Formoso aspira a un quinto mandato como alcalde das Pontes sen desbotar ser candidato do PSdeG á Xunta

Valentín González Formoso, este 10 de marzo nas Pontes anunciando que recunca como candidato á alcaldía da vila, que goberna dende 2007 CC-BY-NC-SA PSdeG

Hemeroteca

O secretario xeral do PSdeG, Valentín González Formoso, volverá ser candidato ás eleccións municipais para aspirar a un quinto mandato como alcalde das Pontes. Tras catro eleccións consecutivas logrando o bastón de mando pontés -en 2007 pola mínima e en 2011, 2015 e 2019, por amplas maiorías absolutas-, Formoso optará o vindeiro 28M a conseguilo por quinta vez pero nun contexto ben distinto: agora é o máximo responsable do seu partido en Galicia e por iso non desbota, cando menos de momento, acabar sendo cabeza de cartel socialista á Xunta nas eleccións que, agás en caso de adianto, se celebrarían en 2024.

Formoso citou os medios de comunicación este venres nas Pontes para comunicar unha decisión que está ligada tamén á posibilidade de continuar sendo presidente da Deputación coruñesa, cargo ao que chegou por primeira vez en 2015 e revalidou hai catro anos, en ambos casos en coalición co BNG. Coida o dirixente socialista que segue sendo "perfectamente compatible" manter ambas responsabilidades institucionais nun momento no que toca "arremangarse" e non ficar en "posicións persoais cómodas".

Valentín González Formoso, secretario xeral do PSdeG, nunha rolda de prensa recente CC-BY-NC-SA PSdeG

Afirma o líder do PSdeG que a súa decisión de se manter na política municipal e aspirar a seguir gobernando nas Pontes chega tras unha "reflexión" ligada á "transformación" que está a experimentar a vila polo peche da central térmica e os proxectos industriais en marcha, que cifra nuns 1.400 millóns de euros de investimentos e "centos" de postos de traballo. Atender o futuro industrial das Pontes é tanto como facelo co futuro industrial de Galicia e por iso, afirma, "toca ser responsables".

O secretario xeral do PSdeG defende que é momento de velar polos proxectos industriais en marcha na súa vila "dende As Pontes para Galicia" sen que iso supoña "renunciar" ao seu "compromiso" en clave galega: "Toca ser responsables"

A fábrica de papel tisú de Ence, a planta de hidróxeno de Reganosa e EDP ou a factoría de pneumáticos de Sentury son mostras, di, de proxectos "estratéxicos" dos que cómpre ocuparse "dende As Pontes para Galicia". E esa é a razón, di, pola que recuncar como candidato municipal non supón renunciar ao seu "compromiso persoal con Galicia", senón todo o contrario no marco dun "complexo momento no ámbito laboral e industrial".

Preguntado ao respecto, Formoso mantén que a súa decisión é compartida pola dirección federal do PSOE, que encabeza o presidente Pedro Sánchez. No seo do PSdeG, asegura, tamén se avala a compatibilidade da secretaría xeral cos dous cargos institucionais que xa ostenta no concello e na provincia aínda que impliquen "renuncias persoais", admite.

O anuncio de Valentín González Formoso chega en vésperas de que o Comité Nacional do PSdeG aprobe as candidaturas do 28M para o conxunto dos concellos. Tamén despois de meses de múltiples ruxerruxes a respecto dun eventual retorno á primeira liña política do ex-secretario xeral José Ramón Gómez Besteiro tras o arquivo de todas as causas xudiciais que o atinxían. Sobre Besteiro, o propio Formoso afirmou o pasado decembro que apoiaría a súa candidatura á Xunta se o lucense decidise dar o paso.

Despece

  • Dúas 'fichaxes' en postos altos na lista de Lara Méndez en Lugo para "continuar unha transformación que non ten volta atrás"

    Lara Méndez, alcaldesa de Lugo, no despacho da Alcaldía na casa do Concello, nunha imaxe de arquivo © Concello de Lugo

    As agrupacións locais do PSdeG están a aprobar nos últimos días as candidaturas da formación ás municipais do 28M. A asemblea lucense deu o seu visto e prace este xoves por aclamación á lista encabezada pola actual alcaldesa, Lara Méndez, que optará a revalidar o cargo que exerce dende 2015 para "continuar a transformación de Lugo, que xa non ten volta atrás", afirma.

    O groso da parte socialista do goberno local conformado en 2019 mantense nos postos 'de saída': "Son os mellores e teñen un fondo coñecemento de Lugo", subliña a candidata á reelección na alcaldía

    A que Méndez define como unha "lista gañadora" ten como número dous un dos edís de maior confianza da rexedora no actual goberno, o concelleiro de Medio Ambiente e Medio Rural, Miguel Fernández, e incorpora dúas fichaxes en postos a priori considerados de saída. No número 6 súmase o enxeñeiro informático Jorge Bustos, quen tamén é adestrador auxiliar do equipo masculino do Club Voleibol Emevé. E no oitavo posto -o PSdeG conseguiu 8 edís en 2019- incorpórase o matemático Pablo Permuy, con experiencia en postos de xerencia hospitalaria.

    Xunto a estas incorporacións, Méndez mantén o groso da parte socialista do goberno lucense conformado en 2019, con Paula Alvarellos, Mauricio Repetto, Ana González Abelleira e Olga López Racamonde. "Temos os mellores e deben continuar", sintetiza Méndez, quen subliña que tanto quen continúan como as novas incorporacións teñen un "fondo coñecemento de Lugo e das súas necesidades". "Son persoas moi preparadas, ilusionadas e comprometidas" que "representan a pluralidade" da cidade, afirma.

  • Bugallo recupera a Leiceaga na lista do PSdeG en Santiago, que suma o xornalista Toño Bermúdez

    Xosé Sánchez Bugallo, alcalde de Santiago e aspirante á reelección o 28M, este 9 de marzo na asemblea local do PSdeG CC-BY-NC-SA PSdeG

    O PSdeG de Santiago deu tamén o seu visto e prace este xoves á candidatura coa que concorrerán ás eleccións do 28M co obxectivo de revalidar a alcaldía para Xosé Sánchez Bugallo, que retornou en 2019 ao posto que xa exercera entre 1998 e 2011, cando perdeu fronte á maioría absoluta do PP de Gerardo Conde Roa. Mercedes Rosón recunca como número dous nunha lista na que destaca o regreso á política municipal de Xoaquín Fernández Leiceaga, actualmente senador en representación do Parlamento e agora número tres da candidatura de Bugallo.

    O alcalde compostelán e aspirante á reelección afirma que a súa é unha candidatura "de cidade" que "non se pon límites" porque a capital galega "non ten nada que ver hoxe con 2019": "Os feitos están aí", defende Bugallo

    Leiceaga, que xa fora concelleiro no goberno de Bugallo a principios de século tras recalar nas filas do PSdeG procedente da súa anterior militancia no BNG, foi tamén candidato do PSdeG á Xunta en 2016. Antes, voceiro parlamentario en varios períodos e home de confianza do ex-presidente Emilio Pérez Touriño en momentos clave como a negociación da reforma do Estatuto.

    Membros do actual goberno municipal como Mila Castro (4), Gumersindo Guinarte (5), Marta Abal (6) ou Gonzalo Muíños (7) mantéñense nunha lista na que Bugallo ficha como independente ao xornalista deportivo Antonio Toño Bermúdez, moi coñecido na capital galega pola súa ampla traxectoria en Radio Galicia da Cadena SER. Trátase, defende Bugallo, cunha candidatura "de cidade" que "non se pon límites" porque "os feitos están aí" e "Santiago non ten nada que ver hoxe con 2019". "Recuperamos o rumbo, desbloqueamos proxectos" e agora "debemos seguir traballando para facer de Santiago a cidade que merecemos", defende.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza