Ten lugar nestes momentos en Estocolmo a cerimonia de entrega dos Premios Nobel de Física (Pierre Agostini, Ferenc Krausz e Anne L'Huillier), Química (Moungi Bawendi, Louis E. Brus e Alexey Ekimov), Medicina (Katalin Karikó e Drew Weissman), Economía (Claudia Goldin) e Literatura (Jon Fosse). Fosse escribe en nynorsk, unha das dúas normas oficiais do idioma noruegués, pero a menos usada pola poboación, con menos dun 15% de falantes fronte ao hexemónico bokmål.
Israel acabou coa vida de máis de 17.700 persoas en Gaza dende o pasado 7 de outubro, con preto de 50 mil feridos e feridas, segundo os datos feitos públicos este sábado polo Ministerio de Saúde de Palestina, considerados fiables polas institucións internacionais
Carlos Callón, Xosé Luís Veiras Manteiga e o Centro Arqueóloxico do Barbanza, galardoados nos XVII Premios Barbantia da Cultura, organizados pola A. C. Barbantia. Os galardóns entregaranse o vindeiro 16 de decembro nunha gala na Casa da Cultura do concello de Lousame
Traballadores de Vitrasa volven saír á rúa para reclamar melloras no convenio. En folga indefinida desde o pasado 25 de novembro, o cadro de persoal da concesionaria do transporte urbano de Vigo insta á empresa e Concello a chegar a un acordo que lles permita, por exemplo, actualizar os seus salarios, conxelados desde 2020 cando caducou o convenio.
[Foto: CIG]
O Diario Oficial de Galicia publica a Oferta de Emprego Público do Sergas con máis de 1.200 prazas. A OPE de 2023 contempla 168 prazas de persoal licenciado sanitario, 958 de diplomado sanitario e de formación profesional e 81 de xestión e servizos.
7,2 toneladas de cocaína intervidas nunha operación policial nun polígono de Cambre. A cantidade é unha das máis importantes dos últimos anos a nivel estatal e máis que duplica a atopada hai catro anos a bordo dun narcosubmarino en Aldán.
Sumar Galicia paraliza as conversas con Podemos Galicia logo da ruptura do grupo no Congreso. "Queremos saber se Podemos Galicia quere construír Sumar Galicia con nós ou non", explican fontes do movemento de esquerda a Europa Press respecto das negociacións para unha candidatura conxunta ás futuras eleccións galegas.
Fandicosta presenta un ERTE que afectará 111 postos de traballo en Domaio. O sindicatos CC OO, UXT e CIG explican nun comunicado que a decisión "unilateral" da pesqueira participada pola Xunta repercute máis do 50% do cadro de persoal ata xuño de 2024.
Podemos rompe con Sumar e decide pasar ao grupo mixto no Congreso. Así o adiantou Diario Red, que asegura que o punto de inflexión para o partido morado foi a "negativa de Sumar a que Podemos poida intervir na comparecencia de Albares sobre Palestina". A formación compartirá agora grupo co BNG e co seu único representante, Néstor Rego.
Feijóo premia a Baltar coa presidencia dunha comisión no Senado, o que supón cobrar máis, malia a súa causa penal pendente por conducir a 215 por hora un coche oficial. Europa Press publica na súa web que o popular ourensán presidirá a comisión de Despoboación e Reto Demográfico. Tras a súa saída da Deputación de Ourense, Baltar é senador por designación autonómica a proposta do PPdeG de Alfonso Rueda e agora logra un posto destacado na Cámara Alta grazas ao PP estatal de Feijóo.
