Fálase

O TSXG avala a adxudicación provisional a dedo das liñas de bus decidida pola Xunta en 2017 mentres remataba a tramitación dos concursos actualmente en marcha para remodelar o servizo en toda Galicia. Tras anular o Tribunal Supremo a prórroga de concesións impulsada en 2009 polo PP, estourou un conflito entre Goberno galego, que decidiu unir as liñas escolares e as regulares para aforrar, e as empresas, que renunciaron a seguir prestando o servizo como xeito de presión e recorreron á xustiza. Agora o TSXG avala aquela decisión da Xunta, superada na práctica polos novos concurso públicos que están a ser adxudicados. 

O Goberno central recorre a condena da Audiencia Nacional que o obriga a indemnizar á familia de José Couso por abandonala fronte aos Estados Unidos. A sentenza estableceu que a muller e os fillos do cámara galego sufriran “omisión de protección diplomática” e outorgoulles unha indemnización de 182.000 euros á que agora se opón o Executivo.

A Deputación Permanente do Parlamento, o órgano que substitúe ao Pleno cando este está disolto pola convocatoria de eleccións, analiza o venres a petición unánime da oposición de que Feijóo dea explicacións polas investigacións a Pemex. O propio Feijóo xa o rexeitou e a maioría absoluta do PP permitiralle non ter que comparecer.

Os grupos de PP e PSdeG no Concello de Catoira presentan unha moción de censura contra o alcalde do BNG e os presidentes provinciais de ambos partidos desautorízana, segundo confirmaron tanto Alfonso Rueda como David Regades. En xuño de 2019, os populares déranlle a alcaldía ao Bloque e a dirección nacionalista tamén desautorizara a alianza. Agora, prevén gobernar en coalición cos socialistas locais e o BNG reclama á dirección do PSdeG que "interveña" para frear a operación.

O cardeal arcebispo de Barcelona, novo presidente da Conferencia Episcopal Española. Juan José Omella, considerado próximo ás teses do Papa Francisco, imponse así sobre as preferencias do sector afín a Rouco Varela, máis conservador. 

PARO REXISTRADO | As persoas rexistradas nas oficinas de emprego de Galicia descenderon en 1.526 en xaneiro, ata 166.229. Son 7.480 menos que hai un ano. No mesmo mes, a afiliación media á Seguridade Social aumentou en 5.848 persoas e queda en 1.012.354 persoas, 15.043 máis que en xaneiro de 2019. Consulta aquí a información

VÍDEO | Así se consolidou o cinema na Galicia dos anos 20 de hai cen anos. Descubrímolo nun novo capítulo d'Os 20 do XX, a serie de Antón Varela en VINTE. Podes ver o episodio íntegro aquí

O pleno de Santiago aproba os Orzamentos de 2020 cos votos a prol do PSdeG e a abstención de Compostela Aberta. As contas do consistorio compostelán roldan os 117 millóns de euros.

5A | A alcaldesa de Mondoñedo, Elena Candia, fai oficial a súa dimisión para encabezar a lista do PP por Lugo. Candia, que tamén renuncia ao escano na Deputación lucense, é substituída en funcións polo edil Ángel Otero, que se perfila como novo alcalde.

A circulación de trens está interrompida entre Monforte e León pola caída da catenaria nas proximidades da segunda cidade. A avaría produciuse na madrugada deste luns e Renfe está a habilitar un dispositivo de autobuses alternativos.