Fálase

O Xulgado de Instrución número 2 de Santiago pide colaboración cidadá para "conseguir identificar o cadáver dun home falecido o pasado 5 de marzo" mentres practicaba deporte polo Campus Sur. "É un home caucásico de entre 50 e 55 anos, de 1,76 centímetros de altura, de constitución atlética, pel morena, pelo canoso curto e barba completa e cellas canosas", sinala unha nota feita pública polo xulgado, que agrega que "carece de marcas particulares, agás unha cicatriz de 3x2 centímetros no xeonllo dereito, e non ten tatuaxes (...) vestía unha camiseta de cor azul talla XL e un pantalón curto (...) da marca Kalenji, zapatillas (...) da talla 44 e calcetíns da talla 43-46". "O único efecto persoal que portaba era un reloxo de pulseira metálica con esfera azul da marca Eterna Matic", agrega.

A CRTVG desmárcase da inclusión dunha pregunta sobre "o prezo medio dun gramo de cocaína na rúa" no concurso Atrápame se podes e  nun comunicado di estimar que "non estaba no ánimo do programa infravalorar o grave problema que supón a drogadicción", pero que "a formulación desa pregunta non era a adecuada". A corporación pública, que retirou a gravación do programa do seu web, divulga tamén unha declaración da produtora do programa, Voz Audiovisual, que pide desculpas por esta lamentable equivocación". [Imaxe: ©CRTVG]

Inés Rey foi escollida hoxe nova secretaria xeral da Agrupación Socialista coruñesa. A alcaldesa da urbe herculina obtivo o 63% nas primarias, nas que superou a Eva Martínez Acón, ata agora líder do partido na cidade

Inditex suspende "temporalmente" a súa actividade en Rusia, onde ten 502 tendas, sinalando que "nas actuais circunstancias non pode garantir a continuidade das operacións e das condicións comerciais". A multinacional galega, que tamén pecha a súa canle online na Federación Rusa, explica que as tendas operan en réxime de alugueiro, "polo que o investimento non é relevante dende o punto de vista financeiro". Con todo, Rusia constitúe un 8,5% dos beneficios antes de impostos do grupo.

As Tanxugueiras descobren en Lugo o seu espazo no Paseo das palabras do ano, na rúa Menorca da capital lucense. Na iniciativa, promovida polo Concello, participaron as compoñentes do grupo e mais o presidente da RAG, Víctor Freixanes.

• As Tanxugueiras, exemplo para a rapazada no Día da Lingua Materna
• ENTREVISTA | "Queremos demostrar que a nosa música tradicional pode ter a mesma proxección que calquera outra"

O Sergas comezará a aplicar a eliminación de corentenas e de rastrexo para contactos estreitos de positivos COVID dende o luns, día 7. Estas medidas quedarán limitadas aos "ámbitos vulnerables" como centros sanitarios, residencias de maiores ou discapacidade, entre outras. 

• AMPLIAMOS 👉 O Sergas ratifica a supresión de corentenas e rastrexo para contactos COVID agás en "ámbitos vulnerables"

Ucraína asegura que acordou con Rusia un alto o fogo temporal para posibilitar corredores humanitarios nalgunhas zonas do territorio atacado polo Exército ruso. 

O presidente do TSXG admite agora que o xuízo de Angrois non será ata despois do verán, máis de nove anos despois do accidente. Así o recolle Europa Press. Hai tres meses o propio José María Gómez y Díaz Castroverde recoñecía ás vítimas que a causa durara “moito tempo” e prevía o xuízo para comezos deste ano.

• HEMEROTECA | Oito anos de Angrois e aínda sen data para o xuízo: xa levou máis tempo investigar o accidente que facer a liña de AVE na que ocorreu

Feijóo equipara o “sufrimento” persoal do Rei emérito por ser investigado co golpe de Estado do 23-F. “A nivel persoal creo que o Rei emérito sufriu moitísimo, posiblemente estes meses foron xunto co 23-F os momentos de maior sufrimento do rei”, di o presidente da Xunta preguntado pola decisión da Fiscalía de pechar as investigacións contra o ex-xefe do Estado porque os seus posibles delitos prescribiron.

A Xunta abre mañá o prazo das axudas de ata 3.000 euros para reformas de eficiencia enerxética nas vivendas, coma o cambio de ventás. Están financiadas con fondos europeos e o criterio para concedelas é a orde de tramitación das solicitudes que cumpran os demais requisitos, a contar dende a vindeira medianoite. As condicións pódense consultar nesta ligazón

• HEMEROTECA | A Xunta rectifica tras anos repartindo axudas a concellos ás doce da noite pero mantén a velocidade como criterio para outorgalas
• 🔊HEMEROTECA | Rehabilitación enerxética: illar a túa casa para loitar contra o quecemento global