A CIG convoca folga xeral nas Pontes o 23 de novembro "en resposta á crítica situación socioeconómica" da localidade e reclama "medidas que garantan" unha "transición xusta". O paro, de media xornada, desenvolverase entre ás 11 e as 15 horas e afectará a todas as traballadora e traballadores das empresas privadas e administracións públicas do ámbito municipal.
O presidente da República convoca eleccións en Portugal o 10 de marzo tras consultar cos partidos políticos. Marcelo Rebelo de Sousa agradece a António Costa que siga exercendo en funcións ata esa data tras presentar a súa dimisión ao estar investigado por presunta corrupción coas minas de litio na fronteira con Galicia. O presidente di querer que antes sexan aprobados os orzamentos do Estado para 2024.
O debate parlamentario para investir a Pedro Sánchez celebrarase previsiblemente os días 15 e 16, mércores e xoves da vindeira semana. A presidenta do Congreso, Francina Armengol, fará este luns o anuncio oficial.
Feijóo fai unha nova comparecencia na que pide á cidadanía saír as rúas de xeito "sereno" contra Pedro Sánchez, ao que deslexitima, e reitera que fará unha oposición dura.
Besteiro asegura que "a vía de alta capacidade da Costa Norte será a primeira obra que farei cando chegue á Xunta". Cando Feijóo chegou á presidencia en 2009 prometía que poría en servizo en 2012 unha autovía Ferrol-San Cibrao, pero hoxe dos 80 quilómetros só hai en 16 deles un corredor dun carril por sentido.
PSOE e Junts pechan o acordo para a investidura de Pedro Sánchez. O acordo chega un 9 de novembro, mesma data da primeira gran consulta de 2014 á cidadanía catalá sobre a independencia.
A Xunta declara cinco novos focos de enfermidade hemorráxica epizóotica en explotacións bovinas de Lugo e Ourense, nos concellos de Piñor, Esgos, Baños de Molgas, Friol e O Saviñao. Son xa 18 as comarcas veterinarias con focos de EHE en Galicia.
Pintadas na sede do PSOE de Ferrol logo da terceira noite de disturbios ultras en Madrid contra a lei de amnistía que negocian socialistas e o independentismo catalán. A ex-deputada autonómica e concelleira ferrolá, Beatriz Sestayo, denunciou o ataque á sede do seu partido.
A Real Academia Galega "exhorta" aos deputados e deputadas galegos nas Cortes que usen o galego na súa actividade parlamentaria. Nunha declaración institucional do seu plenario, a entidade destaca a importancia da reforma lexislativa que permite o uso da lingua propia no Congreso e no Senado, "polo simbolismo" e pola "asunción da pluralidade lingüística por parte das institucións do Estado".
O Primeiro Ministro portugués, António Costa, presenta a súa dimisión ao Presidente da República despois de que o seu Xefe de Gabinete fose detido nunha operación relacionada co negocio do litio e de que o propio Primeiro Ministro estea a ser investigado. "Encerro etapa com consciência tranquila", afirma Costa.
