Fálase

SOS Sanidade Pública concéntrase en diferentes puntos do país para sumar apoios á Iniciativa Lexislativa Popular que levarán ao Parlamento con medidas "para revitalizar e fortalecer os mecanismos sanitarios de atención primaria". "Reivindicamos  un novo modelo de atención primaria que responda ás necesidades da poboación, dotado dos recursos necesarios para atender os problemas e demandas de saúde da poboación, baseado na promoción, prevención, participación social e traballo comunitario", salientan no manifesto. [Fotografía da concentración en Compostela CC-BY-SA BNG Santiago]

• Máis facilidades ao persoal médico que vai á privada e menos centros de saúde, opcións da Xunta para frear a protesta sanitaria
• SOS Sanidade Pública incrementa as mobilizacións polos problemas nos centros de saúde e nos PAC de todo o país

O vicepresidente segundo da Xunta, Diego Calvo, entrega unha medalla ao seu director xeral de Emerxencias, Santiago Villanueva, pola súa “especial dedicación nos incendios forestais do pasado verán".

• A Xunta condecora o seu director xeral de Emerxencias por participar na evacuación dun cámping no incendio do Barbanza do pasado verán

A Audiencia de Pontevedra condena o alcalde pedáneo de Bembrive, en Vigo, do PSdeG, por prevaricación ao adxudicar contratos para a festa da sidra. O tribunal di que contratou a dedo a sidra por 120.000 euros en 2019 e 130.000 en 2020 cunha “omisión reiterada, voluntaria e deliberada das normas administrativas”. [Imaxe: Concello de Vigo]

Slipknot, Pantera e Ghost encabezan o cartel do Resurrection Fest Estrella Galicia, que se celebrará en Viveiro entre o 28 de xuño e o 1 de xullo de 2023. O festival anunciou esta mañá as primeiras 80 bandas da súa programación. Papa Roach, Architects, Alter Bridge, Powerwolf,  Behemoth, The Ghost Inside, Fever 333, Motionless In White e Lacuna Coil actuarán tamén no escenario principal do evento.

A ministra de Igualdade acusa o PP de "promover a cultura da violación que pon en cuestión a credibilidade das vítimas" con campañas como a da Xunta polo 25N. Irene Montero respondía unha pregunta dos populares sobre a lei de liberdade sexual e foi reprendida pola presidenta do Congreso, Meritxell Batet (PSOE) por utilizar esa expresión mentres Jaime de Olano, deputado do PP por Lugo, a acusaba de "estar chamándonos violadores".

• Colectivos feministas e oposición lamentan a campaña da Xunta polo 25N: "Non somos nós as responsables da violencia"
• ONU - MULLERES | Dezaseis maneiras de enfrontarte á cultura da violación

O Chanfaina Lab, galardoado co XI Premio Especial José Sellier, que concede a Academia Galega do Audiovisual. Este proxecto de creación colectiva leva celebrándose en San Sadurniño dende o ano 2014. Durante unha fin de semana realizadores e realizadoras de toda Galicia xúntanse para elaborar unha peza audiovisual coas xentes, historias e paisaxes deste concello, ao que regresan para presentar os traballos.

• O Chanfainalab, un "revolto de cousas diversas" que retrata San Sadurniño coas ferramentas do audiovisual
• "O Chanfaina Lab consegue empoderar a xente do rural"

O Tribunal Superior de Xustiza anula a instrución coa que o Sergas permitiu que o persoal de farmacia de Atención Primaria renove receitas de medicamentos. En resposta a un recurso do Consello Galego de Colexios Médicos, o TSXG conclúe que a Xunta "vulnerou de forma clara e flagrante as funcións" que a lei atribúe a este persoal e desbota que tomase a medida por razóns ligadas á pandemia da COVID, como fixera anteriormente. "Non consta informe, estudo, memoria ou proposta ningunha que avale a necesidade do contido" esta instrución, conclúe. Na imaxe, o conselleiro de Sanidade e a xerente do Sergas, nunha reunión con persoal de farmacia de Atención Primaria, o pasado xullo.

• HEMEROTECA | "O plan da Xunta para a Atención Primaria pode crear máis sobrecarga; hai que buscar solucións, non parches"

Xusto Ordóñez será o candidato do BNG á alcaldía de Rianxo en substitución de Adolfo Muíños, alcalde da vila dende 2011. A formación anunciou a remuda nun acto con Ana Pontón, quen sinala a Muíños como "exemplo de honestidade e boa xestión". O aínda rexedor, que continuará no cargo ata a fin do mandato, sinala que valorou a decisión "un longo tempo e por razóns persoais decido rematar, pero como militante do BNG seguirei traballando para que, agora con Tito, sigamos tendo a máxima responsabilidade de goberno en Rianxo tras as próximas eleccións municipais"

Deteñen un home polo asasinato a coiteladas de Cristina Cabo, a muller achada sen vida na súa casa de Lugo, segundo ratificou o voceiro da Policía Nacional na cidade, Manuel Arias, en declaracións á TVG. "Non se poden dar máis detalles a respecto deste detido, pero para garantía dos cidadáns e da familia, dicimos que hai unha persoa detida", sinala mentres continúan as pescudas sobre o crime.

O Parlamento homenaxea a Carlos Casares no vixésimo aniversario do seu pasamento. O escritor foi deputado na primeira lexislatura polo PSdeG e, na súa lembranza, a Cámara acolleu unha xornada que incluíu unha mesa redonda coa participación de ex-deputados de diversos grupos (na imaxe), algúns deles membros do lexislativo galego na etapa de Casares: Pilar García Negro, Miguel Barros, Francisco Vázquez, Xosé Luis Barreiro Rivas e Mariano Rajoy. O actual presidente do Parlamento, Miguel Santalices, destacou que para a institución "é unha honra que dúas das figuras homenaxeadas no Día das Letras fosen no seu momento deputados", sinala en referencia a Casares e a Ramón Piñeiro, igualmente deputado do PSdeG tras concorrer aos comicios como independente dentro das súas listas.

• HEMEROTECA | “Carlos Casares non só deixou orfos os seus fillos, tamén a cultura galega”
• HEMEROTECA | 19/12/1981 | Galicia constitúe o seu primeiro Parlamento para "devolvernos a confianza en nós mesmos"