Fálase

Ana Miranda (BNG) volve ser eurodeputada. Recolleu este luns a acta que a acredita como membro do Parlamento Europeo en substitución de Pernando Barrena (EH-Bildu), en cumprimento do pacto da coalición Agora Repúblicas, coa que o Bloque concorreu ás eleccións de 2019. Miranda e a portavoz nacional do BNG, Ana Pontón, presentan este martes en Bruxelas as prioridades da formación soberanista na Eurocámara. Na imaxe, Ana Miranda no seu escano no Parlamento Europeo en Estrasburgo, durante a anterior etapa como deputada.

• AMPLIAMOS 👉 Ana Miranda volve ao escano europeo do BNG coa crise do prezos e a procura da "verdade" sobre Angrois como prioridades

Elizabeth Liz Truss será a nova primeira ministra do Reino Unido tras vencer a Rishi Sunak na votación definitiva polo liderado do Partido Conservador para substituír a Boris Johnson co 57% dos votos (81.326 fronte a 60.399, informa a BBC). Truss exerceu ata agora como ministra de Exteriores e de Igualdade e é considerada unha admiradora do labor político de Margaret Thatcher [Imaxe: © Goberno do Reino Unido]

• HEMEROTECA | 🔊 PODCAST O último xogo de Boris: por que o Reino Unido quere revisar o seu divorcio coa UE

María Alonso Seisdedos gaña o Premio Plácido Castro de Tradución. A obra premiada na vixésima edición do certame foi a súa tradución do catalán da obra Canto jo i la muntanya balla/Canto eu e a montaña baila, de Irene Solá. En 2014 María Alonso Seisdedos obtivo o Premio Nacional á mellor tradución e tamén o Premio Xela Arias.

O electorado chileno rexeita cun 62% dos votos a proposta de nova Constitución, que estaba chamada a substituír a da ditadura de Pinochet. O presidente do país, Gabriel Boric, anuncia a súa intención de dar "continuidade ao proceso constituínte", agora cunha maior participación dos partidos e do Congreso.

• HEMEROTECA | A esquerda de Boric gobernará Chile tras vencer ao aspirante da extrema dereita co 55% dos votos

O Barbeira Season Fest de Baiona cancela a xornada deste domingo pola previsión de fortes refachos de vento e ante a "ameaza da posible entrada do a Galicia do furacán Danielle".

Monbús aumentará ata o 95% o desconto nos billetes de autobús ao engadir un 45% ao 50% financiado por Goberno central e Xunta. A rebaixa, para usuarios da Tarxeta de Mobilidade (TMG), aplicarase nos traxectos "máis relevantes do Eixo Atlántico" pero deixa fóra as conexións da Coruña con Ferrol. 

• BNG e PSdeG acusan a Xunta de "mirar para outro lado" ante incumprimentos de Monbus coas liñas de autobús

O PSdeG acusa a Rueda de practicar "escapismo" e de "fuxir" das preocupacións dos galegos. Os socialistas proporán no Parlamento aumentar a seis millóns a contía do bono social eléctrico para beneficiar a 15.000 familias.

O BOE recolle este venres a contratación dun “servizo de asistencia técnica” na investigación do accidente marítimo do buque Villa de Pitanxo (con base en Marín) que está levando a cabo a Comisión Permanente de Investigación de Accidentes e Incidentes Marítimos. Os traballos encargados consistirán na construción dunha maqueta do naufraxio do barco en augas de Terranova o pasado febreiro, con 21 falecidos e tres sobreviventes. A voceira das familias do Villa de Pitanxo, María José de Pazo, considera “decepcionante” que o Goberno tome esta medida en lugar de ter baixado a inspeccionar a embarcación afundida.

Lucía C. Pan recibirá o Premio Chano Piñeiro do Ourense Film Festival (OUFF) ao talento e o emprendemento audiovisual por “representar dende a fotografía, o talento que aniña no audiovisual galego actual, na súa diversidade de formatos e a súa mestizaxe formal”. “É un premio tamén colaborativo, non só para os equipos de fotografia cos que traballo habitualmente. É un recoñecemento para o resto de departamentos fan forza con nós para construír novas narrativas e poder facer o que facemos”, salientou a premiada.

A directora de fotografía Lucía C. Pan (Cambre, 1984) é a primeira muller na historia en recibir tres premios Mestre Mateo á Mellor Dirección de Fotografía da Academia Galega do Audiovisual. En 2018 foi galardoada polo seu traballo no filme de ficción Dhogs, de Andrés Goteira; o seu segundo Mestre Mateo chegou pola primeira longametraxe de Xacio Baño, Trote; e nesta pasada edición dos premios acadou o terceiro polo filme ¿Qué hicimos mal?, de Liliana Torres.

Adriana Lastra chama “machista, retorcido e mala persoa” a Feijóo despois de que este acusara aos socialistas de aproveitar o seu embarazo para cesala do seu cargo. “Hai que ser machista, retorcido e mala persoa para empregar a decisión persoal dunha muller e intentar facerlle dano ao Presidente. A miña decisión é miña, de ninguén máis, respéctaa, machista”, manifestou a ex vicesecretaria xeral do PSOE Adriana Lastra nas súas redes sociais.