Fálase

O DOG publica os resultados oficiais do 18F e a relación de deputadas e deputados proclamados electos.

O Consello de Ministros autoriza a obra que conectará a alta velocidade galega coa do norte da Península sen pasar por Madrid. A actuación, de 8,2 quilómetros e 38,4 millóns, permitirá unir en Olmedo (Valladolid) a liña Galicia-Madrid coa que vai a Valladolid e desde alí a Asturias ou Euskadi.

• HEMEROTECA (2022) | Un pequeno treito para Galicia, un gran paso para superar o deseño radial do AVE: Adif comeza a redactar o ‘bypass’ de Olmedo

Facebook e Instagram sofren unha caída xeneralizada en todo o mundo. As redes sociais de Meta impiden o acceso ao servizo sen que polo momento a empresa indicase a causa. [Imaxe: Dawid Sokołowski / Unsplash]

Wael Al Dahdouh, Pablo González, Nilufar Hamedi e Elahe Mohammadi e Fran Sevilla, candidaturas do Premio Couso, organizado polo Colexio Profesional de Xornalistas de Galicia e o Club de Prensa de Ferrol, que chega á súa vixésima edición.

• O xornalista lucense Marcos Méndez gaña o XIX Premio José Couso pola súa cobertura da guerra de Ucraína dende o terreo

Falece o mestre e escritor vigués Alfonso Álvarez Cáccamo aos 71 anos. Profesor no CPI de Panxón (Nigrán) ata que se xubilou no ano 2011, Álvarez Cáccamo publicou unha extensa obra narrativa e tamén poesía, así como numerosos artigos en prensa. Recibiu o Premio Xerais de Novela en 1990 por As baleas de Eduardo Reinoso, o premio Café de Catro a Catro de Novela por Peito de vimbio, ou o galardón Manuel García Barros de Novela pola obra O Espírito de Broustenac, entre outros recoñecementos. [Fotografía de arquivo de Edicións Xerais de Galicia]

PARO REXISTRADO| As inscricións nas oficinas de emprego diminuíron un 0,40% en Galicia durante o mes de febreiro (-518 persoas) e quedan en 130.583, isto é, 13.509 menos que hai un ano (-9,38%, máis de tres puntos por riba da media estatal, que foi do -5,17%) e outra volta a cifra máis baixa da serie histórica. No mesmo mes, a afiliación media á Seguridade Social aumentou en Galicia en case 4.500 persoas (+0,43%) e chega aos 1,06 millóns de cotizantes, 19.194 máis que no mesmo mes de 2023 (+1,85% e na media estatal, +2,67%).

• AMPLIAMOS 👉 Paro e emprego acadan cifras históricas con tres de cada catro contratos no sector servizos

A conselleira Ángeles Vázquez insiste en que a Xunta non aplicará "de oficio" a lei para limitar os prezos dos alugueiros pero asegura que "estudará as solicitudes que cheguen dos concellos". A conselleira de Medio Ambiente, Territorio e Vivenda insistiu nunha entrevista na Radio Galega no dito esta mesma semana polo presidente Rueda, que responsabilizou os municipios.

• Rueda rexeita "aplicar de oficio" a lei para limitar os alugueiros e responsabiliza os concellos

Ana Peleteiro, medalla de bronce no Mundial de atletismo en pista cuberta que se celebra en Glasgow. A galega, tras dous anos fóra da competición de triplo salto e despois de ser nai, regresa cun novo éxito logo do bronce nos últimos Xogos Olímpicos e na mesma pista onde se proclamara campioa de Europa en 2019. Acabou terceira cun salto de 14,75 metros. Imaxe: RFEA. 

Varios ríos e rías en Galicia en vixilancia por risco de inundacións e circulación complicada na A-6 pola neve durante un novo temporal en Galicia. 

Detido un veciño de Mesía acusado de agredir sexualmente empregadas e captar inmigrantes para prostíbulos. Anunciábase nunha web ofrecendo traballos de camareira, limpadora ou persoal para obras e reformas.