O Consello Interterritorial de Saúde aproba as restricións para rebrotes da COVID-19 en cidades de máis de 100.000 habitantes promovidas polo Ministerio de Sanidade tras as negociacións coa Comunidad de Madrid, que votou en contra. Tamén a Xunta optou polo "non" por ver a proposta "incompleta" e sen "avais técnicos" para "adaptala á situación epidemiolóxica galega". Polo momento, todas as localidades que cumpren as condicións para a imposición desas medidas reforzadas están na propia comunidade madrileña.
Fálase
Falece aos 88 anos o debuxante arxentino Joaquín Salvador Lavado, Quino, coñecido mundialmente por ser o creador de Mafalda, pero tamén autor doutros moitos personaxes e obras. Imaxe divulgada nas redes sociais oficiais de Quino.
O Concello da Coruña permite aos pubs da cidade mudar "temporalmente" a súa licenza (tipo II) por outra de cafetaría, bar ou café-bar (tipo I) para "paliar os efectos do peche do lecer nocturno" por mor da COVID-19. "Existen moitas familias na cidade que viven destes negocios que levan pechados meses polas restricións autonómicas e debemos facer algo para axudalos", sinala a alcaldesa, Inés Rey, sobre unha medida que durará, polo momento, ata o 31 de xaneiro. (Na imaxe, terrazas na rúa Santo André da cidade, durante a peonalización parcial que está a aplicar o consistorio).
Berta Dávila gaña o XIV Premio Repsol de Narrativa Breve coa obra 'Illa decepción', que publicará Galaxia. A autora vén de ser distinguida co Premio da Crítica na súa modalidade de narrativa por 'Carrusel'
Os festivos en Galicia en 2021 xa son oficiais coa súa publicación no DOG este mércores. Entre eles non está o 25 de xullo por coincidir en domingo nin San Xoán, pero si San Xosé. Os concellos poden elixir outros dous días como festivos locais.
O instituto Carballo Calero de Ferrol pasa a chamarse Carvalho Calero. A Consellería de Cultura e Educación fai oficial no DOG o cambio de denominación do xa IES Ricardo Carvalho Calero, en liña coa escrita do seu propio nome elixida polo homenaxeado coas Letras Galegas deste ano.
Forte tensión entre Donald Trump e Joe Biden no primeiro e agre debate previo ás eleccións presidenciais estadounidenses do vindeiro novembro. O encontro, amplamente seguido a través das redes sociais, pódese volver ver integramente nesta ligazón.
O Goberno central pacta coa Comunidade de Madrid aplicar criterios homoxéneos nas cidades de máis de 100.000 habitantes de todo o Estado para impoñer novas medidas para frear o coronavirus. As restricións endureceranse neses lugares se a incidencia acumulada en 14 días supera os 500 casos por cada 100.000 habitantes, a taxa de positividade é superior ao 10% e a ocupación de UCI é máis do 35% en toda a comunidade autónoma. Entre as cidades galegas, tan só Pontevedra (que non chega aos 100.000 habitantes) se aproxima a unha incidencia de 500 casos, pero a taxa de positividade en Galicia é do 5,7% e a porcentaxe de camas ocupadas en UCI é do 4%. A proposta debaterase no Consello Interterritorial de Sanidade que se celebra este mércores.
Euskaltel ratifica a incorporación ao seu consello de administración de Beatriz Mato, ex-conselleira de Traballo e de Medio Ambiente e antiga candidata do PP á alcaldía da Coruña. Antes de incorporarse á compañía vasca, matriz de R, xa era directiva dende febreiro da enerxética Greenalia. Nun comunicado, a empresa de telecomunicacións destaca dela a súa "ampla traxectoria no sector da consultoría especializada" e de "sistemas de calidade"; así como a súa "dilatada experiencia na xestión pública como conselleira do Goberno autonómico de Galicia".
Persoal de Alcoa San Cibrao e compañías auxiliares mobilízase na contorna da factoría mariñá, cortando os seus accesos, tras constatar o bloqueo da multinacional á venda do complexo industrial a Liberty House, operación apoiada polos gobernos español e galego.