Fálase

Ana Pontón defende ante a comisaria europea de Cohesión, a socialista Elisa Ferreira, a xestión "descentralizada" dos fondos da UE para a recuperación tras a COVID e a necesidade de que incidan "na economía real, integrada polos sectores produtivos e as PEMES". Ferreira recibiu en Bruxelas á portavoz nacional do BNG e á voceira da formación ante as institucións comunitarias, a futura eurodeputada Ana Miranda. A líder do Bloque subliñou tamén ante Ferreira a necesidade de "compensar a Galiza na transición enerxética". (Foto: Delmi Álvarez)

Feijóo ratifica que volve aspirar á reelección na presidencia do PP de Galicia como paso previo a recuncar no posto no congreso que o partido celebrará o vindeiro xullo en Pontevedra. No caso de completar mandato, ata 2024, o actual presidente da Xunta dirixiría o PPdeG durante máis anos que Manuel Fraga, que o encabezou dende a refundación de AP en 1989 ata xaneiro de 2006, cando o remudou Feijóo.

• HEMEROTECA | Feijóo consegue ser Fraga
• HEMEROTECA | Trinta anos do comezo do fraguismo e da promesa da "autodeterminación verdadeira"

Medio Ambiente lembra que "un arroaz solitario non é unha mascota, polo que se recomenda non establecer contacto, absterse de darlle comida e respectar as súas áreas de descanso". Ante o "episodio" rexistrado en días pasados na ría de Muros e Noia, a Consellería subliña que cómpre "non ofrecerlle nunca comida, non meterse intencionadamente na auga ao seu carón, nin entrar deliberadamente no seu radio de contacto. No caso de estar na auga, débese evitar tocalo ou aproximarlle as mans", agrega. (Imaxe CC BY-SA Xunta)

• HEMEROTECA | "Non somos conscientes da riqueza das nosas augas nin do impacto que estamos producindo nelas"

Feijóo non confirma polo momento se volverá participar na protesta de PP, Vox e Ciudadanos contra o Goberno de Pedro Sánchez na madrileña Praza de Colón, convocada neste caso para rexeitar eventuais indultos a líderes independentistas cataláns. Segundo o presidente da Xunta e do PP en Galicia, que secundou a mobilización de febreiro de 2019 no mesmo lugar, "isto non vai de dereitas nin de esquerdas" e pregúntase se o Goberno de España vai "facer un indulto cada semana" porque, ao seu xuízo, os líderes soberanistas cometen "un delito continuado". (Na imaxe -© PP-, Feijóo na manifestación de febreiro de 2019)

• HEMEROTECA | Feijóo únese en Madrid á marcha da dereita e carga contra Sánchez por "negociar a soberanía nacional"

A almacenaxe gratuíta de fotografías en Google Photos remata mañá, 1 de xuño. Mallando no Android explica as novas condicións deste popular servizo. (Imaxe: © Google)

O Club Deportivo Lugo logra manter a categoría tras gañar ao Rayo Vallecano por 0-1 na derradeira xornada da Liga e continuará na tempada 2021-22 como único equipo galego na Segunda división masculina. Na imaxe (© CD Lugo), celebración dos xogadores e persoal do club no estadio de Vallecas, tras o encontro que certificou a súa décima campaña en Segunda.

Tomiño e Vila Nova de Cerveira presentan o proxecto definitivo do Parque da Amizade, que será o primeiro parque transfronteirizo da Eurorrexión e incluirá unha nova ponte para o tránsito peonil e ciclista. "O lugar onde máis próximas están as beiras do Miño no seu último treito, onde se miran Espazo Fortaleza de Goián e do Parque do Castelinho, vaise converter nun só parque sen mirar fronteiras", resalta a Deputación de Pontevedra. No acto, ademais da Deputación e dos concellos implicados no proxecto, participaron representantes dos gobernos galego, español e portugués.

• Unha ducia de pontes que superan fronteiras de Galicia

O Diario Oficial de Galicia publica as mudanzas nas restricións da Xunta pola COVID-19 que estarán en vigor dende as 00:00 deste sábado, 29 de maio. Alén dos cambios de nivel de restricións por concellos, inclúe a ampliación dos límites ás reunións de non conviventes a 10 persoas ao aire libre e 6 en espazos interiores, entre outros. O Goberno galego especifica que as medidas xa recibiron o visto e prace do TSXG e o propio Tribunal así o confirma.

• Encontros de ata dez non conviventes no exterior na nova fase da 'desescalada'
• MAPA INTERACTIVO | Restricións da Xunta pola COVID-19 dende o sábado, 29 de maio

Falece aos 83 anos o veterano xornalista José Martínez Couselo. Boa parte da súa ampla traxectoria desenvolveuse no xornal El Correo Gallego, mais tamén dirixiu os servizos informativos de TVE en Galicia, participou nos primeiros anos da TVG, e dirixiu Atlántico Diario e a revista ECO. Exerceu, asemade, como xefe de prensa da Universidade de Santiago, ademais doutras moitas colaboracións con diversos xornais e revistas. (Imaxe: Revista ECO)

A conselleira de Medio Ambiente defende que en Galicia "non se caza o lobo", senón que unicamente se "xestiona" unha especie que non está "en perigo de extinción". Ángeles Vázquez pronunciouse nestes termos durante unha entrevista na TVG ao fío do incremento da protección aos lobos e a restrición á súa caza determinada polo Goberno de España. (Imaxe: ©TVG)

• HEMEROTECA | A Xunta admite que o último censo de lobos en Galicia é de 2015 e encarga outro 
• HEMEROTECA | A Xunta mantén a súa defensa da caza do lobo malia que dende 2013 non se abateu ningún de forma legal en Galicia