A información oficial revelada agora cunha petición formal de transparencia permite comprobar como en 182 municipios galegos se iniciou algún fogo durante os primeiros 18 días de agosto, sendo Vilalba, Ponteceso, Carballo ou Santiago algúns dos que sumaron máis focos.
O número de interrupcións voluntarias do embarazo entre as menores de 20 anos en Galicia pasou de 294 a 382 no último ano e representaron o 10,5% do total, a porcentaxe máis elevada dende o ano 2013. A ministra Mónica García pide facer fincapé no reforzo das políticas públicas de educación afectivo-sexual e en garantir a accesibilidade aos métodos de anticoncepción.
Galicia é o territorio no que os informes de valoración forense integral, imprescindibles para apoiar as sentenzas dos xulgados de violencia de xénero, sofren máis atraso, unha media de 9,5 meses, que se elevan aínda máis en Pontevedra, segundo revela a Memoria da Fiscalía Xeral do Estado. Abel Losada, subdelegado do Goberno en Pontevedra, carga contra o Instituto Galego de Medicina Legal (IMELGA) dependente da Consellería de Presidencia.
A Xunta cifra no 23,5% o seguimento do paro convocado por O'Mega e Simega en Galicia para rexeitar o borrador do Estatuto Marco proposto polo Ministerio de Sanidade.
Unha organización de colexios privados sen subvención volve investigar os concertados para sinalar que continúan cobrando malia o veto legal. Un informe que investigou 30 casos en Galicia cifra en máis da metade os centros galegos onde as achegas económicas son obrigatorias de facto, con cotas dunha media de 54 euros mensuais e algunhas de ata 255.
A Valedora do Pobo pide á Xunta mellor información sobre restricións a instalacións de aforro enerxético nun caso no que enleou co seu propio silencio administrativo para acabar admitindo un "erro na xestión dos expedientes"
"O coñecemento e a experiencia das comunidades locais teñen que formar parte das políticas públicas contra o fogo, que deben ser de abaixo a arriba e non ao revés", di unha das autoras de Lume. Análise social dos incendios forestais, que vén de publicar Xerais.
O Ministerio de Consumo revela datos que Xunta e sector evitan divulgar, como que o Goberno galego vén poñendo as menores multas posibles para cada tipo de incumprimento
Adega, a PDRA e a CIG levan ao xulgado a empresa polo procedemento na concesión de augas para a planta prevista en Palas. O PSdeG rexistra unha iniciativa no Parlamento na que pide ao goberno de Rueda que "rexeite formalmente a autorización industrial" do proxecto que, segundo o líder socialista, "é fume e propaganda".
A segunda edición do encontro xeracional Mover os Marcos abrirase cunha conversa que amosará proxectos e ferramentas para vivir en galego, coa participación de Alberto Pombo, Noemí García e Carlos Callon. Falamos cos tres sobre o que cómpre facer para derrubar os obstáculos para o uso da lingua.