Unha ducia de filmes gañadores dos Premios Mestre Mateo

Dhogs (2018)

Dhogs, de Andrés Goteira, é o filme que mantén o récord de galardóns nunha edición dos Mestre Mateo. No ano 2018 fíxose con 13 premios, entre eles o de mellor película, pero tamén mellor dirección, guión e os catro premios actorais.

Andrés Goteira: "Dhogs pregunta se imos quedar, como sociedade, aí sentados sen facer nada"

Os mortos van á presa (2009)

Os mortos van á presa, de Ángel de la Cruz, mantén outro récord, o de máis nominacións -vinte-, superando a Dhogs, que obtivera 17 candidaturas finalistas. Gañou finalmente dez destes galardóns, entre eles o de mellor película. E iso que o filme atravesara grandes dificultades na súa realización e a rodaxe tivo que ser suspendida no verán de 2006 por problemas de financiamento, retomándose tempo máis tarde.

Ángel de la Cruz: "Non sería raro que un filme de animación fose nominado na categoría de mellor película"

O Apóstolo (2013)

Galicia foi historicamente unha potencia na animación, pero só nunha ocasión unha película animada se fixo co premio ao mellor filme nos Mestre Mateo. Foi no ano 2013 con O Apóstolo, de Fernando Cortizo, unha arriscada aposta por unha obra de stop motion, que atravesou grandes atrancos económicos no seu longo proceso de realización, que durou máis de catro anos. Gañou seis premios, entre eles o de mellor película e dirección.

Antes dos Mestre Mateo existiron os Premios Chano Piñeiro, que só se entregaron nunha edición, en 2002. Nese ano a película gañadora tamén foi un filme de animación: O bosque animado, dirixido por Ángel de la Cruz.

Fernando Cortizo: "Vivir nun país sen cultura converteranos en man de obra barata para o exterior”

Entre bateas (2003)

Entre bateas, dirixida por Jorge Coira, foi a película que recibiu máis galardóns na primeira edición dos Premios Mestre Mateo, no ano 2003. Fíxose cun total de dez, entre eles mellor dirección e guión. Iso si, non gañou o de mellor filme, que foi para Os luns ó sol.

Jorge Coira: "Que teñamos ficción en galego é fundamental para non esmorecer como pobo”

18 comidas (2011)

Varias películas (e series) de Jorge Coira impuxéronse en sucesivas edicións dos Premios Mestre Mateo. De feito, Coira suma unha vintena de premios, cinco deles como director. En 2011 a gran gañadora foi 18 comidas, unha singular película, na que a improvisación xoga un papel determinante, que obtivo sete galardóns. Recentemente, o filme celebrou o seu 15 aniversario cun pase especial en NUMAX.

15 anos de '18 comidas', a película improvisada para "redescubrir o gusto" por facer (e ver) cine

O descoñecido (2016)

E se Jorge Coira é o director máis laureado, Luís Tosar encabeza a listaxe dos actores máis premiados, cun impresionante total de 9 galardóns e 16 nominacións nas 24 edicións dos Mestre Mateo. Un deses premios obtívoo en 2016 por O Descoñecido, de Dani de la Torre.

Dani de la Torre: "Non nos diferenciamos do cine americano en creatividade ou talento, só en orzamentos"

Matria (2024)

Matria, de Álvaro Gago, non obtivo o premio ao mellor filme nesta edición, pero fíxose don cinco galardóns, entre eles o de mellor interpretación feminina, para María Vázquez. E iso é o que destacamos, pois a actriz é a que suma un maior número de premios na historia dos Mestre Mateo (catro), cun total de oito nominacións.

🔊 Fálase | Mulleres de Matria

Os fenómenos (2015)

Alfonso Zarauza é outro dos cineastas máis recoñecidos na historia dos Mestre Mateo. En tres ocasións unha película súa (A noite que deixou de chover, Os Fenómenos e Ons) fíxose co galardón ao mellor filme e el mesmo recibiu varios premios como director, guionista e tamén realizador de televisión. En 2015 con Os Fenómenos, un oportuno relato sobre os efectos da crise da Gran Recesión, gañou os premios a mellor dirección e mellor guión.

Alfonso Zarauza: "É fundamental axudar a crear unha comunidade de artistas, que haxa moitas persoas soñando con facer películas"

O que arde (2020)

Este sábado Antes de nós, Sirât e As liñas descontinuas son as grandes favoritas para levar o premio ao mellor filme. Oliver Laxe xa o conseguiu no ano 2020 con O que arde, coa que tamén obtivo o galardón á mellor dirección, que tamén recibira previamente con Mimosas.

Oliver Laxe: "O cinema segue sendo un espazo onde experimentar cousas fortes que xa non experimentamos na vida"

O corpo aberto (2023)

Tamén recibiu o máximo galardón o anterior traballo de Ángeles Huerta, que pode repetir con Antes de nós. Hai tres anos O corpo aberto foi a gran gañadora dos Mestre Mateo, cos premios á mellor película, dirección e guión, para un total de 12 galardóns. Huerta triunfara tamén co documental Esquece Monelos.

Ángeles Huerta: "Ancorarse ao concreto é a maneira de facer universal calquera proposta artística"

O corno (2024)

Hai dous anos O Corno, que triunfara no festival de Donostia, foi tamén recoñecida na noite dos Mestre Mateo. A película de Jaione Camborda fíxose con sete galardóns, entre eles o de mellor filme, mellor directora e mellor guión.

Jaione Camborda: "Aposto moito por compartir inquedanzas, gústame situarme na pregunta para compartir co espectador"

As Neves (2025)

O pasado ano a gañadora foi tamén (e van tres anos consecutivos) a película dunha directora, As Neves, de Sonia Méndez, que se fixo con tres galardóns (entre eles o de mellor filme). A gran triunfadora da noite foi a serie Rapa, con 11 premios.

Sonia Méndez: "'As Neves' é unha película de xente boa facendo cousas malas sen querer"