Fálase

A Xunta incorpora Laza aos concellos co nivel máximo de restricións pola COVID-19, no que seguen Vilanova de Arousa e Cualedro e do que sae Carballeda de Valdeorras. Dende o luns, 3 de maio, máis dunha vintena de municipios cambian de nivel de restricións. Segundo informa Sanidade, estarán no nivel alto Petín, A Merca, A Pastoriza,Mesía, Ribeira, Padrón, Marín, O Grove, Meaño, Cambados, Salceda de Caselas, Gondomar, Ponteareas e Coristanco. Sitúa no nivel medio a Muíños, Verea, O Barco de Valdeorras, Cartelle, Lobios, Verín, Xinzo de Limia, Allariz, Carballeda de Valdeorras, Meira, Chantada, Rianxo, A Pobra do Caramiñal, Melide, Carnota, Ordes, Lalín, Silleda, Ribadumia, Poio, Vilagarcía de Arousa, Cangas, Nigrán, O Porriño, Tui, Vigo, A Laracha, Betanzos, Cambre, Carballo e Ares. Nos demais, rexe o nivel baixo. 

• AMPLIAMOS 👉 A COVID segue estable en Galicia malia aos novos focos locais que propician máis restricións da Xunta
• MAPA INTERACTIVO | Restricións da Xunta pola COVID-19 dende o luns, 3 de maio

A ex-conselleira de Traballo e de Medio Ambiente Beatriz Mato incorpórase á directiva da patronal galega do sector do metal, Asime, en representación da enerxética Greenalia, á que se incorporou en febreiro de 2020, dous meses despois de abandonar o liderado do PP da Coruña. Así o aprobou a entidade na súa asemblea, celebrada este xoves en Vigo. Mato tamén é directiva en Euskaltel. Na imaxe, nun acto con representantes de Asime como conselleira de Traballo en 2014.

Paloma de Toro, Luca Chao e María Cabaleiro Alfaya son as gañadoras do IV Concurso de microrrelatos convocado pola Real Academia Galega e PuntoGal. No certame participaron máis de 800 textos que non debían superar as 200 palabras e que competían por unha serie de premios de carácter tecnolóxico. A participación total (1.500 textos sumados os da categoría xuvenil) duplicou á do pasado ano.

O alcalde de Ponteareas, Xosé Represas, deixa o cargo por motivos de saúde tras converter hai dous anos ao BNG na forza máis votada na vila. Nas últimas semanas xa viña exercendo en funcións a tenente de alcalde, Cristina Fernández. [Imaxe: BNG]

• HEMEROTECA | Ponteareas: De alcalde franquista á consolidación do BNG en 20 anos

O primeiro ministro portugués, António Costa, confirma a reapertura das fronteiras terrestres dende as 00:00 deste sábado, 1 de maio, no marco do novo plan de desconfinamento do país veciño. Concellos da raia veñen reclamando dende hai semanas a reapertura, especialmente para o persoal que vive en Galicia e traballa en Portugal (e viceversa). Galicia, non obstante, continúa polo momento -e, cando menos ata o día 9- baixo peche perimetral, pero as actividades permitidas, caso da laboral, veranse facilitadas con esta nova medida do Executivo portugués.

Feijóo acusa á esquerda de "utilizar á empresa pública Correos" para "mobilizar" o electorado na campaña electoral madrileña cos casos de envíos de balas en cartas ameazantes. O presidente da Xunta considera "incrible" que a empresa pública non detectase os envíos de balas e dunha navalla a cargos políticos como o ministro do Interior, a directora da Garda Civil, o líder de Podemos ou a presidenta de Madrid. Argumenta que a compañía, que el mesmo dirixiu no Goberno de Aznar (2000-2003) ten capacidade para detectar envíos con ántrax, polo que tamén a ten para frear sobres con balas antes de que cheguen ao seu destino.

Concellos da raia agrupados na AECT Rio Minho instalan unha faixa na Ponte da Amizade Tomiño-Cerveira para reclamaren a reapertura da fronteira, que segue pechada polas restricións da COVID-19 malia á fin do estado de emerxencia en Portugal. Os municipios reclaman ademais seren compensados mediante os fondos europeos de recuperación. "Levamos tres meses de ruína", sinala Uxío Benítez, vicedirector da AECT e deputado do goberno na Deputación de Pontevedra.

• HEMEROTECA | Madrid e Lisboa habilitan novos pasos fronteirizos temporais pero manteñen só Tui e Verín como permanentes
• HEMEROTECA | Concellos galegos e portugueses mobilízanse na raia contra o "castigo" ao persoal transfronteirizo co novo peche pola COVID

O xulgado concede un mes aos herdeiros de Franco para retirar "cousas, bens ou obxectos" do Pazo de Meirás agás as que "se atopen nel por ser colocadas polo Estado tras tomar posesión do inmoble". Máis información, esta mañá en Praza.gal

• HEMEROTECA | Os Franco vólvense beneficiar no xulgado de décadas de desleixo oficial sobre os bens do ditador
• HEMEROTECA | O inventario do Pazo de Meirás inclúe 700 bens, entre eles as esculturas do Mestre Mateo

EPA | Galicia perdeu uns 21.100 empregos no primeiro trimestre do ano e a poboación ocupada queda en 1,06 millóns de persoas, segundo a Enquisa de Poboación Activa, que vén de publicarse. Son 23.200 empregos menos que hai un ano. No mesmo trimestre, a poboación en desemprego aumentou en 15.700 persoas, ata as 158.300, isto é, unhas 1.500 máis que doce meses antes. 

• AMPLIAMOS 👉 A COVID deixa en Galicia 60.000 persoas sen traballo ou en ERTE nun ano e agrava a crise industrial

Alumnado do colexio Sagrado Corazón de Pontevedra está a realizar unha serie de vídeos que, co título de Dígocho a ti, debullan distintos temas relacionados coa lingua galega (vocabulario, normas gramaticais...), tomando como referencia o espazo Dígocho eu da CRTVG. A primeira peza destacou que no galego hai máis de cen palabras relacionadas coa chuvia e a segunda afondou tamén en cuestións meteorolóxicas. Na última edición de 21 días co galego  os centros participantes tamén levaron a cabo vídeos co formato de Dígocho eu