Acontece

Este 15 de xullo o Sergas notifica mil casos novos en vinte e catro horas por primeira vez dende o 5 de febreiro, pero Sanidade advirte de que, por efecto da vacinación, as incidencias acumuladas xa non poden ser, por si soas, os únicos indicadores de referencia. Entre a poboación máis moza, a aínda non incorporada á vacinación masiva, as incidencias acumuladas igualan ou mesmo superan as acadadas no conxunto da poboación tras o Nadal

O límite nas terrazas hostaleiras baixa a 10 persoas e 6 no interior dos locais. A Xunta "recomenda" esta referencia para os encontros privados en toda Galicia. Notifica 766 casos novos e estima que a vacinación da poboación de 20 a 29 anos comezará "arredor do 9 de agosto"

Nos grupos de 12 a 19 e de 20 a 29 anos, os menos cubertos pola vacinación, a incidencia a 14 días aumentou en máis de 400 puntos en apenas unha semana. Entre a poboación máis protexida pola vacina, o incremento rolda os 10 puntos. O Sergas notifica máis de 700 casos novos en vinte e catro horas mentres a hospitalización segue en niveis baixos, con apenas 60 ingresos

Amigas de Samuel Luiz ratificaron que os dous mozos, de orixe senegalesa, "tentaron afastalo de onde se estaba producindo a agresión, pero eran eles contra unha manda". A Secretaría de Estado de Migracións ratifica que traballa na regularización dos dous mozos para aprobala "nun prazo moi breve" e o delegado do Goberno de España en Galicia sinala o permiso de traballo como posible vía para facelo

'DomusVi Lovers' premiará con tarxetas regalo de 715 ou 350 euros “a calidade humana e a faceta artística” de catro dos seus 26.000 traballadores e traballadoras

Nos últimos sete días completos, o Sergas diagnosticou unha media diaria dunhas 450 infeccións. Na anterior ocasión en que os novos casos aumentaron cun ritmo semellante ao actual, a hospitalización de pacientes coa COVID disparouse un 130%. Agora aumentou apenas un 10% mentres o groso da presión polo incremento de contaxios recae na Atención Primaria e no rastrexo de xeito paralelo á vacinación, co 60% da 'poboación diana' xa coa pauta completa

Tres mil persoas manifestáronse o venres contra os recortes no centro sanitario que dá servizo a catro parroquias rurais do Concello de Marín, que suman cinco mil habitantes. Denuncian que a Xunta pretende "desmantelalo" aproveitando a xubilación dunha das prazas de enfermaría e a dun dos médicos

A escalada levou a incidencia acumulada a 14 días de 85 casos por cada 100.000 habitantes o pasado domingo aos 170 actuais. A cidade de Ourense triplica a media galega e tamén o Salnés rexistra valores moi elevados. A taxa de positividade supera o 5% por primeira vez dende o mes de febreiro. A repunta nos contaxios comeza a producir un aumento nas hospitalizacións

O Club Fluvial de Lugo remóntase a 1935 e dende 1998 gozou dunha concesión á beira do Miño que tenta renovar sen éxito dende 2018. A Confederación Hidrográfica volveulla denegar neste 2021 por interromper o dominio público con instalacións como piscinas ou valados. A denegación é aplaudida dende o movemento ecoloxista e acollida con gran contrariedade nun Club que conserva gran influencia social e mesmo política

O alumnado poderá compartir o material, elimínase a posibilidade do ensino semipresencial no Bacharelato e permítese que os grupos de convivencia estable interaccionen con outros grupos do mesmo curso, sobre todo ao aire libre. Porén, CIG-Ensino denuncia que "haberá menos persoal" e que se eliminan a maior parte dos desdobres e reducións de ratios.