Sumar Galicia paraliza as conversas con Podemos Galicia logo da ruptura do grupo no Congreso. "Queremos saber se Podemos Galicia quere construír Sumar Galicia con nós ou non", explican fontes do movemento de esquerda a Europa Press respecto das negociacións para unha candidatura conxunta ás futuras eleccións galegas.
Fandicosta presenta un ERTE que afectará 111 postos de traballo en Domaio. O sindicatos CC OO, UXT e CIG explican nun comunicado que a decisión "unilateral" da pesqueira participada pola Xunta repercute máis do 50% do cadro de persoal ata xuño de 2024.
Podemos rompe con Sumar e decide pasar ao grupo mixto no Congreso. Así o adiantou Diario Red, que asegura que o punto de inflexión para o partido morado foi a "negativa de Sumar a que Podemos poida intervir na comparecencia de Albares sobre Palestina". A formación compartirá agora grupo co BNG e co seu único representante, Néstor Rego.
Feijóo premia a Baltar coa presidencia dunha comisión no Senado, o que supón cobrar máis, malia a súa causa penal pendente por conducir a 215 por hora un coche oficial. Europa Press publica na súa web que o popular ourensán presidirá a comisión de Despoboación e Reto Demográfico. Tras a súa saída da Deputación de Ourense, Baltar é senador por designación autonómica a proposta do PPdeG de Alfonso Rueda e agora logra un posto destacado na Cámara Alta grazas ao PP estatal de Feijóo.
Deputacións e Xunta ofrecen aos bombeiros comarcais unha nova proposta de aumento de soldo do 10%, equiparación salarial para toda Galicia, máis efectivos e redución da xornada. Os sindicatos estudarán a proposta para intentar chegar a un acordo nun conflito que leva meses enquistado.
Ricardo Cao, novo reitor da Universidade da Coruña. Impúxose nas eleccións á reitoría con 2.983 votos, por 1.590 de Fermín Navarrina.
O ERE de Telefónica afectará 339 empregados en Galicia. A compañía anunciou un "excedente funcional" de 5.124 postos de traballo ata 2026 en toda España.
O paro baixa en 2.180 persoas en novembro en Galicia, que destrúe máis de 4.200 empregos. A cifra de persoas paradas queda en131.168, a máis baixa desde que hai rexistros neste mes no que, no entanto, a Seguridade Social perdeu 4.287 afiliacións de media. Máis información, hoxe en Praza.gal.
O Consello Xeral do Poder Xudicial cumpre este luns cinco anos co seu mandato caducado polo bloqueo do PP á súa renovación.
A comisión promotora de Sumar Galicia contará con representantes de CIG, CCOO e UGT, ademais de referentes culturais, para representar "a pluralidade do espazo progresista". Así o confirmou o portavoz da formación, Paulo Carlos López, nunha entrevista en RNE.
