A Xunta recorrerá a paralización do parque eólico do Oribio e Feijóo minimízaa salientando que “neste momento en Galicia estamos tramitando 20 parques eólicos”. Malia que o TSXG paraliza cautelarmente un acordo adoptado polo actual Goberno galego que permitiu iniciar os traballos por dubidar da vixencia da avaliación ambiental feita durante os gobernos de Fraga, Feijóo salienta que a autorización do parque foi emitida en 2007 polo bipartito.
A Xunta outorga o título de embaixador de Honra do Camiño de Santiago ao Consello de Europa, institución que declarou o Camiño en 1987 como primeiro itinerario cultural europeo. Os anteriores galardoados con esta distinción creada en 2013 obviando outras previas foron o príncipe Felipe, o rei emérito, Vicente del Bosque e Mariano Rajoy, único que aínda non recolleu o título.
A Garda Civil ordena protexer a funeraria de Becerreá que participa na exhumación de Franco. Unha empresa de mármoles de Cuenca que tamén participa no proceso foi ameazada e a súa sede sufriu pintadas de grupos fascistas.
EPA | O paro aumenta en 3.100 persoas no terceiro trimestre do ano en Galicia; son 9.500 persoas menos no paro que hai un ano. No mesmo trimestre as persoas ocupadas en Galicia aumentaron en 6.900 e quedan en 1,1 millóns, o que supón 9.200 por riba da cifra de hai doce meses. Máis información, hoxe en Praza.gal
Esta mañá o cadáver de Francisco Franco é exhumado do mausoleo do 'Valle de los Caídos' en cumprimento do mandato parlamentario que pon fin a 44 anos de homenaxe ao ditador no recinto que el mesmo mandou construír. O máis destacado da xornada, hoxe en Praza.gal. Nas imaxes, distribuídas polo Goberno de España, preparativos da exhumación.
Un home agride á propietaria dunha froitaría na Coruña tras esixirlle que retirase produtos cataláns que vende na súa tenda. Cóntao La Opinión de A Coruña
Compostela Aberta e BNG pactan unha moción para expresaren a súa solidariedade cos líderes independentistas cataláns condenados polo Supremo, reclamar unha "amnistía" para a súa liberdade e pedir "diálogo político" entre o Goberno de España e as autoridades catalás. A iniciativa será debatida no pleno que o consistorio compostelán celebra mañá. O texto íntegro da moción pódese consultar aquí. Na imaxe de arquivo, Martiño Noriega (CA) e Goretti Sanmartín (BNG).
Un estudo de augas residuais de 120 cidades, entre elas Santiago de Compostela, destaca o elevado consumo de cocaína no sureste de Europa, de Italia a Francia, pasando por España e Portugal. Este verán, a última investigación do Centro europeo de monitorización de drogas e adicción, dependente da UE, situou Compostela entre as urbes con maior consumo desta substancia.
O podcast Té con Gotas, que podedes escoitar cada dúas semanas en Praza.gal coa análise da actualidade e a vida do Reino Unido en clave galega, vén de lanzar un programa de mecenado para soster economicamente o proxecto. Por menos do que custa un café, pódeste asociar, acceder a contido exclusivo ou recibir material promocional.
As futbolistas de Primeira División van á folga na defensa dun "convenio colectivo digno". Integrantes de diversos clubs explicaron en rolda de prensa os motivos da súa mobilización. (Imaxe: AFE)
