Fálase

Xusto Ordóñez será o candidato do BNG á alcaldía de Rianxo en substitución de Adolfo Muíños, alcalde da vila dende 2011. A formación anunciou a remuda nun acto con Ana Pontón, quen sinala a Muíños como "exemplo de honestidade e boa xestión". O aínda rexedor, que continuará no cargo ata a fin do mandato, sinala que valorou a decisión "un longo tempo e por razóns persoais decido rematar, pero como militante do BNG seguirei traballando para que, agora con Tito, sigamos tendo a máxima responsabilidade de goberno en Rianxo tras as próximas eleccións municipais"

Deteñen un home polo asasinato a coiteladas de Cristina Cabo, a muller achada sen vida na súa casa de Lugo, segundo ratificou o voceiro da Policía Nacional na cidade, Manuel Arias, en declaracións á TVG. "Non se poden dar máis detalles a respecto deste detido, pero para garantía dos cidadáns e da familia, dicimos que hai unha persoa detida", sinala mentres continúan as pescudas sobre o crime.

O Parlamento homenaxea a Carlos Casares no vixésimo aniversario do seu pasamento. O escritor foi deputado na primeira lexislatura polo PSdeG e, na súa lembranza, a Cámara acolleu unha xornada que incluíu unha mesa redonda coa participación de ex-deputados de diversos grupos (na imaxe), algúns deles membros do lexislativo galego na etapa de Casares: Pilar García Negro, Miguel Barros, Francisco Vázquez, Xosé Luis Barreiro Rivas e Mariano Rajoy. O actual presidente do Parlamento, Miguel Santalices, destacou que para a institución "é unha honra que dúas das figuras homenaxeadas no Día das Letras fosen no seu momento deputados", sinala en referencia a Casares e a Ramón Piñeiro, igualmente deputado do PSdeG tras concorrer aos comicios como independente dentro das súas listas.

• HEMEROTECA | “Carlos Casares non só deixou orfos os seus fillos, tamén a cultura galega”
• HEMEROTECA | 19/12/1981 | Galicia constitúe o seu primeiro Parlamento para "devolvernos a confianza en nós mesmos"

Asasinada a coiteladas unha muller na súa casa en Lugo. Sucedeu na rúa Quiroga, nun edificio das coñecidas como casas sindicais. Polo asasinato aínda non se produciron detencións, segundo informa El Progreso, aínda que inicialmente se apuntara a un veciño da vítima, que residía soa. A Policía interroga diversas persoas da contorna da muller asasinada. A alcaldesa de Lugo, Lara Méndez, transmitiu este luns o "cariño e solidariedade coas familias e persoas achegadas á vítima" ademais de condenar os feitos e apelar á necesidade de "continuar traballando na loita contra todo tipo de violencias". A rexedora apela á cautela "ante o avance das investigacións para esclarecer os feitos e poder determinar se o acontecido obedece a un novo homicidio machista".

Jorge Crego substitúe como secretario xeral do Partido Comunista de Galicia a Eva Solla, que seguirá na dirección e mantense como coordinadora de Esquerda Unida.

A espera por unha cirurxía en Galicia é dez días superior á de Madrid, segundo os datos de todas as comunidades publicados este venres polo Ministerio de Sanidade. A situación das listas de espera en Galicia no primeiro semestre do ano, aínda non divulgada polo Sergas, foi avanzada por Praza.gal hai dous meses. Os datos estatais permiten agora comprobar que tres comunidades melloran os datos galegos e que Catalunya atópase á cola, co dobre de días de espera por unha operación que en Galicia.

• HEMEROTECA (23/9/2022) | A espera cirúrxica segue 20 días por riba da que había antes da pandemia tras o período máis propicio do ano para reducila

Ángel Carracedo recolleu este xoves o premio Otero Pedrayo reivindicando a ciencia como "parte indispensable do acervo cultural". O galardón é organizado de xeito rotatorio polas catro deputacións e neste 2022 correspondeu á da Coruña, cuxo presidente, Valentín González Formoso, destacou na entrega ao catedrático e xenetista como "un pioneiro, un visionario e un extraordinario divulgador científico". Nesta entrevista conversamos con Ángel Carracedo tras a concesión do premio. [Imaxe: Deputación da Coruña]

• ENTREVISTA | Ángel Carracedo: "Cando empecei, a carreira universitaria estaba moi ligada á investigación e había máis posibilidades, agora está moi limitado"

Aprobados os Orzamentos do Estado para 2023 con 187 votos a favor no Congreso. Despois de catro días de debate, unhas 120 emendas transaccionais e 22 emendas, houbo 156 votos en contra e unha abstención, a do deputado do BNG Néstor Rego. Os Orzamentos se debaterán agora no Senado. "É unha votación que garante a estabilidade política do país", salientou o presidente do Goberno de España, Pedro Sánchez.

• HEMEROTECA | O Estado orzamenta uns 1.070 millóns de investimento en Galicia por segundo ano consecutivo
• HEMEROTECA | Da suba dun 8,5% nas pensións á continuidade dos trens gratis: primeiras claves do terceiro orzamento do PSOE e UP

Comeza a folga de dependentas de Inditex da provincia da Coruña en tendas que principian xa este xoves cos descontos do black friday. "Anticipa un seguimento masivo da folga" para a xornada do venres, sinala a CIG, que convoca o paro xunto coa UGT -que se desmarcou do pacto do propio sindicato e de CCOO coa empresa a nivel estatal-. A reclamación dun incremento salarial que "permita chegar a fin de mes" está no centro da reivindicación. [Imaxe: CIG]

• AMPLIAMOS 👉 "Se non me queixo, róubanme os de Arteixo": as dependentas de Inditex inician a folga con "éxito de seguimento" 
• Dependentas de Inditex na Coruña, á folga do 'black friday'

A viguesa Susana Rodríguez Gacio logra o seu cuarto título mundial consecutivo de paratríatlon no campionato que se está a disputar en Abu Dhabi, co que xa ten cinco en total. Completou o percorrido en 1 hora, 8 minutos e 10 segundos xunto á súa guía Sara Löehr e segue engrosando un palmarés no que xa conta, tamén, co ouro dos Xogos Paralímpicos de Toquio. Na imaxe, a triatleta co alcalde de Pontevedra, Miguel Anxo Fernández Lores, desprazado en Abu Dhabi por ser a Boa Vila sede da Gran Final das Series Mundiais en 2023 [Imaxe: Concello de Pontevedra]