Fálase

O artigo #UNSEGREDOAVOCES. A loita feminista do alumnado da ESADg continúa na rede publicado en Vinte  pola xornalista Adela Bértolo Lueiro é o gañador do Premio Alfredo Vicenti de Xornalismo Cívico que entrega o Ateneo de Santiago. O xurado acordou conceder accésits a David Reinero pola serie de reportaxes “O que custou o AVE a piques de rematar”, publicada en Praza.gal, e a Marta Otero Mayán polo artigo “Menores migrantes, ayer y hoy”. O pasado ano 2019 a gañadora do premio fora Montse Dopico por outra reportaxe publicada en Praza.gal.

O Colectivo Nós organiza na noite deste xoves un coloquio sobre a selección galega de fútbol coa presenza de Fernando Vázquez, Sergio Álvarez, Verónica Boquete e Xurxo Souto. Pódese seguir en directo a partir das 21 horas nesta ligazón. 

O Congreso aproba por 177 votos a prol, 148 en contra e 17 abstencións a nova lei educativa impulsada pola ministra Isabel Celaá. Entre outras cuestións, a norma impedirá á Xunta renovar os concertos con colexios que segregan por sexo, agora vixentes ata 2023. Tamén garante o dereito a "recibir ensinanzas en castelán e nas demais linguas cooficiais". A norma continúa agora o seu trámite no Senado.

• A reforma educativa impedirá á Xunta renovar os concertos con colexios que segregan por sexo, agora vixentes ata 2023

José Manuel Baltar destitúe como vicepresidente da Deputación de Ourense ao líder dos 'rebeldes' de Democracia Ourensana, Miguel Caride, tras a súa expulsión do partido de Gonzalo Pérez Jácome tras dous meses no cargo. Faino despois de que un informe da secretaría xeral da Deputación evidenciase que este nomeamento contradí a recente sentenza do Tribunal Supremo que impide que os tránsfugas non poden asumir cargos que melloren o seu rango político ou económico. Na imaxe, divulgada pola Deputación, Caride e Baltar.

O BOE publica a redución do prezo máximo de venda ao público das máscaras cirúrxicas desbotables. Tras a aplicación da baixada do IVE, este importe máximo queda en 62 céntimos IVE incluído, fronte aos 96 céntimos da anterior limitación

Suicídase Rosario Porto no cárcere de Ávila onde cumpría a condena imposta polo asasinato da súa filla, Asunta Basterra. Porto fora trasladada a este centro penitenciario dende o de Teixeiro (Curtis). O documental 'Operación Nenúfar', da galega Bambú Producciones, abordara en profundidade este caso e a súa investigación, tras a que tamén foi condenado o pai da nena, Alfonso Basterra. (Imaxe: Google Street View)

A Xunta activa as primeiras axudas directas para os autónomos da pandemia e publica no DOG a orde que regula o Programa de rescate. Desde hoxe, aquelas persoas que tiveron que pechar o negocio ou reduciron nun 75% os seus ingresos poderán solicitar axudas que van dos 1.200 aos 2.000 euros, financiadas  a  través  do  Fondo  Social  Europeo. 

A Xunta incorpora Sanxenxo ao grupo de concellos con maiores restricións. A localidade, na que dende a semana pasada a Consellería de Sanidade estudaba incrementar os controis, terá dende este venres un confinamento perimetral xunto co Grove. Ademais, estarán prohibidas as reunións de persoas non convivintes e terá que pechar a hostalaría, entre outras medidas. 

• Podes consultar aquí todas as medidas que se aplican en case 70 termos municipais de toda Galicia
• Velaquí o mapa con todos os concellos afectados por restricións

A Xunta mantén que está a traballar nun "modelo perfeccionado" de residencias de maiores e rexeita a "intervención sumarísima do 100%" dos centros porque a maioría, sinala a conselleira de Política Social, Fabiola García, "están libres de COVID". Recólleo a TVG

Detectado un brote de coronavirus na base medicalizada do 061 en Foz, con seis persoas afectadas. Persoal das ambulancias pediu tests e máis seguridade contra a COVID ante o "abandono" do Sergas.