A ministra de Turismo di que “Semana Santa pode ser o reinicio das viaxes nacionais se se dan as condicións de seguridade, e é clave acelerar o proceso de vacinación”. Así o dixo Reyes Maroto nunha entrevista en Onda Cero. O mércores o arcebispo de Santiago emitiu un decreto co que suspendeu "todas as procesións e actos confrades” da Semana Santa na vía pública. [Imaxe: Congreso dos Deputados]
A Axencia Europea do Medicamento (EMA) autoriza a administración da vacina de AstraZeneca dende os 18 anos e sen límite de idade. Nos ultimos días expertos alemáns recomendaran non aplicala ás persoas maiores de 65 anos polo escaso número de participantes destas idades nos ensaios clínicos. A EMA recoñece que "a maioría dos participantes nos estudos tiñan entre 18 e 55 anos", pero espera que tamén noutros grupos de idade a vacina sexa eficaz e agarda máis información dos estudos actualmente en curso. Agora a Comisión Europea debe autorizar a súa comercialización, unha decisión que podería ser adoptada esta mesma tarde.
O PP suspende de militancia cautelarmente e abre expediente á alcaldesa de Boimorto por vacinarse contra a COVID. O partido espera que a rexedora "clarifique as circunstancias" da súa vacinación no día de hoxe e cre que as explicacións ofrecidas polo momento son "insuficientes". A formación, respecto a súa posible dimisión, pide ser "cautos". Máis información, hoxe en Praza.gal.
Endesa busca optar a fondos europeos para montar unha planta de hidróxeno nas Pontes cun investimento de máis de 100 millóns. A compañía anuncia o proxecto unha semana despois de decidir o peche definitivo da central térmica da vila.
O Goberno de Portugal prohibe as saídas ao estranxeiro da súa cidadanía agás "casos excepcionais" durante 15 días pola COVID. Así o anunciou o ministro da Administração Interna na Assembleia da República, Eduardo Cabrita sinala que se trata dunha "limitação de deslocações para o exterior nos próximos 15 dias de cidadãos nacionais para proteger os cidadãos nacionais e contribuir a limitação de contágios". Están a contalo a RTP e o xornal Público. O peche da fronteira tivo un forte impacto durante a primeira vaga da pandemia nas localidades da raia galego-portuguesa. Na imaxe, a ponte sobre o Miño entre Tomiño e Cerveira.
A CUT anunciou este xoves a convocatoria de folga xeral de mulleres para o vindeiro 8 de marzo, como vén facendo o sindicato nos últimos anos. O paro convócase baixo o lema “Todas con dereitos, ningunha con medo" e subliñando que “a precariedade salarial imposibilita a independencia das mulleres". Tamén a CIG formalizou a convocatoria de folga para o 8M.
Morre Lord, unha aguia real de 46 anos que era emblema do zoo municipal de Vigo. O Concello lembra que chegou en 1974 como irrecuperable para a vida silvestre tras a espoliación dun niño na Ribeira Sacra e máis que duplicou a esperanza de vida de entre 15 e 20 anos que ten a especie, tempo durante o que axudou á sensibilización ambiental da rapazada que visita o zoo e mesmo á seguridade aérea de Peinador.
Galicia finalizou 2020 cuns 15.100 empregos menos que no remate de 2019 e o total queda en 1,08 millóns. É un dos principais resultados da Enquisa de Poboación Activa do cuarto trimestre, que vén de facerse pública. Reflicte 142.600 persoas en situación de desemprego en Galicia, 3.200 menos que un ano antes.
O Parlamento galego aproba por unanimidade unha declaración institucional en memoria das vítimas do Holocausto, coincidindo co aniversario da liberación do campo de exterminio de Auschwitz por parte das tropas soviéticas. A declaración aprobada por PP, BNG e PSdeG lembra a colaboración "do ditador Francisco Franco co nazismo alemán", que provocou o envío aos campos de concentración nazis de 10.000 republicanos españois, 200 deles galegos
A Plataforma para a Defensa da Cordilleira Cantábrica, que reúne máis dun cento de entidades sociais e ecoloxistas, presenta o vídeo da campaña Aquí Non coa que se reclama a exclusión das áreas de alto valor ambiental da implantación de novos complexos de aeroxeradores. No vídeo participa un gran número de galegos e galegas do ámbito universitario, literario ou musical, como Olga Novo, Manuel Rivas, Uxía, Xurxo Souto ou Xavier Simón.