Fálase

O Concello da Coruña permite aos pubs da cidade mudar "temporalmente" a súa licenza (tipo II) por outra de cafetaría, bar ou café-bar (tipo I) para "paliar os efectos do peche do lecer nocturno" por mor da COVID-19. "Existen moitas familias na cidade que viven destes negocios que levan pechados meses polas restricións autonómicas e debemos facer algo para axudalos", sinala a alcaldesa, Inés Rey, sobre unha medida que durará, polo momento, ata o 31 de xaneiro. (Na imaxe, terrazas na rúa Santo André da cidade, durante a peonalización parcial que está a aplicar o consistorio).

Berta Dávila gaña o XIV Premio Repsol de Narrativa Breve coa obra 'Illa decepción', que publicará Galaxia. A autora vén de ser distinguida co Premio da Crítica na súa modalidade de narrativa por 'Carrusel'

• HEMEROTECA | Berta Dávila: "A doenza pode ser tan hereditaria como a culpa ou a literatura"

Os festivos en Galicia en 2021 xa son oficiais coa súa publicación no DOG este mércores. Entre eles non está o 25 de xullo por coincidir en domingo nin San Xoán, pero si San Xosé. Os concellos poden elixir outros dous días como festivos locais.

O instituto Carballo Calero de Ferrol pasa a chamarse Carvalho Calero. A Consellería de Cultura e Educación fai oficial no DOG o cambio de denominación do xa IES Ricardo Carvalho Calero, en liña coa escrita do seu propio nome elixida polo homenaxeado coas Letras Galegas deste ano.

Forte tensión entre Donald Trump e Joe Biden no primeiro e agre debate previo ás eleccións presidenciais estadounidenses do vindeiro novembro. O encontro, amplamente seguido a través das redes sociais, pódese volver ver integramente nesta ligazón.

O Goberno central pacta coa Comunidade de Madrid aplicar criterios homoxéneos nas cidades de máis de 100.000 habitantes de todo o Estado para impoñer novas medidas para frear o coronavirus. As restricións endureceranse neses lugares se a incidencia acumulada en 14 días supera os 500 casos por cada 100.000 habitantes, a taxa de positividade é superior ao 10% e a ocupación de UCI é máis do 35% en toda a comunidade autónoma. Entre as cidades galegas, tan só Pontevedra (que non chega aos 100.000 habitantes) se aproxima a unha incidencia de 500 casos, pero a taxa de positividade en Galicia é do 5,7% e a porcentaxe de camas ocupadas en UCI é do 4%. A proposta debaterase no Consello Interterritorial de Sanidade que se celebra este mércores.

• AMPLIAMOS | As novas regras da pandemia pactadas con Madrid atinxen (sobre o papel) a Vigo, A Coruña e Ourense

Euskaltel ratifica a incorporación ao seu consello de administración de Beatriz Mato, ex-conselleira de Traballo e de Medio Ambiente e antiga candidata do PP á alcaldía da Coruña. Antes de incorporarse á compañía vasca, matriz de R, xa era directiva dende febreiro da enerxética Greenalia. Nun comunicado, a empresa de telecomunicacións destaca dela a súa "ampla traxectoria no sector da consultoría especializada" e de "sistemas de calidade"; así como a súa "dilatada experiencia na xestión pública como conselleira do Goberno autonómico de Galicia".

Persoal de Alcoa San Cibrao e compañías auxiliares mobilízase na contorna da factoría mariñá, cortando os seus accesos, tras constatar o bloqueo da multinacional á venda do complexo industrial a Liberty House, operación apoiada polos gobernos español e galego.

• O persoal de Alcoa impide a saída de aluminio da Mariña e irá á folga desde este domingo

A Audiencia Nacional absolve a todos os acusados de estafa pola saída a Bolsa de Bankia, entre eles ao ex-ministro Rodrigo Rato, na altura presidente da entidade. A sentenza destaca que o Banco de España e demais supervisores deron o visto e prace á operación. O propio Banco de España dá por perdidos uns 14.000 millóns de euros do rescate público de Bankia.

• HEMEROTECA | Os gastos coas 'tarxetas black' dos galegos de Caja Madrid: Do San Froilán e Sargadelos a Women's Secret

Joaquim Torra chama a converter nun "plebiscito" as vindeiras eleccións catalás tras ratificar o Tribunal Supremo a súa inhabilitación como presidente da Generalitat por non retirar de instalacións públicas en período electoral pancartas a prol dos líderes soberanistas encarcerados. Diversas informacións a apuntan a febreiro como posible mes para a celebración deses comicios. (Imaxe divulgada por Torra nas redes sociais)