Esquerra Republicana de Catalunya preguntará o luns á súa militancia sobre a postura na investidura de Pedro Sánchez. A formación consultará con esta pregunta: "Concorda con rexeitar a investidura de Pedro Sánchez se previamente non hai un acordo para abordar o conflito político co Estado a través dunha mesa de negociación?".
O Banco de España recalcula o custo do rescate bancario e elévao ata os 65.725 millóns de euros públicos, uns 1.300 máis que nos anteriores cálculos. Deles, 8.600 millóns non recuperados corresponden ao rescate da desaparecida Novacaixagalicia. A variación débese a cambios na estimación do que podería recuperarse coa privatización de Bankia, se finalmente se produce. (Imaxe: BDE)
O Festival dos Eidos, que impulsa a Fundación Uxío Novoneyra, gaña o premio do público do Culturgal 2019 con máis de 1.500 votos. A feira das industrias culturais celébrase do 29 de novembro ao 1 de deecembro en Pontevedra e un ano máis Praza.gal participará nela.
En marcha na sede do Parlamento Europeo en Bruxelas a xornada sobre a "a realidade da represión e o espolio" franquista, organizada polo Grupo de Memoria Histórica na Eurocámara. O máis destacado, en Praza.gal.
A recollida de sinaturas impulsada polo colectivo Defende a Galega para reclamar o cumprimento íntegro da lei dos medios públicos de Galicia, aprobada hai oito anos, supera os 3.500 apoios.
O Concello de Pontevedra volve ser convidado ao Cumio do Clima para expoñer o seu modelo urbano. O consistorio agradece o convite ao evento que acolle Madrid o vindeiro decembro catro anos despois do Cumio do Clima de París, no que Pontevedra tamén participou.
Montse Dopico gaña o premio Alfredo Vicenti de Xornalismo Cívico que convoca o Ateneo de Santiago cunha entrevista publicada en Praza.gal á profesora e investigadora da UDC Belén Fernández Suárez a respecto dos seus estudos sobre as migracións. O traballo de Montse Dopico tamén foi distinguido a pasada semana cun dos premios Comunicar en Igualdade, que galardoaron dúas reportaxes publicadas en Praza.gal
O mar devolve oito anos despois a placa dun dos tres policías falecidos intentando auxiliar un mozo que afogou no Orzán. O delegado do Goberno central amosou este martes a identificación do axente atopada na praia por unha muller e que, tras así decidilo a familia, será depositada no museo existente na comisaría de Lonzas.
A Xunta anuncia o remate dunha rotonda dous anos despois de iniciar as obras. A glorieta forma parte dunha senda peonil realizada ao longo da estrada entre Gondomar e A Ramallosa (Nigrán) cuxos traballos a Consellería de Infraestruturas tivo paralizados meses por non ser quen de retirar uns postes eléctricos.
O Goberno portugués ratifica que completará a mellora da liña de tren Porto-Valença malia o atraso das obras. Cando se encargaron os traballos anunciouse que estarían rematados neste 2019, e este martes Jornal de Noticias constatou o atraso, o que fixo que Infraestruturas de Portugal emitise un “esclarecimento” asegurando que “todos os investimentos serão concretizados”. A obra portuguesa, que conta con 125 millóns de Bruxelas, debe compaxinarse coa que aínda vén de iniciar Adif no treito Tui-Vigo.
