O BOE publica o listado de persoas de orixe española que morreron nos campos de concentración nazis de Mauthausen e Gusen. Entre estes nomes figuran os de máis dun cento de galegos. Calcúlase que en torno a douscentos galegos foron prisioneiros dos nazis. Podes consultar aquí todos os nomes de galegos incluídos na listaxe
CCOO e UGT reúnense con Sánchez e ínstano a negociar xa con Unidas Podemos e superar as desconfianzas mutuas. Os líderes dos sindicatos trasladan ao socialista que unha repetición electoral sería “unha irresponsabilidade”.
A Xunta publicita campos de voluntariado en Islandia cunha imaxe de Noruega. O Goberno galego divulga na súa web a apertura do prazo para as inscricións cunha fotografía tirada dun banco de imaxes de internet que realmente se corresponde coas illas Lofoten, en Noruega, como se pode comprobar tanto na súa web oficial de turismo como nunha busca rápida en internet.
Cambados acolle desde este xoves e ata fin de mes a exposición A Irlanda de Plácido Castro que se amosou en Vilagarcía o mes pasado. A mostra, na sala de exposicións de ExpoSalnés, analiza as relacións do histórico galeguista, fillo adoptivo de Cambados, coas illas e o celtismo.
O Concello de Pontevedra lanza unha nova campaña contra a violencia machista e as agresións sexuais. Baixo o lema "sen o meu si, non", preséntase cun vídeo protagonizado por Isabel Risco
Convocado para o 12 de setembro o pleno da Deputación de Lugo que disolverá a sociedade urbanística Suplusa, "cumprindo así co recollido no pacto de Goberno" de PSdeG e BNG, destacan dende a institución agora presidida por José Tomé. A solicitude de convocatoria do pleno para disolver a entidade presidida no anterior mandato polo alcalde de Becerreá foi asinada polos tres grupos da corporación.
Así foi a 'Gran Noite de Galicia' no Festival Intercéltico de Lorient, onde este ano é o país convidado. Máis de 150 artistas subiron ao escenario, encabezados por Xosé Lois Romero & Aliboria, Tiruleque, Suso Vaamonde, Davide Salvado ou Pablo Seoane.
A Garda Civil intervén nas Neves 144 litros de augardente "artesanal e clandestina". Segundo o Instituto Armado, o achado produciuse "nunha tenda de alimentación que tamén dispón de bar" onde o produto era vendido en botellas "de curso legal" doutros licores. O propietario "enfróntase a dúas denuncias" por vender augardente sen precintos oficiais e por reutilizar os doutras botellas. (Imaxe: Garda Civil)
O accidente de tráfico no que morreu unha carteira nos Blancos produciuse durante a súa xornada laboral, resalta o sindicato CGT. No sinistro tamén resultou ferida grave a muller que conducía o outro vehículo implicado no choque.
Un xulgado da Coruña obriga a Ryanair a indemnizar con "case 2.000 euros" a dúas pasaxeiras por un atraso de seis horas nun voo Santiago-Madrid. Segundo informa a Unión de Consumidores de Galicia (UCGAL), da que ambas son socias, a aeroliña inicialmente aboou 250 euros pola demora, pero a sentenza obrígaa a "facerse cargo dos danos e prexuízos" derivados dela, como a perda doutros voos e dos servizos hoteleiros contratados no destino.
