O eurodeputado galego do PP Francisco Millán Mon volve recuncar nas listas dos populares para as eleccións ao Parlamento europeo que encabeza a catalá Dolors Montserrat. O PP de Feijóo inclúe na candidatura europea, no décimo posto sendo o oitavo para Millán Mon, a Adrián Vázquez Lázara, que se presentou como galego –por ser a orixe dos seus pais– por Ciudadanos nos anteriores comicios.
A vacinación contra o Virus Respiratorio Sincitial (VRS) evita unhas 400 hospitalizacións de bebés menores de 6 meses e acada unha efectividade do 82%, segundo os datos da primeira campaña que vén de presentar o Sergas, que lembra que antes da pandemia da COVID este virus provocaba "entre 800 e 1.000 hospitalizacións" ao ano, tres de cada catro en menores dun ano de idade. Dende o pasado setembro e até marzo foron inmunizados 13.505 nenas e nenos. [Imaxe: CC BY-SA Xunta]
Festa por Luz Fandiño este domingo, 5 de maio, ás 11 horas no Museo do Pobo Galego. Amizades da poeta finada esta semana aos 92 anos organizan unha primeira homenaxe na que haberá espazo para o activismo, a poesía, a mocidade e o feminismo. [Fotografía de Sés e Luz Fandiño o pasado novembro na entrega do premio Facer País, outorgado pola Asociación Cultural Val de Láncara]
Botan a andar os dous departamentos que substitúen a desaparecida Secretaría Xeral de Igualdade coa toma de posesión das persoas que os dirixirán: María Quintiana, directora xeral de Promoción da Igualdade; e Roberto Barba, director xeral da Loita contra a Violencia de Xénero. Quintiana coordinaba ata agora as redes sociais do presidente da Xunta e Barba exercía de maxistrado do Xulgado de Violencia de Xénero número 1 da Coruña. Ambas áreas dependen agora da Consellería de Política Social e teñen rango orgánico inferior á anterior secretaría xeral. Estes nomeamentos son parte dos aprobados este pasado luns no Consello da Xunta.
O conselleiro de Presidencia, Diego Calvo, queda encargado do despacho dos asuntos do presidente da Xunta, Alfonso Rueda, durante a súa viaxe a Arxentina dos próximos días. O DOG publica o decreto que así o establece ás portas dunha viaxe na que Rueda reunirase con empresas pesqueiras galegas e a emigración.
José Mujica anuncia que sofre un cancro de esófago. O expresidente uruguaio informa nunha rolda de prensa de que a súa saúde complícase, ademais, pola enfermidade do sistema inmunolóxico que xa padecía. "Mentres poida, seguirei militando e entretido coas verduras. Mentres o rollo aguante, vou seguir (...) Quero transmitirlle ás pibas e pibes que a vida é fermosa, e gástase e vaise", di Mujica. [Na imaxe, José Mujica en El Pepe, una vida suprema, o documental de Emir Kusturica]
Pedro Sánchez comunicará ás 11 desta mañá se dimite ou continúa na presidencia do Goberno de España a través dunha "declaración institucional" dende La Moncloa, segundo vén de confirmar a Secretaría de Estado de Comunicación, que inicialmente a situara nas 12. O máis destacado do seu anuncio, este mediodía en Praza.gal. [Imaxe: © José Manuel Álvarez / Pool Moncloa]
Falece aos 92 anos a poeta e activista Luz Fandiño, segundo vén de comunicar a alcaldesa de Santiago, Goretti Sanmartín. Alén do seu labor literario, Fandiño mantivo un fondo compromiso feminista e con múltiplas causas sociais e políticas, especialmente na cidade de Compostela. En 2020 a directora Sonia Méndez retratou a súa vida no documental A poeta analfabeta. Na imaxe, Luz Fandiño durante a "mullerenaxe" a Maruxa e Coralia en Santiago (2012).
O Aldebarán de San Sadurniño regresa á elite do voleibol masculino tras gañar por 3-1 á Textil Santanderina. O ascenso á Superliga do equipo de Ferrolterra chega apenas dous anos despois de perderen a categoría, á que subiran tras a súa histórica proeza de 2018. O Aldebarán San Sadurniño é un club nado en torno ao colexio público da localidade e baseado na canteira. Crónica en Ferrol 360 [Imaxe: RFEV]
Anxo Angueira ingresa na Real Academia Galega cun discurso centrado na poética da luz na obra de Rosalía de Castro: "A Alborada de Rosalía ten un fondo político e feminista indiscutible, resulta unha verdadeira arenga". Na cerimonia, celebrada en Padrón, ao novo académico respondeulle no nome da RAG a académica Chus Pato. [Imaxe: © RAG]
