Por devoción relixiosa, por costume ou polo simple feito de cadrar dous días festivos xusto antes do sábado e o domingo, é posible que durante toda ou parte da pasada semana optases por desconectar un chisco da actualidade. Máis aínda tendo en conta o ritmo frenético, actualmente marcado pola guerra na Ucraína, a crise de prezos e a inminente fin da obriga xeral de portar máscaras en espazos interiores, mais tamén pola remuda que imos vivir na presidencia da Xunta. Para facilitarche o retorno, seleccionamos dez informacións que publicamos en Praza.gal nos últimos días, dende a documentación á que tivemos acceso sobre os case 300.000 euros perdidos pola Xunta por mor dun correo que acabou en spam ata a entrevista coa portavoz nacional do BNG, Ana Pontón, pasando polas mobilizacións na CRTVG ou os movementos de Baltar que decantaron a sucesión no PPdeG e no Goberno galego.
A Xunta non puido xustificar ante a xustiza por que acabou en 'spam' o correo que a fixo perder 293.000 euros nun preito
Os servizos informáticos fixeron un informe que se limita a dicir que “foi dirixido de forma automática” á carpeta de correo non desexado, sen indicar que se rexistrase ningún erro, e o tribunal respondeu que estaba na súa man configurar mellor o sistema
A Xunta retruca que hai máis colexios plurilingües públicos ca concertados e que co bipartito non había
Educación responde ao estudo que denuncia eivas e sinala os centros privados como beneficiados polo plurilingüismo con novos datos que insisten en que a porcentaxe de públicos incluídos no modelo é moito menor.
O xuízo de Angrois comezará máis de nove anos despois do accidente e prevese que dure preto dun ano
O 20 de setembro está previsto que comecen as sesións, coas cuestións previas e as declaracións dos dous acusados, o maquinista e un ex-directivo de Adif, e a sentenza non chegará ata unha década despois do sinistro
![](https://praza.gal/storage/uploads/montaxe-correo-amtega-informe-18ee3de.jpeg)
A Xunta é condenada por tardar dous anos en resolver o acoso laboral que sufriu un traballador
O Tribunal Superior censura a “demora especialmente relevante” de Medio Rural malia os “indicios razoables de existencia de violencia no traballo” e obrígaa a indemnizar o afectado
A COVID en Galicia a unha semana da fin da máscara baixo teito: medio milleiro de ingresos coa incidencia en segundo plano
Os hospitais galegos rexistran nos últimos días algo máis de 500 hospitalizacións simultáneas de persoas coa COVID-19, se ben Sanidade matiza que en torno á metade ingresaron por motivos diferentes ao virus. Os datos de incidencia, cuns 500 casos novos por cada cen mil habitantes a 14 días, están moi influídos pola fin xeral das probas fóra dos grupos "vulnerables" e porque os autotest feitos na casa xa non se inclúen no cómputo oficial
O abuso da temporalidade na CRTVG ergue o persoal: cesións ilegais, fraude e 200 sentenzas en contra
Ducias de sentenzas recoñecen a irregularidade contractual e a indefinidade de traballadores e traballadoras dos medios públicos, onde o 40% son temporais, moitos deles encadeando diferentes tipos de contratos durante anos.
A inflación supera o 10% en Galicia impulsada pola luz e os carburantes, que subiron un 83% nun ano
O IPC dispárase cun incremento do 10,5% en marzo con respecto ao pasado ano, sete décimas máis que a suba media estatal.
![](https://praza.gal/storage/uploads/rueda-0420191.jpeg)
16 anos despois outro Baltar volve decantar a presidencia do PPdeG e ratifica a da Xunta para Alfonso Rueda
O actual vicepresidente xa era o mellor situado para suceder a Feijóo á fronte do Goberno galego, pero a aposta do ourensán por un congreso no partido que evite bicefalias amplía a súa marxe de manobra, á espera de coñecer que cede a cambio aos baróns provinciais. Podes coñecer máis do futuro presidente neste perfil: Alfonso Rueda: de fillo e afiliado a presidente da Xunta
As comunidades de montes pelexan polo seu recoñecemento como xeradoras de electricidade: "queren restrinxirnos a ser produtores de madeira"
A UE impulsa 'comunidades enerxéticas locais' que desenvolvan proxectos de enerxía renovable de autoconsumo. Porén, a falta de recoñecemento legal da propiedade comunal e os atrancos das grandes compañías eléctricas dificultan o acceso dos comuneiros. O Ministerio de Transición Ecolóxica comprometeuse a atopar fórmulas legais. Falamos con Gonzalo Pérez, da comunidade de montes de Tameiga, que instalou placas fotovoltaicas
"O cambio de ciclo político xa empezou e a alternativa con vocación maioritaria é o BNG"
A portavoz nacional do Bloque dá por "constatado" que en Galicia existe "unha maioría social esgotada dos anos de goberno" dun PP que agora se limita a "cambiar caras" mentres mantén a Xunta "paralizada" na peor crise de prezos en catro décadas. "Non ter o obxectivo de ser unha forza hexemónica sería renunciar a dar un futuro mellor a este país", resalta nesta entrevista, na que repasamos algunhas das principais propostas do BNG e a conxuntura política galega e estatal
![](https://praza.gal/storage/uploads/retrato-ana-ponton-praza-2-67c9df5.jpeg)