Fálase

Zaragoza albergará a Axencia Estatal de Saúde Pública á que aspiraba Lugo. Pedro Sánchez confirma, no seu balance do 'curso político', que a proposta aragonesa foi a gañadora dun proceso no que tamén concorrían Barcelona, Toledo, Granada, Murcia, León e Oviedo. A candidatura galega principiara co goberno municipal lucense previo á moción de censura, foi herdada polo actual gabinete municipal e recibiu diversos apoios, entre eles da Xunta e do Parlamento. Na imaxe, detalle do edificio do Pazo de Feiras e Congresos lucense, que a cidade propuña para acoller a AESAP. [CC BY-SA RodrigoRega]

Catro dos cinco edís do goberno do PSdeG en Carballeda de Avia desmárcanse da posible fusión con Ribadavia que o alcalde, o tamén socialista Luis Milla, admitiu explorar canda o seu homólogo ribadaviense, o popular César Fernández. Nun comunicado conxunto Noemí Alonso, Daniel González Javier Rodríguez e Jesús Alonso aseguran non "compartir" que "a desaparición do noso concello mediante unha fusión sexa a mellor resposta" para os "desafíos" pola perda e envellecemento da poboación e piden "explorar outras fórmulas" para "compartir servizos" ou "mellorar a xestión". "Rexeitamos este proxecto de fusión e non apoiaremos a súa aprobación", advirten.

• A posible fusión de concellos do Avia, allea ás sete que estudou a Xunta

Morre a balea varada na praia de Sabón, en Arteixo. Salvamento Marítimo, servizos de emerxencias ou o Cemma traballaron desde esta mañá para devolver ao mar un animal de entre dez e doce metros. Unha vez mar adentro, o cetáceo afundiu e expertos de Cemma cren que puido ser atopado xa sen vida a primeiras horas do día. 

Alerta amarela por unha nova vaga de calor no litoral pontevedrés e en boa parte do interior de Ourense e do sur de Lugo. A Aemet advirte de risco importante por altas temperaturas na comarca do Ribeiro e na área da capital ourensá, con temperaturas que roldan os 40 graos. 

A Unesco debate a candidatura da Ribeira Sacra como Patrimonio da Humanidade no medio dunha gran división que obrigou a adiar a votación definitiva. A sesión do Comité de Patrimonio Mundial celébrase en Busan (Corea do Sur).

• AMPLIAMOS 👉 A Unesco pide máis información antes de decidir se a Ribeira Sacra é Patrimonio da Humanidade
• Nin mosteiros en 2021, nin paisaxe acuática en 2026: a Unesco segue sen ver valor universal na Ribeira Sacra

A Xunta activa alerta vermella por calor no interior de Pontevedra e amarela no noroeste da Coruña. Meteogalicia informa que a partir deste domingo as altas presións localizáranse ao norte da península ibérica, achegando unha masa de aire cálido procedente do norte de África. Isto fará que as temperaturas vaian ascendendo, sendo especialmente altas entre luns e mércores. Así mesmo, infórmase que a Secretaria Xeral para o Deporte suspende a actividade deportiva federada no exterior, das 12 ás 20 horas, na zona interior de Pontevedra. Os municipios afectados son: Agolada, Campo Lameiro, Caniza, A, Cerdedo Cotobade, Covelo, Cuntis, Dozón, Estrada, A, Forcarei, Fornelos de Montes, Lalín, Lama, A, Moraña, Rodeiro, Silleda, Vila de Cruces.

Os incendios protagonizan a Ofrenda ao Apóstolo na Catedral de Santiago este 25 de xullo. Tanto o presidente do Parlamento galego, Miguel Santalices, que exerceu como delegado rexio, como o arcebispo de Santiago, Frascisco Prieto, tiveron presentes ás persoas afectadas polos incendios das últimas semanas durante as súas intervencións na tradicional misa de ofrenda ao Apóstolo celebrada este sábado.

Hoxe é o Día Nacional de Galicia e a portada de Praza está en galego. E todas as informacións.

👅 ✅ Mañá? Tamén, claro

🤗 Faite de Praza dende 5€/mes

🔗 https://praza.gal/faitedepraza

↪️ Ata o 80% devólvencho na declaración da renda

🔗https://praza.gal/axuda/desgravacion-de-doazons

Rueda defende as "identidades mestizas" na entrega das Medallas de Galicia a catro mulleres representantes da emigración galega: Claudia Álvarez, Carla Angola, Camila Fernández e Beatriz Gil. O presidente di que "igual que hai galegos de Düsseldorf" tamén hai "peruanos de Lugo que viven con dúas almas. Rueda tamén defende o "sentidiño" galego "nun concerto internacional tan marcado por bravuconadas".

• HEMEROTECA | A Xunta deu a Medalla de Galicia á princesa Leonor sen ponderar os seus méritos
• HEMEROTECA | Bos e xenerosos que xa non terán a Medalla de Galicia

O TSXG anula tres artigos da Ordenanza de Mobilidade Sostible da Coruña por "discriminar os VTC fronte ao taxi". En resposta a unha demanda da empresa Enol Mobility contra o Concello e unha asociación de taxistas, o alto tribunal galego considera que as normas implican "un monopolio de facto a favor do taxi" o cal "conculca a libre competencia" que marca a lei. Frea así a "prohibición total e indefinida de arrendamento de vehículos con condutor ata a aprobación dunha ordenanza específica futura" e, entre outros, o veto a operaren na zona de baixas emisións da cidade. Contra o ditame cabe recurso ante o Supremo.

• HEMEROTECA | Os coches de Uber expóñense a multas de ata 6.000 euros por operar sen autorización en Vigo e na Coruña
• HEMEROTECA | Uber desembarca en Vigo e na Coruña e abre unha fronte de conflito co sector do taxi
• HEMEROTECA | O número de taxis en Galicia segue en caída libre, sobre todo fóra das cidades