Fálase

O Goberno vasco baralla un posible adianto electoral. Así o confirmou o Executivo que preside o lehendakari Urkullu tras a súa xuntanza deste martes. "Pediunos compartir unha reflexión sobre a situación política e institucional", sinala o voceiro do gabinete da coalición de PNV e PSE, Josu Erkoreka. Nas últimas tres convocatorias, as eleccións vascas e galegas celebráronse ao mesmo tempo: en 2009 o daquela lehendakari sumouse ao adianto galego e en 2012 e 2016, sucedeu á inversa. En 2005, Euskadi votou dous meses antes que Galicia.

• CRÓNICA | Eleccións en Galeuscat 2020

A Federación Galega de Fútbol negocia a volta da selección galega, tal e como adiantou o seu presidente, Rafael Louzán. O Paraguai ou Costa Rica son os posibles rivais dun equipo que non xoga desde maio de 2016 en categoría masculina e desde decembro dese mesmo ano en feminina. 

• A selección galega: máis de vinte partidos e unha longa noite de pedra

PARO REXISTRADO | As inscricións nas oficinas de emprego aumentaron en 2.447 en Galicia durante o mes de xaneiro, ata as 167.755. Son 7.045 menos que hai un ano. No mesmo mes, a afiliación media á Seguridade Social reduciuse en Galicia en 13.753 persoas e a cifra total queda en 1,006 millóns, 14.136 máis que en xaneiro de 2019. Máis información, hoxe en Praza.gal

• EPA | Galicia frea na recuperación do emprego: 8.000 máis en 2019, 100.000 menos que antes da crise

O dicionario da RAG incorpora a acepción "lugar ou espazo dentro dunha instalación hospitalaria onde se atenden os partos" á entrada "paridoiro" e suma tamén a locución "sala de partos" como sinónimo. O uso do termo aumentou ao fío da controversia polo peche do paridoiro de Verín. Explícano no Portal das Palabras (Imaxe: Portal das Palabras da RAG)

Miguel de Lira, distinguido co XIX Premio de Interpretación Maruxa Villanueva, que concede o Concello de Padrón. O xurado decidiu outorgarllo por unanimidade pola súa interpretación en Curva España, de Chévere, na que "fixo unha importante posta en valor da oralidade en lingua galega como factor distintivo da teatralidade da comunidade", salientan. Na imaxe, o actor nunha escena da adaptación ao cinema de Eroski Paraíso.

Os traballos de restauración do mosteiro monfortino de San Vicente do Pino sacan á luz "pinturas murais inéditas, en bo estado de conservación e de grande interese histórico e documental". Entre os motivos das pinturas achadas destaca unha imaxe de Cristo, destaca o Ministerio de Cultura nun comunicado, que lembra que esta restauración é parte do Programa Xacobeo de conservación de bens culturais, no que tamén participan a Fundación Catedral de Santiago e a Xunta. Poder ver a imaxe con maior resolución nesta ligazón

O BNG e outras formacións soberanistas do Congreso divulgan o manifesto Non temos rei para detallaren as razóns polas que non asisten ao acto de apertura solemne da lexislatura estatal, que se celebra esta mañá baixo a presidencia do Xefe do Estado. O manifesto íntegro, nesta ligazón

O Goberno de Rajoy gastou medio millón de euros de fondos reservados para protexer o PP no caso da caixa B, segundo informa a Cadena SER, que cita documentación secreta. Entre as accións financiadas, indica, estivo presuntamente a espionaxe a Luis Bárcenas ou destrución de probas.

Ciudadanos reitera a petición ao PP para confluíren en candidaturas únicas nas eleccións galegas, vascas e catalás. Inés Arrimadas reclama aos populares non antepoñer "intereses partidistas" despois de que a dirección do partido secundase a Feijóo advertindo de que, no caso galego, "o centro dereita está unido" no propio PP.

• HEMEROTECA | O PPdeG marca distancias coa proposta de Génova para coligarse con Ciudadanos

O Concello de Monforte pon en marcha este luns un servizo de autobús urbano completamente gratuíto. O novo transporte municipal circulará dende as 8:05 ata as 20:15 horas entre Ribasaltas e Piñeira, facendo paradas no centro da vila, o ambulatorio, o hospital comarcal, a estación do tren ou o cemiterio