Fálase

O PP forza a celebración dun pleno municipal extraordinario na Coruña asegurando que a cidade sofre "problemas xeneralizados de inseguridade", "roubos" ou "ocupacións ilegais". Entre as reclamacións dos conservadores figura que o Goberno de España introduza diversas mudanzas na lei para eventuais casos de ocupación de vivendas, ao xeito do que vén esixindo a Xunta. A sesión celébrase na mañá deste mércores. Os datos máis recentes do Poder Xudicial sinalan que os novos casos de ocupacións ilegais de vivendas volveron baixar en Galicia e son vinte veces menos que os desafiuzamentos.

• HEMEROTECA | A Xunta pagou 8.000 euros polo informe sobre ocupación de vivendas, que reproduce parágrafos dunha lei do PP de Castilla-La Mancha

PARO REXISTRADO | As inscricións nas oficinas de emprego galegas aumentaron en 991 persoas durante o mes de outubro e quedan en 154.045, o que supón 27.262 menos que un ano antes (-15,04%). No mesmo mes, a afiliación media á Seguridade Social diminuíu en 1.578 persoas, ata os 1,032 millóns. Son 20.633 máis que en outubro de 2020. No total estatal, o paro rexistrado descende levemente en termos mensuais (-0,02%) e a afiliación aumenta tamén un chisco (+0,82%). 

• AMPLIAMOS 👉 O paro sobe en outubro en Galicia, que volve rachar coa evolución positiva do mercado laboral no Estado
• EPA | O emprego volve en Galicia a niveis previos á COVID e o sector servizos segue gañando peso fronte ao devalo industrial

O Xurado dos Premios da Cultura Galega que organiza a Xunta fixo públicos este martes as persoas e entidades distinguidas co galardón neste 2021. Estas son as concesións  nas súas oito categorías.

• Letras: Bernardino Graña
• Artes Plásticas: Antón Pulido
• Artes escénicas: Nova Galega de Danza
• Música: Natalia Lamas
• Audiovisual: Zaza Ceballos
• Lingua: Dígocho eu
• Patrimonio Cultural: Mosteiro de San Pedro de Rocas
• Proxección Exterior: Federación de Asociacións Galegas da República Arxentina

A Audiencia da Coruña deixa en liberdade pero mantén como investigado ao último detido polo crime de Samuel Luiz. O tribunal entende que non hai motivos neste momento procesual para mantelo en prisión provisional, como estaba desde finais de setembro, pero prohíbelle saír de España. No caso hai sete persoas investigadas, dúas delas menores de idade.

• HEMEROTECA | Probas de ADN "implican directamente" os dous principais agresores de Samuel Luiz

Pedro Sánchez e Nadia Calviño comprométense con Yolanda Díaz "á derrogación da reforma laboral". Nun comunicado dos socios de Goberno tras a reunión interna, o presidente comprométese a desmontar a lexislación laboral do PP "nos termos que establece o acordo de coalición e o Plan de Recuperación enviado á Comisión Europea".

• HEMEROTECA (2012) | A reforma laboral do PP simplifica en prazos e custos o despedimento de xeito inaudito

Esgotado o Bono Cultura da Xunta horas despois de abrir o prazo para solicitalo. A iniciativa supón que a Administración asumirá o 50% do custo de libros, produtos audiovisuais ou entradas culturais ata o 31 de decembro a través destes bonos de 50 euros. O pasado outubro, o presidente da Xunta defendeu que o bono cultural do Estado (400 euros para a poboación que faga 18 anos) pretende "comprar" votos, pero non así o do Goberno galego.

• HEMEROTECA | Feijóo defende que o bono cultural do Estado pretende comprar votos e o da Xunta non

Xa se pode solicitar o bono cultura da Xunta. Poderán descargarse ata 39.000 bonos de 50 euros cos que o Goberno galego asumirá o 50% do custo de libros, produtos audiovisuais ou entradas culturais ata o 31 de decembro. Unha iniciativa similar á levada a cabo pola Xunta co sector turístico o pasado ano e co comercio a comezos deste, que conta cun orzamento de 1,95 millóns de euros.

• HEMEROTECA | Feijóo defende que o bono cultural do Estado pretende comprar votos e o da Xunta non

O rastrexador da incidencia da COVID-19 da universidade estadounidense Johns Hopkins indica que xa se superaron os cinco millóns de falecementos polo coronavirus en todo o mundo desde que comezou a pandemia hai menos de dous anos. Segundo estes datos, os Estados Unidos lideran a listaxe de países con máis mortos confirmados pola COVID-19, seguido do Brasil e a India. [Na imaxe, © Concello da Coruña, dúas persoas pasean polo porto coruñés con máscara]

A ourensá Alba Guzmán gaña o Premio de Novela Curta Xuventude Crea 2021 con Xoaniña de deus e o vilalbés Brais Lamela recibe o galardón Xuventude Crea na categoría de Poesía coa obra A linguaxe dos outros pola súa "profundidade filosófica, a modernidade e o manexo dos recursos literarios". Os premios, outorgados pola Consellería de Política Social, están dotados con 3.000 euros, e as gañadoras recibirán ademais apoio na difusión dos seus traballos.

Preto dun milleiro de coches participaron este domingo na caravana organizada polo comité de Alcoa entre San Cibrao e Burela baixo o lema 'enerxía solución'. A marcha entre as vilas transcorreu sen incidencias con berros de 'A Mariña sálavase loitando', mentres o persoal de dous turnos estaba dentro da fábrica de aluminio traballando. No horizonte está a folga xeral de 24 horas convocada por CIG, CCOO e UGT para o 17 de novembro. Ata ese día, continuarán as protestas, pois o comité de Alcoa xa anunciou unha nova mobilización nocturna para o vindeiro sábado. [Na imaxe, de arquivo, unha protesta dos traballadores na Mariña CC-BY-SA CC]

• +INFO👉 | A Mariña vai á folga xeral farta do "abandono" e pola "supervivencia" da comarca