Fálase

A Xunta incorpora dende o luns a Vilanova de Arousa ao grupo de concellos coas máximas restricións pola COVID-19, no que seguirán A Pobra do Caramiñal, O Grove, Carballeda de Valdeorras e Cualedro. Ademais, unha decena de municipios sobe de nivel de restricións e catro (Rubiá, As Pontes, Muxía e Ortigueira) descenden ao nivel baixo. 12 concellos quedan no nivel alto (Lobeira, Muiños, Petín, O Barco de Valdeorras, Meira, Ribeira, Cambre, Marín, Meis, Meaño, Ribadumia e Ponteareas) e unha vintena, no medio (Cartelle, Lobios, Cortegada, Padrenda, Verín, Trabada, Barreiros, Chantada, Boiro, Rianxo, Carnota, Carral, Catoira, A Illa de Arousa, Cambados, Vilagarcía de Arousa, Poio, Sanxenxo, Cangas, Gondomar e Vigo). Inicialmente, a Xunta situou Trabada e Barreiros no nivel alto, pero minutos despois corrixiu o erro.

• AMPLIAMOS 👉 As Rías Baixas, A Limia e Valdeorras concentran os concellos con máis incidencia da COVID e restricións
• MAPA INTERACTIVO | Restricións da Xunta pola COVID-19 dende o luns, 26 de abril

O ministro do Interior, Fernando Grande-Marlaska, a directora xeral da Garda Civil, María Gámez, e o ex-vicepresidente do Goberno de España e candidato de Unidas Podemos en Madrid, Pablo Iglesias, denuncian a recepción de cartas con ameazas de morte e balas no seu interior. Cóntao Infolibre. Imaxe divulgada por Iglesias na súa conta de Twitter

Víctor Freixanes optará á reelección e será o único candidato a presidir a Real Academia Galega. O editor e docente incluirá na súa candidatura á cineasta Margarita Ledo Andión.

Xulio Ferreiro, ex-alcalde da Coruña pola Marea Atlántica, será o vindeiro decano da Facultade de Dereito da UDC, onde exerce como profesor titular. Segundo as candidaturas proclamadas pola institución académica, é o único aspirante ao posto no proceso electoral que desenvolve a Universidade coruñesa.

O TSXG prevé que o xuízo do caso Angrois "poida comezar a celebrarse no primeiro trimestre de 2022", polo que a sentenza non chegaría, cando menos, ata 9 anos despois do accidente. Así o avanzou o alto tribunal galego no marco dunha "xuntanza organizativa" con xuízas e xuíces dos xulgados de Santiago.

• A versión oficial que culpou o maquinista de Angrois xa foi posta en dúbida por sete xuíces, un fiscal e unha axencia europea

O Diario Oficial de Galicia publica as mudanzas nas restricións da Xunta pola COVID-19 que estarán en vigor dende a vindeira medianoite. Ademais dos cambios de nivel por concellos, inclúe a ampliación de capacidade dos mercados, feiras e congresos e o permiso para reiniciar, aínda que con limitacións, a actividade das atraccións de feira.

• MAPA INTERACTIVO | As restricións da Xunta pola COVID, concello a concello

O PP pide agora ao PSdeG para negociar unha censura en Ourense contra Jácome que o seu voceiro non só non sexa o candidato senón que tamén dimita como concelleiro. Os populares reclamaban que Rafael Rodríguez Villarino non fose quen encabezase a moción contra o actual rexedor, Gonzalo Pérez Jácome, pero tras anunciar este luns o socialista que está disposto a non ser o candidato para facilitar a operación, agora os populares queren que tamén deixe de ser concelleiro.

Feijóo considera que o Goberno de España non recorrería no Constitucional a reforma sanitaria promovida polo PP en Galicia "se estivese redactada en catalán". Afirmouno esta mañá nunha entrevista en Onda Cero. Segundo o previsto, tras o recurso gobernamental, o TC suspendeu cautelarmente os preceptos recorridos, como os relativos á vacinación. Na imaxe, Feijóo onte co delegado do Goberno de España, José Miñones.

• HEMEROTECA | O recurso do Estado no Constitucional suspende o artigo da reforma sanitaria da Xunta que atinxe a dereitos fundamentais

Os equipos ingleses abandonan a Superliga e botan abaixo a iniciativa liderada por Florentino Pérez. Té con Gotas analiza nun novo podcast a retirada do fútbol británico que racha coas ambicións do presidente do Real Madrid. 

A Pobra do Caramiñal, O Grove, Cualedro e Carballeda de Valdeorras manteranse a partir do venres no nivel máximo de restricións, segundo vén de acordar o Comité Clínico que asesora á Xunta na loita contra a Covid. Marín, Meaño, Ribadumia, Vilanova de Arousa, Padrenda, Cortegada, O Barco, Rubiá, Lobeira, Muiños, Petín, Meira, Ribeira, e Cambre situaranse no nivel alto. Mentres, Trabada, Barreiros, Lobios, Cartelle, Cambados, Catoira, Vilagarcía de Arousa, A Illa, Meis, Sanxenxo, Cangas, Gondomar, Ponteareas, Vigo, Boiro, Rianxo, Carral, Muxía, As Pontes de García Rodríguez, e Ortigueira estarán no nivel medio. O resto de Galicia quedará no nivel baixo de restricións.

• MAPA INTERACTIVO | Consulta aquí o nivel no que estará cada concello a partir do venres e as restricións aplicadas