Fálase

Pedro Sánchez advirte de que o Goberno de España "tomará cantas medidas sexan precisas para poñer fin ao inxustificable bloqueo" do Tribunal Constitución e do Poder Xudicial e apela ao "respecto á vontade popular" tras a "grave" suspensión da votación no Senado por parte do propio TC. Nunha declaración institucional, o xefe do Executivo di "comprender a indignación de moitos demócratas" tras a decisión do TC, que "acata", e censura que o PP pretenda "reter por medios espurios un poder que os cidadáns non validaron nas urnas". Tras a suspensión da votación das emendas, o Goberno ten a posibilidade de tramitar a reforma como proxecto de lei por vía ordinaria.

• O Tribunal Constitucional acepta o recurso do PP e suspende a votación no Senado para a reforma da súa propia renovación

A presidenta do Congreso, Meritxell Batet, realiza na noite deste luns unha declaración institucional para asegurar que acatarán a decisión do Tribunal Constitucional de suspender a votación no Senado da proposición de lei aprobada o pasado venres no Congreso, pero advirte de que pedirán "ser escoitados" para defender a autonomía parlamentaria e o propio poder lexislativo. "Coa decisión coñecida posibilítase que a interrupción do exercicio da potestade lexislativa estea ao alcance dun só deputado ao interpoñer un recurso de amparo", destaca. Batet asevera que esta resolución prodúcese nun contexto de "bloqueo" e que supón "o perigo dunha potencial deslexitimación do sistema democrático".

Pola súa banda, o presidente do Senado, Ander Gil, comparece tamén para transmitir unha declaración na que salienta que "en 44 anos de democracia xamais se desposuíu ás Cortes da súa potestade de lexislar". Gil critica a "instrumentalización" do Constitucional por parte do Partido Popular de Feijóo e o "grave quebranto democrático" que supón "subtraer ao poder lexislativo a tramitación dunha lei".

• O Tribunal Constitucional acepta o recurso do PP e suspende a votación no Senado para a reforma da súa propia renovación

O pleno do Tribunal Constitucional decide admitir a trámite o recurso do PP contra as emendas polas que se modifica o sistema de elección dos candidatos para o propio TC que ten que nomear o Consejo General del Poder Judicial (CGPJ). Os membros do pleno tamén optan por rexeitar os recursos presentados por Unidas Podemos e PSOE que pedían recusar a dous maxistrados das votacións. O pleno segue reunido á espera da decisión sobre o recurso presentado polo PP que inclúe medidas cautelarísimas para suspender a votación no Senado desas emendas para modificar o acceso dos candidatos ao alto tribunal. 

AMPLIAMOS 👉 O Tribunal Constitucional acepta o recurso do PP e suspende a votación no Senado para a reforma da súa propia renovación 

• EDITORIAL | Golpe de Feijóo ao Estado constitucional 
• HEMEROTECA | O Constitucional adía a votación para decidir se paraliza a reforma que pretende desbloquealo, como pide o PP

Acordo entre os Estados membros da UE para fixar un tope comunitario ás importacións de gas en 180 euros megavatio-hora. Así o vén de confirmar a vicepresidenta e ministra para a Transición Ecolóxica, Teresa Ribera, unha das figuras clave no pacto. [Imaxe: © UE]

O asasino de Diana Quer, condenado a 14 anos de prisión por violación da súa cuñada cando a vítima era menor de idade. A Audiencia Provincial da Coruña impón ademais a José Enrique Abuín o pagamento dunha indemnización de 30.000 euros e a prohibición de comunicarse ou achegarse á muller durante vinte e dous anos. Polo crime de Diana Quer fora condenado a prisión permanente revisable cun mínimo de 25 anos.

• HEMEROTECA | A dimensión real da violencia machista: os feminicidios cometidos fóra da parella entran nos rexistros oficiais

O alcalde de Ribadeo, Fernando Suárez, non recuncará como candidato do BNG en 2023 tras catro mandatos no cargo, os tres últimos (2011, 2015 e 2019) con maioría absoluta. O seu substituto como cabeza de cartel do Bloque será Pablo Vizoso, un dos actuais tenentes da alcaldía. "Esta xente do Goberno Municipal, loitadora, formada, capaz, e experimentada, será parte da nova xeración que siga modelando esta marabillosa transformación do noso Ribadeo", sinalou Suárez na comparecencia ante a prensa na que anunciou a súa decisión.

Arxentina gaña a Copa do Mundo de fútbol ao derrotar nos penaltis a Francia despois dun vibrante partido que rematou con empate a 3. Messi (2) e Di Maria marcaron para os arxentinos e Mbappé (3) para os franceses. Imaxe: FIFA

O PSdeG podería conservar as alcaldías de Vigo, A Coruña, Compostela e Lugo e o BNG a de Pontevedra, segundo a enquisa municipal de Sondaxe publicada este domingo por La Voz de Galicia. O PP podería acadar unha axustada maioría absoluta en Ferrol, mentres que en Ourense preséntase un escenario moi igualado entre PP, PSdeG e unha DO que mantería unha importante forza. A enquisa prevé a desaparición de Ciudadanos nas urbes galegas e un ascenso xeral do Bloque.

Morre aos 50 anos Manoel Vello Salvado (Manolo de Mesía), militante galeguista que levou a cabo un intenso labor activista a prol da lingua (por exemplo, promovendo a etiquetaxe en galego ou a aprobación da ILP da Lei Paz Andrade), da cultura galega en xeral, tanto no ámbito editorial como a través da música, e colaborando en movementos coma a Plataforma Nunca Máis, o sindicalismo no sector da banca ou a denuncia dos enterramentos ilegais de vacas tolas no seu concello. Cristián de base, foi sancristán na súa parroquia de Xanceda e participou no movemento Irimia por unha igrexa galega e progresista. O seu funeral celebrarase esta tarde na igrexa de San Xulián de Lardeiros, procedendo despois ao seu enterro.

Morre en Lisboa aos 85 anos Nélida Piñón. Brasileira de nacemento e filla de emigrantes galegos procedentes de Cerdedo-Cotobade, a escritora nunca perdeu a súa relación con Galicia e facía gala continuamente desta identidade mixta, constituíndo ela propia unha ponte sobre o Atlántico. Galicia, onde recibiu numerosos recoñecementos, estivo continuamente presente nos seus libros, tanto nas obras de ficción (por exemplo en A República dos Sonhos ) coma nas biográficas, coma a recente Uma furtiva lágrima, onde escribe "Gardo Galiza no nicho da memoria".