Os 'venres negros' de Defende a Galega acumulan máis de 400 edicións e dous dos seus membros obtiveron sentenzas xudiciais que sinalan a actual CSAG por represalialos
O vindeiro maio faranse oito anos dende que persoal da daquela denominada Corporación Radio e Televisión de Galicia (CRTVG) se agrupou por primeira vez no colectivo Defende a Galega. Baixo ese paraugas, a través das mobilizacións simbólicas dos venres negros o persoal mobilizado comezou a sinalar inxerencias políticas do Goberno da Xunta no seu traballo, así como outras reivindicacións laborais.
Pasaron xa máis de 400 deses venres negros salferidos doutras protestas e acontecementos. Entre elas, folgas impulsadas polo comité intercentros da corporación ou dúas condenas xudiciais por represaliar persoal; unha delas xa declarada firme polo Supremo e a segunda, ditada recentemente polo Tribunal Superior e que a agora Corporación de Servizos Audiovisuais de Galicia (CSAG) se dispón a recorrer, segundo confirmou este martes no Parlamento a súa directora xeral, Concepción Pombo.
Pombo foi nomeada ao abeiro dunha nova lei dos medios públicos que, entre outras mudanzas, supuxo a fin do precepto legal que obrigaba a elixir a dirección xeral da corporación con máis votos ca os do PP no Parlamento -maioría reforzada e non só absoluta-. Estaba vixente dende 2011, pero nunca chegara a aplicarse.
O PP vai abrir no Senado unha pescuda política coa que acusa os medios públicos estatais de diversas irregularidades económicas e de converterse nunha "plataforma de propaganda partidista e gobernamental"
Con todo este pano de fondo en Galicia a dirección estatal do PP vén de redobrar a súa ofensiva cara a Radio Televisión Española (RTVE). E nese marco, o equipo de Alberto Núñez Feijóo, no esencial o mesmo que o acompañou nos seus anos de presidente da Xunta e do PP en Galicia, vén de decidir a apertura dunha comisión de investigación no Senado, Cámara na que gozan de maioría absoluta e na que xa levan abertas media ducia de pescudas sobre outros asuntos contra o Goberno de España ou o PSOE.
Como informa Fernando Varela para infoLibre, a solicitude de comisión de investigación rexistrada polo PP combina a atribución á dirección de RTVE de diversas cuestións raianas coa ilegalidade -dende conflitos de intereses a delitos contables- con acusacións de manipulación informativa no que a voceira do partido no Senado, Alicia García, alcuma como "telepedro". A radio e a televisión pública estatais, acusan, está a "afastarse crecentemente" das súas obrigas legais para converterse nunha "plataforma de propaganda partidista e gobernamental".
"Unha hipocrisía, un cinismo absoluto"
Para a presidenta do Comité Intercentros da CSAG, Raquel Lema, impulsar esta investigación é "unha hipocrisía, un cinismo absoluto". "Sobre todo", considera, "estando nestes momentos Alberto Núñez Feijóo liderando o PP e acompañado de galegas e galegos" que formaban parte do seu equipo en Galicia. "É incrible que se atrevan a acusar a RTVE" neses termos "tendo o que teñen na súa casa de orixe, os medios de comunicación galegos" en canto a "manipulación" e "vulneración de dereitos fundamentais".
"É incrible que se atrevan a acusar a RTVE tendo o que teñen na súa casa de orixe", cre a presidenta do comité intercentros da CSAG, que pon o foco nas sentenzas "por vulneración de dereitos a traballadores que reivindican a fin da manipulación"
Neste sentido, Lema pon o foco precisamente nas devanditas sentenzas. "Aquí hai condenas por vulneración de dereitos fundamentais a dous traballadores pola súa participación activa en Defende a Galega, un movemento que o que máis reivindica" é precisamente frear "a inxerencia política e a manipulación" nos medios públicos, salienta en declaracións a Praza.gal. "Xa non é unha opinión nosa, un punto de vista diferente das traballadoras organizadas, senón sentenzas do Tribunal Supremo e do Tribunal Superior de Xustiza de Galicia".
A xuízo da presidenta do comité intercentros da CSAG, o PP "primeiro debería arranxar a súa casa". Tamén no referente á lei dos medios públicos, que en Galicia "aprobaron cos seus únicos votos" e que implicou "eliminar o Consello de Informativos e o Estatuto Profesional que estaban previstos na lei de 2011, que nunca se crearon" e que están incluídos no Regulamento Europeo sobre liberdade dos medios de comunicación, vixente dende agosto de 2025.
RTVE invoca o Regulamento Europeo, que contradí a lei galega
Tras o rexistro da solicitude por parte do PP, RTVE respondeu cun comunicado institucional no que, como informa infoLibre, invoca precisamente Regulamento Europeo, o mesmo que contradí a nova lei galega da CSAG. Faino para advertir de que esa norma (EMFA, polas súas siglas en inglés), vixente dende agosto de 2025, prohibe aos Estados as inxerencias nas políticas e e decisións editoriais dos prestadores de servizos públicos de comunicación audiovisual.
Considera RTVE que a iniciativa do PP vai alén do normal control parlamentario dos medios públicos porque tenta, entre outros aspectos, "cuestionar a actual liña informativa" da radio e televisión estatais. O que impulsan os populares, advirten, é un "xuízo político" e faino ademais en plena ofensiva da patronal das televisións privadas contra RTVE e mentres, ao tempo, cabe preguntarse se pretenden aplicar no Estado "criterios distintos" a "territorios onde tamén existen radiotelevisións públicas e onde os seus profesionais denuncian situacións de grave deterioro do servizo público", caso de Galicia.
