O 6 de agosto de 1945, os Estados Unidos lanzan a bomba atómica contra a cidade xaponesa de Hiroshima
O ex-director de Pemex que apadriñou os negocios da petroleira en Galicia é imputado por "uso de recursos de procedencia ilícita, asociación delituosa e suborno" no marco do caso Odebrecht, considerado o principal caso de corrupción de América Latina. Emilio Lozoya, que pactou coa Fiscalía mexicana tras a súa detención en España, continuará en liberdade condicional, aínda que cunha pulseira telemática de control e coa prohibición de abandonar Ciudad de México.
O incendio declarado en Cualedro no mediodía deste mércores rolda xa as 1.000 hectáreas queimadas, parte delas agrícolas, segundo a información notificada pola Consellaría de Medio Rural. Máis información, neste espazo de Praza.gal Imaxe: @briftabuyo
A Xunta aplica a 'situación 2' nun incendio forestal activo iniciado este mediodía no concello de Cualedro, na parroquia de San Millao. O lume arrasou xa 60 hectáreas de terreo e está próximo ao núcleo habitado de San Cristovo, pertencente a Monterrei. Están a traballar na súa extinción 1 técnico, 5 axentes, 15 brigadas, 5 motobombas, 2 pas, 11 helicópteros e 11 avións.
Vox anuncia que presentará en setembro unha moción de censura contra o Goberno de Pedro Sánchez. Na súa intervención ante o pleno do Congreso, Santiago Abascal convida os grupos da oposición a unirse á súa iniciativa.
A Xunta Xeral de Accionistas do Deportivo da Coruña aproba as ampliacións de capital que converten a Abanca en principal accionista do club, do que pasa a controlar o 78% das accións. (Imaxe: RC Deportivo)
A Xunta Electoral de Galicia publica no DOG os resultados definitivos das eleccións galegas do 12X, unha vez realizado o escrutinio oficial nas Xuntas Electorais provinciais, tanto do voto nas urnas como do emitido por correo, incluíndo o chegado do estranxeiro. Detalla tamén os nomes das deputadas e deputados electos para o Parlamento da XI Lexislatura, que se constitúe o 7 de agosto.
A xuíza de vixilancia penitenciaria atende a petición da Fiscalía e suspende o terceiro grao para cinco dos líderes independentistas cataláns encarcerados, que terán que deixar de saír a traballar e se ven abocados a un réxime máis duro.
Feijóo di ser partidario de aplicar "unha especie de pasaporte COVID" ou "algún elemento sanitario" para "facilitar o movemento" no espazo Schengen das persoas que non estean contaxiadas do coronavirus. O presidente en funcións e candidato á reelección non aclara durante canto tempo debera, na súa opinión, ter validez un documento coma ese para que "non circulen as persoas infectadas" pero si "as sas". Son declaracións que recolle a TVG. Na imaxe, Feijóo este martes visitando un campamento en Sada.(Foto: Ana Varela)
EPA | En Galicia destruíronse 32.600 postos de traballo durante o segundo trimestre do ano e as persoas con emprego son 48.400 menos que hai un ano, segundo a Enquisa de Poboación Activa que vén de ser publicada. Nese trimestre, o paro diminuíu en 14.300 persoas a respecto do trimestre anterior, pero o total, 142.500, supera en 2.100 o dato do mesmo trimestre de 2019. O dato do paro está influído pola posibilidade de buscar emprego, limitada por mor da pandemia. Ampliamos a información neste espazo
A Xunta Xeral do Deportivo da Coruña aborda este martes en sesión extraordinaria operacións financeiras que, de saíren aprobadas, ratificarán a Abanca como máximo accionista do club. A transcendental decisión chega en pleno conflito coa Liga polo posible descenso á Segunda B tras o partido fronte ao Fuenlabrada suspendido polo brote de coronavirus importado polo equipo madrileño á Coruña. (Imaxe: RC Deportivo)
