Dende o 2009 a Fundación Contemporánea leva a cabo unha consulta na que participan centos de axentes culturais de todo o Estado. Galicia aparece como o sexto territorio cunha mellor oferta cultural e, por cidades, A Coruña é a décima urbe, por diante de Santiago (15º), Vigo (26º) e Pontevedra (37º)
O Consello da Cultura Galega presenta un proxecto audiovisual composto por seis vídeos que buscan dar valor ao canto acompañado con percusión de man, unha tradición que pasou de xeración en xeración grazas a mulleres "que non aprenderon en ningunha escola e que son as grandes esquecidas da cultura tradicional oral"
A Asociación de Medios en Galego conmemora dende 2018 cada 7 de febreiro o Día dos Medios en Galego cadrando co aniversario do nacemento en 1876 d'O Tio Marcos d'A Portela. Desta volta a celebración inclúe un concerto gratuíto, o día 9, de dous dos artistas con máis proxección na actual escena musical do país
A iniciativa comezou no ano 2013 na Pobra do Caramiñal da man da mestra Pilar Ponte, con quen falamos. Nesta edición, que botou a andar a pasada semana, participan máis de 4.500 persoas de doce centros de ensino, que durante tres semanas empregarán o idioma con normalidade en todos os ámbitos
O Pazo da Cultura de Carballo acolleu este sábado a gala de entrega de galardóns, na que o Premio do Público quedou en mans do vídeo Bembibre coas Tanxugueiras, de Xabi Gómez
A protagonista de '¡Yo vivo!' afirma na recta final do libro que converteu a súa vida nunha autoficción para ser quen de tragar con ela, "cullerada a cullerada". Lúa Mosquetera, poeta e escritora, bordadora, artista, non é a protagonista da súa primeira novela, pero coñece moi ben a historia que conta
Bibliotecas de todas Galicia organizan actividades este luns en homenaxe á ilustradora nacida en Oza en 1922, nunha nova edición do evento organizado pola Consellaría de Cultura e a AGPI. Nas súas obras, Dans estendeu ao papel impreso o seu característico emprego de cores intensas e o seu estilo neoexpresionista.
Non penses nun elefante rosa (Xerais), a última novela de Antía Yáñez, é a historia dunha amizade pouco convencional. Unha muller na trintena que padece TOC faise amiga, case por accidente, do seu veciño, un neno de dez anos que é a única persoa que lle di as cousas como son. Un libro no que a soidade, a dificultade para explicar o trastorno mental, as relacións que saen da norma, a sexualidade non patriarcal, a crítica do amor romántico ou da violencia de xénero van aparecendo nunha narración fluída e amena.
O intelectual finou na cidade herculina en 1923. Este 1 de febreiro celebrarase un acto institucional no pazo municipal de María Pita na súa honra tras descubrir unha placa conmemorativa no cemiterio de Santo Amaro. Así mesmo A Coruña, Santiago e Padrón acollerán ao longo do mes actos que revisitarán a súa figura
A artista plástica María Meijide mostra o seu "diario expandido" na Fundación Eugenio Granell baixo o epígrafe 'Pánico no museo', vencellada ao ano de residencia artística que ofrece a entidade e do que foi beneficiaria en 2022. Unha vintena de pezas que conforman "unha colección que parece conectar coa realidade a través dunha mirada hedonista e íntima", que se pode visitar ata o día 29.
Este martes inaugúrase no Auditorio de Galicia a exposición 'Sempre Máis. Arte, ecoloxía e protesta na Galiza do Prestige', realizada por Unha Gran Burla Negra e comisariada por Germán Labrador. A mostra "non quere nostalxia nin celebración. Non quere dicir 'contra Fraga protestabamos mellor'" senón "resintonizar coas potencias dunha Galicia creadora", destacan
'(Re)conexión' é un proxecto de Andrea Maseda de recolleita da memoria de mulleres anciás da provincia de Lugo e unha forma de volver unir lazos interxeracionais nas comunidades. O resultado é unha peza documental de vinte minutos con seis testemuñas que lembran a vida cotiá que xa non é