Fálase

O Parlamento relaxa as restricións pola COVID e recupera a posibilidade de que asistan aos plenos os seus 75 membros. O hemiciclo adopta a norma do 75% de ocupación máxima, que rexe dende mañá en boa parte das actividades públicas, polo que só poderán estar nese espazo 134 persoas ao mesmo tempo -o máximo son 230-. Eses axustes implican que, alén do persoal da Cámara, na tribuna do público poida haber 39 persoas -ten capacidade para 110- e na de prensa, ata 15 xornalistas -a capacidade é de 20-. [Imaxe: © Parlamento de Galicia]

• Galicia entra no menor nivel de restricións pola COVID en máis dun ano co 83% da poboación vacinada

Carles Puigdemont vén de ser detido en Sardeña, arrestado polas autoridades italianas seguindo a orde de busca internacional emitida polo Tribunal Supremo. O ex-presidente catalán atopábase no aeroporto de Alguer e ía acudir este venres a unha asemblea de alcaldes e concelleiros independentistas sardos

Alu Ibérica solicita concurso de acredores para evitar a quebra. O administrador xudicial das antigas fábricas de Alcoa pretende protexer o patrimonio da empresa ante posibles embargos. 

Portugal anuncia que a pandemia entra na fase da "responsabilidade individual" desde o vindeiro 1 de outubro, di adeus ás limitacións de capacidade dos recintos e reduce o uso da máscara. 

A psiquiatra Iria Veiga e o xenetista Ánxel Carracedo protagonizan o derradeiro vídeo da serie 'Novas Voces para a lingua', que nos últimos meses realizaron a Real Academia Galega e a USC co obxectivo de darlle voz á mocidade con talento que vive e crea en galego. No vídeo, os dous médicos e divulgadores subliñan a "alegría de descubrir en galego".

• '2021, 40 anos despois': a mocidade debate nun documental sobre o presente e o futuro do galego

A Xunta anuncia un bono para consumo cultural similar aos que lanzou o pasado ano para o turismo e a comezos deste para o comercio, como tamén fixeron xa algúns concellos. Feijóo avanza que do 1 de novembro ao 31 de decembro poderán descargarse dunha web ata 39.000 bonos de 50 euros cos que a Xunta asumirá o 50% do custo de libros, produtos audiovisuais ou entradas culturais.

O WhatsApp, nova vía pola que poder pedir cita para vacinarse fronte a COVID. Feijóo anuncia que “desde hoxe mesmo será posible pedir cita” por esa aplicación de mensaxería enviando unha mensaxe ao 981 215930, desde onde se darán instrucións para concretar a data. 

Un grupo de familias e membros da comunidade educativa de distintos centros de ensino galegos lanzan a campaña “ColesNegros” coa que denuncian os recortes introducidos na educación pública. Fan un chamamento a crianzas, familias e persoal docente e non docente para que a partir deste xoves 23 acodan todos os xoves aos coles vestidos de negro ou cunha cinta ou fita negra "que evidencien a intención da Xunta de deixar morrer a escola pública". Inspíranse nos #venresnegros do persoal da CRTVG ou nos #martesnegros da Asemblea de Investigadoras de Compostela

O persoal de Alcoa na Mariña decide volver á folga indefinida ante o "bloqueo" da venda da planta. Os traballadores deciden en asemblea, por ampla maioría, volver ao paro. 

Toda Galicia seguirá en nivel baixo de restricións da Xunta pola COVID-19 dende o sábado agás Foz e O Barco, que se situarán no medio -do que sae Monforte-. Así o vén de comunicar a Consellería de Sanidade, que informa ademais de que o límite xeral de capacidade no interior dos locais pasa a ser do 75% sen límite de persoas (alén do mantemento da distancia de seguridade) agás nos concellos en nivel máximo (se os houber), que sería do 50%.

• MAPA INTERACTIVO | Restricións da Xunta pola COVID dende o 25 de setembro
• Os hospitais galegos tamén van deixando atrás a 'quinta vaga' da pandemia, marcada pola vacinación