Mónica Oltra anuncia a súa dimisión como vicepresidenta da Generalitat valenciana logo da súa imputación pola xestión que o seu departamento fixo do caso de abusos a unha menor tutelada polo qeu foi condenado o seu ex-marido. "O caso pasará á historia da infamia", di.
O BNG confirma que Goretti Sanmartín volverá ser candidata á alcaldía de Santiago. Nun acto no que tamén participou o escritor Suso de Toro, Ana Pontón considerou que "é a alcaldesa que Santiago necesita para recuperar o pulso" e "saír do letargo" dun "goberno de rutina". Sanmartín, que foi candidata por primeira vez en 2019, avanza, pedirá apoio a "todas as persoas que levan Compostela no corazón". O Bloque, que actualmente ten 2 edís na corporación compostelá, asegura que "non se pon límites" cara aos comicios de 2023. [Imaxe: CC-BY-NC-SA BNG]
A causa por malversación contra Jácome volve ser arquivada. O xulgado considera que "non aparece debidamente xustificada a perpetración do delito" por parte do actual alcalde de Ourense no manexo de fondos públicos recibidos por Democracia Ourensana. A acusación fora asumida pola Fiscalía a través dunha denuncia.
Rueda insiste en que o PPdeG foi un "exemplo de unidade" coa súa elección como substituto de Feijóo. Afirmouno este luns ante o Comité de Dirección do partido antes de emprenderen a elección de candidaturas ás alcaldías que, no caso das sete principais cidades, prevén designar durante este verán.
A esquerda gobernará Colombia por primeira vez: Gustavo Petro gaña as presidenciais co 50,47% dos votos e culmina unha mudanza política histórica no país. Imaxe dun dos seus últimos actos de campaña.
Macron perde a maioría absoluta nas eleccións lexislativas de Francia. As primeiras proxeccións da segunda volta outorgan á coalición do presidente un total de 218 escanos, lonxe dos 289 que outorgan a maioría absoluta. A segunda forza política sería Nupes, que lograría 156 escanos.
Alfonso Rueda xustifica os pactos coa extrema dereita. "Non sería algo imposible pactar con Vox se fose necesario", di nunha entrevista en Radio Galicia o presidente da Xunta, que defende acordos cos ultras se son necesarios para garantir a estabilidade.
Restablecida a circulación ferroviaria entre Galicia e a Meseta que fora interrompida polo grave incendio en Zamora. O Adif comprobou que a infraestrutura non fora afectada polo lume, segundo indica a propia compañía. Foto: BRIF Laza.
David Rodríguez, gañador do XXVI Premio Vicente Risco de Ciencias Sociais pola obra Liberdades antigas, tempos modernos: o republicanismo de Castelao.
O Burela Pescados Rubén pelexará por outra Liga logo de vencer o Roldán (3-2) no partido de volta das semifinais polo título. O equipo laranxa feminino buscará outro trofeo logo de gañar a Copa da Raíña o pasado mes de maio.
