Queiman a bandeira do orgullo LGTBI+ que o Concello de Tui pendurara do balcón da casa consistorial. O goberno local condena os feitos, cuxa autoría se investiga, e pendurou unha nova bandeira. "Dende o Concello de Tui apostase pola igualdade, polo respecto, pola tolerancia", subliñan.
A Xunta publica nunha edición extraordinaria do DOG as normas que rexerán a reapertura das discotecas e a autorización de festas e verbenas dende o 1 de xullo, ademais de pequenas mudanzas nas restricións en parques infantís ou actividades musicais, entre outras, para evitar contaxios do coronavirus. A resolución, que reafirma a obrigatoriedade do uso da máscara, pódese consultar completa nesta ligazón
As chamadas ao teléfono 016 de violencia de xénero durante os dous meses completos de confinamento, abril e maio, aumentaron un 66% en Galicia con respecto ao mesmo período de 2019. En abril o aumento fora do 73% e este venres veñen de coñecerse as cifras de maio.
O barrio compostelán de San Pedro leva as súas festas a internet por mor do coronavirus. Este venres, dende as 22h, a comisión de festas ofrece en streaming unha actuación sorpresa, o pregón e un pasarrúas, todo coa actriz Patricia Vázquez como presentadora.
Comeza en Pontevedra o foro 'As mulleres que opinan son perigosas', este ano en liña para adaptarse ás restricións do coronavirus. Entre as intervencións do encontro inclúese a presentación, por parte de Xornalistas Galegas, do estudo 'As mulleres na opinión: un elefante rosa no medio das redaccións'. Todas as intervencións poden seguirse ao vivo nesta ligazón.
Dimite o alcalde de Dozón, Adolfo Campos (PP), aos 85 anos de idade e tras 33 como rexedor do municipio. Campos alega razóns médicas. O tenente de alcalde do concello é o seu fillo. (Imaxe: Concello de Dozón)
A Deputación de Lugo suspende as visitas ás súas residencias de maiores de Ribadeo e Trabada "como medida preventiva" polo brote de coronavirus da Mariña e as persoas que residen neles non poderán saír ao exterior. A institución informa ademais de que os centros da Fonsagrada e Pol volven á fase 1 do seu desconfinamento, "con restricións no acceso de persoas alleas ao centro e protocolos de seguridade máis estritos".
O Goberno central acorda con sindicatos e patronal ampliar os ERTE ata o 30 de setembro. Empresarios e centrais dan o visto e prace á última proposta do Executivo, que permite manter os expedientes por forza maior sobre a totalidade do persoal.
Portugal decreta a volta ao confinamento de 19 das 24 freguesías de Lisboa, tal e como adiantara o xornal Público. A cidadanía destas zonas só poderá saír a rúa para actividades esenciais. Por cuarto día seguido, Portugal rexistra máis contaxios (311) que recuperacións, o 77% na rexión da capital.
12X | Galicia en Común denuncia ante a Xunta Electoral ao Goberno galego e ao PP "por infrinxir de forma clara, flagrante, reiterada e maliciosa" a lei electoral coa campaña publicitaria 'Galicia volve' e co anuncio do bono de 250 euros para que persoal sanitario e de servizos sociais faga gasto na hostalaría. Ambas accións, coida Antón Gómez-Reino, foron lanzadas "con afán partidista, procurando o beneficio para o PP" con recursos "que son de todos".
