Acontece

Falamos con catro docentes interinas e substitutas sobre a situación que vive este colectivo, suxeito á inestabilidade e á incerteza e que, por exemplo, non cobra os meses de verán aínda que traballara durante todo o curso. Relatan un día a día con dificultades para a conciliación, afeccións de saúde mental ou problemas no acceso á vivenda e reclaman accións da Consellaría de Educación para a dotación de máis prazas e a estabilización do persoal de cara á mellora da calidade do ensino.

A Real Academia Galega (RAG) vén de publicar un informe sobre a situación da lingua galega e unha declaración institucional na que sinala o Goberno galego como principal responsable da caída no uso da lingua galega, tal e como reflicten os últimos datos do Institito Galego de Estatística (IGE). A institución presidida por Víctor Freixanes, que onte celebrou un plenario, pon o foco na aplicación do chamado decreto de plurilingüismo de 2010 que diminuíu a presenza do galego no ensino e defende un Pacto pola Lingua Galega que implica o conxunto da sociedade. 

No ano 2020 naceu en Vigo unha iniciativa moi simple: xuntarse para falar en galego. O éxito levou os faladoiros a converterse nunha asociación que con diversas iniciativas busca "visibilizar" que na cidade "fálase galego, e moito". Dende hai uns meses, ademais, colaboran na organización de cursos de galego para estranxeiras, unha iniciativa do Sindicato de Traballadoras do Fogar e Coidados (Sintrahocu), cuxas afiliadas querían "comunicarse mellor coas persoas anciás que atenden". Falamos con Irene Romero (Faladoiros Vigo) e Elisabeth Matute (Sintrahocu)

Galicia gañou 7.166 habitantes o pasado ano, mais ese incremento repartiuse de maneira moi desequilibrada. As cidades gañaron case seis mil residentes, pero 199 concellos perderon poboación. Vigo (293.977) continúa lonxe da arelada cifra dos 300.000 habitantes e tampouco Lugo (99.482) nin Santiago (99.536) chegan este ano aos 100.000. Mentres, Ferrol rexistra o primeiro aumento de poboación en tres décadas.

A cidade naval é unha das 18 localidades de todo o Estado que aínda non comezou o proceso. En Galicia tan só Pontevedra e A Coruña contan cunha Zona de Baixas Emisións, mentres que Vigo, Ourense, Lugo e Santiago esperan comezar a aplicala nos vindeiros meses

No ano 2023 cometeuse no conxunto do Estado un asasinato por violencia de xénero cada 6,3 días de media, é o peor ano a respecto dos feminicidios desde 2015. A xuíza decana de Pontevedra, Belén Rubido, especializada en violencia sobre a muller, asegura que os datos confirman que "cando se denuncia hai menos posibilidade estatística de que che pase algo grave"

O saldo migratorio do pasado ano volveu ser moi positivo para Galicia (+25.738), especialmente entre as persoas de menos de 45 anos. Un ano máis Venezuela é o lugar de orixe do maior número de inmigrantes (7.181).

O Ministerio de Sanidade puxo en marcha un sistema de avisos para informar á cidadanía cando a temperatura mínima prevista sexa inferior á temperatura limiar de impacto na saúde e sitúa a Pontevedra no nivel dous, cun risco medio para a saúde por tempo frío

As recomendacións do informe presentado hai uns días chocan coa aplicación do programa de educación dixital en 5º e 6º de Primaria, como fai na actualidade a Consellaría de Educación. O documento, que recolle "beneficios" e "riscos" do uso destes dispositivos no ensino, pide unha maior regulación e unha revisión dos seus efectos para "determinar a súa achega á mellora da aprendizaxe segundo criterio científico"