre elas tres sanitarios da Media Lúa Vermella e nove traballadores de Nacións Unidas. En territorio israelí son máis de 1.200 os falecidos. A UE aumenta a axuda a Palestina e advirte a Israel de que non aplique a vinganza. Foto: UNRWA
Catro menores mortos e outras oito persoas feridas no incendio dun edificio en Vigo. O lume rexistrouse de madrugada no número 6 da rúa Alfonso X o Sabio, nas proximidades da praza de América. Todas as persoas feridas foron trasladadas a centros hospitalarios. [Foto: Concello de Vigo]
O Goberno de España recorre ante o Constitucional a lei do litoral de Galicia. Así o anunciou a portavoz do Executivo, Isabel Rodríguez, que anuncia o recurso a 71 artigos, o 40% da normativa. "Aprópiase de competencias exclusivas do Estado", advirte.
CIG-Ensino anuncia unha folga xeral no ensino galego para o martes 24 de outubro en resposta á proposta de baixada de ratios e horarios docentes da Xunta, que consideran "insuficiente" e unha "chantaxe". Máis información, hoxe en Praza.gal.
As primarias no PSdeG terán a súa primeira votación o 29 de outubro. O prazo para presentar as precandidaturas comezou este luns e remata ás tres da tarde do mércores 11. Segundo o calendario aprobado pola dirección socialista, o día 18 se proclamarán os candidatos que conten cos suficientes avais. Besteiro xa confirmou que participará do proceso de primarias e Gonzalo Caballero manifestou a súa vontade de facelo tamén. O proceso rematará o 8 de novembro coa proclamación definitiva do candidato socialista á Presidencia da Xunta.
Democracia Ourensana presentarase ás eleccións galegas, segundo vén de anunciar Jácome. O alcalde de Ourense e líder da formación di que quere "ser decisivos" en Galicia e "que a Xunta aplique discriminación positiva na provincia de Ourense".
O Ministerio de Cultura recoñece a Rodrigo Cuevas co Premio Nacional das Músicas Actuais 2023. O xurado destacou a "singularidade" e o "compromiso coa diversidade" do artista asturiano, moi vencellado a Galicia, e a unión "de música tradicional folclórica e música popular contemporánea" nos seus proxectos. Na imaxe de Andrea Sánchez, o músico no concerto que hai unhas semanas ofreceu na Coruña no marco do festival Noites do Porto.
