Política

"Están a saquear as contas públicas" nun "intento desesperado de adulterar o resultado" do 18F, acusan as socialistas Patricia Iglesias e Mayra García. As axudas recompiladas polo PSdeG atinxen a ámbitos diversos, algunhas son recorrentes cada ano e outras atinxen ata 2027. "Non poñemos en cuestión a necesidade de moitas" delas, pero si que "saquen todo de golpe a un mes das eleccións", sinalan

O comité cualifica de "lamentable e vergoñento para o persoal" o tratamento que os informativos deron da peza difundida polo PP, "a enésima mostra do secuestro dos medios públicos". Unha nova protesta ante San Caetano clama "por unha CRTVG ao servizo do pobo".

Nunha sentenza que revela eivas e demoras na tramitación do expediente por parte da Consellería de Cultura, o TSXG permite á empresa axardinar o espazo que ocupa a edificación que debe demoler

O actual presidente e candidato do PP manifesta que "temos a obriga de fomentar o galego" e o "orgullo de que haxa dúas linguas propias en Galicia", se ben segundo o Estatuto só a galega ten esa condición. Década e media despois de encabezar a delegación do PP en apoio a 'Galicia Bilingüe', advirte de que "non pode haber imposicións" do galego nin "utilizalo como arma política"

Cunha medida escenografía, a candidata do BNG augura que o país está "ás portas dun cambio histórico" que "require dun programa de goberno ambicioso" con medidas como o "rescate da Atención Primaria", "libros de texto gratuítos", o organismo científico Innogal ou o traspaso de competencias pendentes, así como unha empresa pública de enerxía, tren de proximidade e que "a dirección da CRTVG sexa nomeada mediante concurso público"

A concesionaria da AP-9 conservou a exención do 95% no pagamento do IBI nas sucesivas prórrogas da concesión. A última, concedida polo Goberno do PP ata 2048, mantivo o beneficio ata 2023. A Deputación da Coruña, que ten delegada a recadación do IBI de 18 dos 20 concellos polos que pasa a autoestrada na provincia, confirma que este ano xa lle cobrará o 100% do tributo: "Pasan duns ingresos anuais de 175.000 euros a máis de 3,7 millóns"

Adega "confirma a negativa" da Xunta para "outorgar soporte ao voluntariado ambiental" para a limpeza de 'pellets' e outro lixo mariño das praias que están a levar a cabo e, por outra banda, critica a "non renovación" do convenio que sustenta o Proxecto Ríos, "a iniciativa galega de formación e divulgación ambiental con maior traxectoria"

"É difícil diferenciar se son campañas da Xunta ou do PP, onde remata o gabinete de prensa do PP e onde empezan os informativos da CRTVG", coida Rubén Cela, xefe da campaña do Bloque. Os nacionalistas reiteran a petición dun 'cara a cara' entre Rueda e Pontón e mais de dous debates na CRTVG, alén dos doutros medios. O PP só confima a asistencia do seu candidato ao convocado polos medios públicos para o día 5

A gratuidade dos libros de texto foi estendida polo Goberno de coalición PSdeG-BNG e cancelada en 2009 tras o retorno á Xunta do PP, que anos despois aplicou un modelo de axudas e préstamos parciais. O candidato socialista á presidencia, que advirte de que as familias afrontan cada inicio de curso un gasto medio duns 600 euros, promete tamén reducir o número de estudantes por aula ou ampliar as bolsas, cuxa competencia prevé reclamar ao Estado

Tras anos de mobilizacións do persoal que traballaba só 3 meses ao ano, a vaga de incendios de 2017 levou ao Goberno galego a ampliar progresivamente os contratos ata os 6 meses e agora o PPdeG promete aumentalos a 9 meses en 2026

O Consello de Ministros aproba o plan de tarxetas moedeiro para que familias vulnerables merquen alimentos, substituíndo o sistema de entrega de bolsas de comida. A nova tarxeta, moi semellante á cancelada pola Xunta en 2022, estará dotada con entre 130 e 220 euros mensuais e dende 2025 será de competencia autonómica. "Paliar a pobreza infantil" e "mellorar a nutrición", entre o obxectivos que salienta o ministro Bustinduy

Dende Carretando, Marta Casais achéganos ás disparidades na participación electoral nas cidades galegas. A contorna urbana é a que máis adoita recorrer ao voto "dual" en eleccións xerais e galegas e tamén cara con poboación que tende á esquerda. A través de mapas e datos amósanos como a diferenza entre unha Galicia tradicionalmente conservadora e unha con maioría de esquerdas está en canta xente vota, sobre todo, nas cidades