Política

O tamén deputado do BNG no Congreso, que encabeza a Unión do Povo Galego dende 2012, sinala o "exercicio da soberanía nacional" como "única saída real" aos problemas do país. Pontón enxalza a "capacidade de permanencia" do partido xunto á do propio BNG, no que ve compatible o mantemento da autodeterminación como horizonte co "ensanchamento" da base militante

O caso Pokémon, lanzado en 2011 pola despois sancionada xuíza De Lara, supuxo un verdadeiro terremoto político e social en Galicia, con múltiples administración salpicadas pola sombra da corrupción en plena crise económica. A peza principal vén de quedar pechada acreditando que o ex-edil lucense Liñares, xa en prisión por outro caso, liderou a concesión corrupta do guindastre municipal en 2005 a cambio de 2.000 euros ao mes que os participantes na trama aseguraban que ían ao alcalde malia non ser certo

A institución confirma a Ana Miranda a través dunha pregunta parlamentaria que o Estado español non realizou ningunha proposta de petición de fondos europeos “que requira a avaliación" da fábrica de celulosa e fibras téxtiles situada en Palas de Rei "no marco dun PERTE"

A Consellería de Sanidade incide en que as funcións de supervisión dos residentes que acepten os contratos voluntarios para pasar consulta este verán "tamén se poden desenvolver na central de coordinación do 061", pois "a supervisión de presenza física só é obrigatoria nos residentes de primeiro ano" e estes médicos en formación xa están a piques de rematar o cuarto ano de especialización. A CIG-Saúde denuncia que as 243 prazas de médicas e médicos de atención primaria sen cubrir neste momento, sumadas ás necesidades de cobertura dos profesionais sanitarios durante as vacacións, fan que o problema da asistencia sanitaria no verán sexa imposible de resolver con medidas de última hora

O líder do PP retoma a estratexia seguida como presidente da Xunta, cando combinou a "aceptación" de acoller menores migrantes en Galicia coa axitación dun suposto "efecto chamada" como "factura" dunha "política de inmigración con moitos interrogantes". Agora refírese ao acollemento destes nenos e nenas en diversas autonomías como "menas que manda o Goberno", mantén que "nas rúas españolas están deambulando inmigrantes que o Goberno meten en avións" e clama ante Von der Leyen por axuda para "controlar" a situación

O Goberno galego atribúe a "un erro humano" a publicación da información da que foi alertado por Praza.gal e di que tomou "accións oportunas para evitar que volva suceder e minimizar o impacto potencial sobre as persoas afectadas"

O departamento de Ana Redondo pon o foco na necesidade de que os centros de saúde e os servizos sociais funcionen para detectar precozmente a violencia machista, acción xa contemplada no catálogo de medidas urxentes aprobado en 2021. Interior asegura que o sistema VioGen funciona, pero admite que cómpre avaliar en que puntos falla

Dende o día de San Xoán os residuos non recollidos aumentan nas rúas da Coruña como consecuencia das medidas de presión postas en marcha polo Sindicato de Trabajadores de la Limpieza (STL), unha organización cuxos dirixentes están a ser investigados por unha presunta trama de corrupción.

Xunta e Deputación, que controlan a empresa pública propietaria da estación de esquí e que xa viñan facendo desembolsos millonarios, asumirán agora toda a débeda e comprometen outros 800.000 euros ao ano para a súa xestión ordinaria