O pleno de Santiago aproba os orzamentos de 2019, promovidos polo goberno de Sánchez Bugallo sinalando que teñen un carácter "técnico" para atender materias urxentes. O proxecto saíu adiante cos votos a prol do PSdeG e a abstención de PP e BNG. Compostela Aberta, que observa o resultado como froito dunha "gran coalición" na cidade, votou en contra.
Sánchez apraza a “finais de agosto ou principios de setembro” a reunión con Unidas Podemos para buscar un acordo. Se o 23 de setembro aínda non se produciu a investidura, automaticamente quedarían convocadas novas eleccións xerais para o 10 de novembro.
O Sergas retruca á alcaldesa de Barreiros que a infancia da vila está "perfectamente atendida" malia non cubrir as vacacións da pediatra. A rexedora advertiu por carta ao conselleiro Almuíña dos riscos de ficar sen esta doutora xusto no mes en que o municipio triplica a súa poboación.
Unha nova folga de transportistas de materias perigosas a partir do luns en Portugal ameaza con volver colapsar as gasolineiras fronteirizas. O desabastecemento provocado na anterior incrementou aínda máis o xa tradicional uso das gasolineiras galegas por parte dos portugueses polo menor custo do combustible.
O BOE publica o listado de persoas de orixe española que morreron nos campos de concentración nazis de Mauthausen e Gusen. Entre estes nomes figuran os de máis dun cento de galegos. Calcúlase que en torno a douscentos galegos foron prisioneiros dos nazis. Podes consultar aquí todos os nomes de galegos incluídos na listaxe
CCOO e UGT reúnense con Sánchez e ínstano a negociar xa con Unidas Podemos e superar as desconfianzas mutuas. Os líderes dos sindicatos trasladan ao socialista que unha repetición electoral sería “unha irresponsabilidade”.
A Xunta publicita campos de voluntariado en Islandia cunha imaxe de Noruega. O Goberno galego divulga na súa web a apertura do prazo para as inscricións cunha fotografía tirada dun banco de imaxes de internet que realmente se corresponde coas illas Lofoten, en Noruega, como se pode comprobar tanto na súa web oficial de turismo como nunha busca rápida en internet.
Cambados acolle desde este xoves e ata fin de mes a exposición A Irlanda de Plácido Castro que se amosou en Vilagarcía o mes pasado. A mostra, na sala de exposicións de ExpoSalnés, analiza as relacións do histórico galeguista, fillo adoptivo de Cambados, coas illas e o celtismo.
O Concello de Pontevedra lanza unha nova campaña contra a violencia machista e as agresións sexuais. Baixo o lema "sen o meu si, non", preséntase cun vídeo protagonizado por Isabel Risco
Convocado para o 12 de setembro o pleno da Deputación de Lugo que disolverá a sociedade urbanística Suplusa, "cumprindo así co recollido no pacto de Goberno" de PSdeG e BNG, destacan dende a institución agora presidida por José Tomé. A solicitude de convocatoria do pleno para disolver a entidade presidida no anterior mandato polo alcalde de Becerreá foi asinada polos tres grupos da corporación.
